Media-icmal 15.12.20

COVİD-19 pandemiyasına qarşı mübarizə, Qarabağda yerləşən Rusiya sülhməramlılarının fəaliyyətinə baxış, şəhidlərə dair televiziya verilişləri barədə düşüncələr, və s. məsələlər medianın aparıcı mövzuları sırasındadır. 

"Azərbaycan" qəzeti "Evinizi taclı virusa qarşı möhkəm qalaya çevirin" sərlövhəli məqalədə vətəndaşları COVİD-19 pandemiyasına qarşı mübarizədə tələb edilən qaydalara ciddi riayət etməyə çağırır.

Müəllif hesab edir ki, koronavirus xəstələrinin sayının azalması dövlətin gördüyü tədbirlərlə yanaşı, hər bir kəsin həyat tərzindən, gigiyenik qaydalara riayət etməsindən və ailə sağlamlığını qorumasından ciddi asılıdır.

Bundan da irəli gələrək müəllif deyir ki, statistik rəqəmlər xəbərdar edir ki, insanlar sağlamlıqlarına laqeyd yanaşsalar, yoluxanların sayı arta bilər.

"Bunun olmaması üçün müəllif ilk növbədə hər ailəni evini taclı virusa qarşı yenilməz qalaya çevirməyə, qonaq getməməyə, evə gəlib-gedənlərin sayının az olmasına, mobil telefonlara əlaqə saxlamağa çağırır. Xəstələrin sayının azalması, ilk növbədə, sağlam insanların bu xəstəliyə yoluxmamasından asılıdır. Yəni biz özümüzü qoruduqca, qaydalara əməl etdikcə, yeni yoluxanların sayı azalacaq", deyə müəllif vurğulayır.

"Yeni sabah.az" saytında "Rusiya sülhməramlılarının planı nədir? - Qarabağda yeni gərginlik" sərlövhəli məqalədə Rusiyanın Qarabağda sülhməramlı missiyası tənqid edilir.

Buna səbəb kimi isə Rusiyanın bu missiyadan kənara çıxması, onlara aid olmayan tədbirlər həyata keçirmələridir. Məqalədə deyilir ki, ilk vaxtlar sülhməramlı missiya fəaliyyətini tam qanunauyğun keçirsə də sonradan rəsmi Bakı ilə razılaşdırılmamış addımlar atılıb. 

Belə ki, Rusiya sülhməramlıları Azərbaycan, Rusiya prezidentləri və Ermənistanın baş nazirinin 2020-ci il 10 noyabr tarixli birgə bəyanatında nəzərdə tutulmuş hüdudları aşan yeni xəritələr təqdim edib.

Məqalədə vurğulanır ki, Rusiya sülhməramlılarına gündə bir xəritə cızaraq dövriyyəyə buraxmaq səlahiyyətini kim verib, bu, məlum deyil. Buna görə də Rusiya sülhməramlılarının hazırlayıb yaydığı xəritə qeyri-real sayılır və qısa zamanda düzəliş edilməsinə ehtaiyac var. 

Müəllifə görə, bu hərəkətlər Rusiyanın öz öhdəliklərini pozduğunu açıq-aydın göstərir.

Məqalədə deyilir ki, həmin kəndlərə indi Azərbaycan nəzarət edir, ona görə də Rusiyada müəyyən qüvvələr Gürcüstan, Ukrayna, Moldova, Belarus və s. ölkələrdə reallaşdırdıqları planları Azərbaycanda təkrarlamağa cəhd etməməlidir.

Müəllifə görə, Rusiyada müəyyən qüvvələr başa düşməlidirlər ki, Azərbaycana qarşı atılan hər bir addımın acısını Ermənistan çəkəcək, amma nəticə etibarilə Rusiyanın Azərbaycandakı imicinə böyük zərbə olacaq.

"Modern.az" saytında isə "Şəhid mövzusu şou əhli üçün deyil – telekanallara etiraz" sərlövhəli məqalədə telekanallarda şəhidlərlə bağlı mövzunun şou əhlinə tapşırılması təniqd edilir.

Məqalədə deyilir ki, bəzi telekanallarda vaxtilə şou verilişlərə aparıcılıq etmiş şəxslər indi şəhid ailələri və qazilərlə bağlı verilişlərə müəlliflik edirlər, bu isə insanlar tərəfindən ciddi narazılıqla qarşılanır.

İctimai fəallar bu veriliş aparıcılarını şəhid mövzusunda həssas olmağa çağırırlar. Onlar hesab edirlər ki, şou əhlinin şəhidlər mövzusuna toxunması qadağan olunmalıdır: "Kimsəyə yaradıcılıq qadağası qoymaq istəmirik, amma elə sərhəd var ki, onu şou əhli keçə bilməz. Bu da şəhidlər mövzusudur", deyə vurğulanır. Odur ki, belə ucalığı ucuzlaşdırmaq olmaz.

Məqalədə hətta iddia edilir ki, bəzən belə verilişlər reytinq xətrinə istifadə olunur, odur ki, yanaşmalar dəyişməlidir, suallar qeyri-səmimi, məzmunsuz, aparıcı özü isə hazırlıqsız görünür. Cəmiyyət fəallarına görə, tamaşaçıya səmimi, təbii hisslərlə zəngin kontent gərəkdir. Hesab edirik ki, televiziya rəhbərləri bu barədə ciddi düşünməlidirlər. Bu verilişlərin monitorinqi aparılmalıdır.

"Moderator.az" saytı isə "Həm diplomatiya, həm də hərbi müstəvidə hücumedici siyasətimizi davam etdirəcəyik" sərlövhəli məqalədə Rusiya sülhməramlılarının fəaliyyətinə dair politoloq Fikrət Sadıqovun baxışlarına yer verib.

Müəllif deyir ki, Müdafiə Nazirliyi və Dövlət Təhlükəsizliyi Xidməti işğaldan azad edilən ərazilərdəki meşəliklərdə gizlənən bəzi erməni hərbiçilərinin Azərbaycan əsgərlərinə, o cümlədən mülki vətəndaşlara qarşı teror aktları həyata keçirməsi ilə bağlı məlumat yayıb.

F.Sadıqov bunu  Ermənistanın aldığı məğlubiyyətdən hələ bir müddət özünə gələ bilməməsi kimi dəyərləndirib.

Politoloqa görə, reallıq odur ki, torpaqlar azad edilib, beynəlxalq normalar əsasında Azərbaycan məlum 4 qətnaməni yerinə yetirib. Bu, bir həqiqətdir ki, opponentlərimiz də buna qarşı çıxış etmirlər.

Amma politoloq hesab edir ki, ermənilər aldıqları məğlubiyyətlə barışa, sakitləşə bilmirlər, Azərbaycanın dinc əhalisinə qarşı terror aktları törədirlər. "Ermənilərin aldığı məğlubiyyət, verdiyi itkilər o qədər böyükdür ki, görünür, onlar hələ bir müddət özlərinə gələ bilməyəcəklər", deyə politoloq rəy verir.

Amma politoloq hesab edir ki, bu, Azərbaycan üçün təhlükə yaratmır, belə ki, Azərbaycan Silahlı Qüvvələri yerindədir, bundan sonra da həm diplomatiya, həm də hərbi müstəvidə hücumedici siyasət davam etməlidir.

"Sfera.az" saytında "Erməni yaraqlıları Hadrut meşəsində azıblar, yoxsa... – Yalandır…" sərlövhəli məqalədə politoloq Natiq Miri noyabrın 28-də Xocavənd rayonunun Hadrut qəsəbəsi yaxınlıqdakı meşələrdə gizlənən ermənilərin silahlı müqavimətini şərh edir.

Söhbət ondan gedir ki, bəhs olunan tarixdə erməni silahlıları qəfil hücum edərək hərbiçilərə və mülki şəxslərin həyatlarına qəsd ediblər.

Politoloq hesab edir ki, bu hücum hansısa təsadüfün nəticəsi deyil, düşünülmüş ssenaridir və süni gərginlik yaratmağa hesablanıb.

Politoloq vurğulayır ki, ermənilərin meşədə azıb qalması haqda deyilənlər düşünülmüş ssenaridir, çünki Ermənistan ordusu məğlub olduqdan sonra həmin ərazilərdən qaçmışıdılar və bu, hər kəsə bəllidir".

Politoloq deyir ki, bu düşünülmüş yalan ictimai fikri aldatmağa yönəlib.

Həm də Rusyanın sülhməramlı missiyasına yönəlik təxribatdır: "Çünki 10 noyabr bəyanatına görə, Ermənistan silahlı qüvvələri işğaldakı torpaqlardan çıxarılmalıdır. Lakin bir aydan artıq vaxt keçsə də, torpaqlarımızda erməni yaraqlıları, terrorçuları mövcuddur", deyə politoloq bildirir.

Politoloq hesab edir ki, belə gərginliklərlə Azərbaycana təzyiq göstərməyə çalışırlar, bu son terror olayının arxasında tək Ermənistan hakimiyyəti yox, həm də bəzi xarici qüvvələr dayanır. Hadisə süni olaraq gərginlik yaradılmasına xidmət edir".