Media-icmal 17.02.2016

Rəsmi media, o cümlədən “president.az” saytı dövlət başçısı İlham Əliyevin Tovuz rayonuna səfəri, burada bəzi obyektlərin açılışında iştirakı haqda yazılar dərc ediblər. 

“Azərbaycanda vəkillər heç öz hüquqlarını müdafiə edə bilmirlər” .“Azadlıq” qəzeti  vəkil Yalçın İmanova təzyiqlərlə bağlı məsələni gündəmə gətirir.

  Belə ki, AXCP sədrinin müşaviri Məmməd İbrahimin məhkəmə prosesində vəkil qaldırdığı vəsatətlərin yerinə yetirilməməsinə hakim və müstəntiqin formal münasibət bəslədiyini bildirib. Hakim Turqay Hüseynov bunu məhkəməyə hörmətsizlik sayaraq Y.İmanovun vəkillikdən uzaqlaşdırılması ilə bağlı Vəkillər Kollegiyasına müraciət edib.

Cəmiyyətdə olan naqislikləri tənqid edən şəxslərə qarşı hakimiyyətin repressiya aparatı həmişə işə düşür”, - Milli Şuranın Koordinasiya Şurasının üzvü, ədliyyə generalı Vidadi Mirkamal bu məsələyə münasibət ifadə edib. V.Mirkamal Y.İmanova təzyiqləri hüquqi nihilizm adlandırıb, buna qədər bir sıra vəkillərə belə təzyiqlərin olduğunu xatırladıb. “Kollegiya rəhbərliyi repressiya aparatının bir hissəsidir. Təəssüf ki, Azərbaycanda vəkillər institutunu bu vəziyyətə qoyublar. Vəkillər nəinki müdafiə etdiyi şəxslərin, heç öz hüquqlarını belə müdafiə edə bilmirlər”, - V.Mirkamal bu sahədəki mövcud duruma rəy verib.

“Hakimiyyət vəkillik institutundan gələ biləcək təhlükənin qarşısını almaq üçün tədbirlər görür”,- vəkil Qurban Məmmədov təzyiqlərə mövqeyini ifadə edib. Q.Məmmədova görə, hakimin Vəkillər Kollegiyasına müraciəti Y.İmanovun qarşısında hüquqi cəhətdən aciz qalmasının nəticəsidir. Onun fikrincə, Y.İmanova qarşı təzyiqlər vəkillərə qarşı vaxtilə başladılan prosesin davamıdır.

“NATO kömək etməyəcək” “Novoe Vremya” qəzetində müəllif Rövşən Vəliyev NATO elçisi Ceyms Appaturayın Bakı səfərinə qiymət verir. Müəllif  NATO-nu Qarabağın xilası yox, daha çox Əfqanıstan məsələsində Azərbaycanın ona dəstək verməsinin maraqlandırdığına iddia edir.

“Nə Vaşinqton, nə Paris, nə də NATO nə zamandan bəri uzanan bu problemin hərbi və ya sülh yolu ilə həllində Azərbaycana şərait yaratmaqda əvvəldən maraqlı olmayıb. Sual edilir ki, əgər biz bundan heç bir uduş əldə etmiriksə o zaman NATO-nun müxtəlif əməliyyatlarında niyə iştirakçı olmalıyıq?”, - müəllif yaranan duruma münasibət sərgiləyir.

“Azərbaycanlı nazir müavininin Suriya açıqlaması aranı qarışdırdı”. “Yeni Müsavat” qəzeti xarici işlər nazirinin müavini Araz Əzimovun bu günlərdəki çıxışında Suriya rəhbəri Bəşər Əsədi müdafiə etməsini belə dəyərləndirir.

Çıxışı ilə bağlı şərh verən A.Əzimov  B.Əsədi yox, koalisiya quru qoşunlarının Suriyaya çıxarılmamasını dəstəklədiyini deyib. Amma A.Əzimovun bu çıxışa Azərbaycan siyasi cameəsinin mövqeyi sərtdir.  “Bu çıxış ölkədən didərgin salınan milyonlarla insana, faciələr yaşayan türkmənlərə həqarətdir”,- Müsavat başqanı A.Hacılı nazir müavininin çıxışna münasibət ifadə edib.

Demokrat Partiyasının sədri Sərdar Cəlaloğlu bu faktı hökumətin xarici siyasət apara bilməməsinin, beynəlxalq hüququ bilməməsinin, Rusiyaya bağlı olmasının  göstəricisi hesab edib.

Qəzet qeyd edir ki, ölkədəki müstəqil siyasi analitiklər də A.Əzimovun mövqeyinə əks münasibət sərgiləyiblər.

“Böhrana qarşı hökumətin siyasəti strateji deyil, praktiki olub”, - ekspert Samir Əliyev “Bizim yol” qəzetinə şərhində rəsmi Bakının ölkədə yaşanan böhrana qarşı mübarizəsinə mövqe bildirib.

“Strateji olması üçün bir neçə illik antiböhran proqramı hazrlanmalı idi, çünki böhran qısamüddətli olmur. Həmin proqramlar əsasında ciddi islahatlar getməli idi. Bura struktur və institusional islahatlar daxil idi”, - ekspert görülən tədbirlərin yalnız cari xarakterli olduğunu xatırladıb. S.Əliyev neftin qiyməti ucuzlaşmağa başlarkən rəsmi Bakının islahatlara getməyərək neftin bahalaşa biləcəyini gözləməsini səhv addım adlandırıb.

“Strateji baxımdan antiböhran proqramı hazırlanmasa, vəziyyətin sabitləşməsindən danışmağa dəyməz”, - ekspert bu sahədəki mövcud duruma qiymət verib.