Media-icmal 20.08.19

Ölkədə kiçik və orta biznesin inkişafına dəstək, kredit faizlərinin yüksək olmasına münasibət, maşın bazarındakı bahalaşma və s. məsələlər bugünki (20 avqust 2019-cu il) medianın aparıcı mövzularındandır...

Kiçik biznesin böyük dostları

"Azərbaycan" qəzeti "Kiçik sahibkarın böyük dəstəkçisi" sərlövhəli məqalədə ölkədə kiçik və orta biznesin inkişafında Kiçik və Orta Biznesin İnkişafı Agentliyinin (KOBİA) fəaliyyətini dəyərləndirir.

Müəllif hesab edir ki, hər bir ölkədə iqtisadiyyatın dayanıqlılığı kiçik və orta biznesin (KOB) inkişaf səviyyəsi ilə bağlıdır və inkişaf etmiş ölkələrdə bu kateqoriya biznesin ÜDM-də payının 50 faiz, məşğulluqda isə 60 faizdən çox olduğunu bildirir.

Yazıda vurğulanır ki, Azərbaycanda sahibkarlığın inkişafı, biznes mühitinin yaxşılaşdırılması istiqamətində aparılan islahatlar və dövlət dəstəyi nəticəsində özəl sektor iqtisadiyyatın aparıcı qüvvəsinə çevrilib.

Müəllifə görə, ölkə üzrə sahibkarlıq subyektlərinin 99 faizinin KOB subyektləri olması kiçik və orta sahibkarlığın ÜDM-də və ixracda payının artırılması üçün böyük potensialın olduğunu göstərir.

Məqalədə deyilir ki, Prezident İlham Əliyevin sistemli islahatları nəticəsində xüsusilə son illərdə kiçik və orta sahibkarlığın maliyyə dayanıqlılığının artırılması, aşağı faizli kreditlərə çıxış imkanlarının genişləndirilməsi, güzəştli kreditlər verilməsi, kiçik və orta biznesin inkişafının qanunverici bazasının möhkəmləndirilməsi istiqamətində xeyli işlər görülüb.

Yazida deyilir ki, 2017-ci ilin dekabarında İqtisadiyyat Nazirliyinin tabeliyində yaradılmış Kiçik və Orta Biznesin İnkişafı Agentliyi (KOBİA) iş adamlarının ən yaxın dəstəkçisinə çevrilib. Agentlik KOB subyektlərinə bir sıra xidmətlər göstərən, dövlət orqanlarının bu sahədə xidmətlərinin əlaqələndirilməsini və tənzimlənməsini həyata keçirən publik hüquqi şəxsdir və İqtisadiyyat Nazirliyinin tabeliyində fəaliyyət göstərir.

Agentlik kiçik və orta biznesin yaradılmasından başlayaraq fəaliyyətinin bütün mərhələlərində mövcud dövlət dəstəyi mexanizmləri və göstərdiyi xidmətlər çərçivəsində KOB-lara yardımçı olur, dövlət qurumları ilə KOB subyektləri arasında körpü rolunu oynayır.

Məqalədə vurğulanır ki, KOBİA sahibkarlarla 4 növ təmas platforması vasitəsilə ünsiyyətdə olmağı və xidmətlər göstərməyi hədəfləyir və hazırda ölkə üzrə yaradılmaqda olan "KOB Dostu" belə mexanizmlərdən biridir.

Müəllif deyir ki, "KOB Dost"ları həm bu kateqoriya biznesin inkişafına, həm də bu kateqoriya sahibkarların hüquqlarının müdafiəsinə dəstək olurlar, ümumilikdə, ölkənin 10 iqtisadi rayonu üzrə 60 "KOB Dostu"ndan ibarət şəbəkənin yaradılması nəzərdə tutulur, bu ilin 6 ayı ərzində 5 KOB dostu (Abşeron, Sumqayıt, Şəki, Qəbələ və Füzulidə) fəaliyyətə başlayıb ki, bununla da ölkə üzrə KOB dostlarının sayı 15-ə çatdırılıb.

Məqalənin sonunda isə oxuyuruq: "Azərbaycanda davamlı iqtisadi inkişafın təmin edilməsi, kiçik və orta biznesin iqtisadiyyatda rolunun artırılması Prezident İlham Əliyevin sosial-iqtisadi inkişaf strategiyasında əsas prioritetlərdəndir. Yeni yaradılmış KOBİA isə kiçik və orta biznesin inkişafı istiqamətində qarşısına qoyulan vəzifənin, tapşırıqların öhdəsindən layiqincə gəlməyə çalışır".

Deputat: Bimirsiniz ki, Azərbaycanda...

"Bizimyol.info" da isə "Azərbaycanda aşağı faizlə kredit söhbəti yoxdur - deputat" sərlövhəli məqalə qiqqət cəlb edir.

Müəllif ölkədə kredit faizlərinə dair "İctimai TV"dəki teledebatda deputat Vahid Əhmədovun kredit faizlərinin yüksək olması barədə fikirlərinə yer verib.

Müəllif deyir ki, V.Əhmədov ölkədə faiz kreditlərinin yüksək olmasını xüsusi vurğulayıb.

"Bura Azərbaycandır. Hamı bu həqiqəti bilir ki, Azərbaycanda aşağı faizlə kredit verilmir. Necə olur ki, bank əmanəti 12%-lə alır, həmin pulu 25%-lə kredit verir?", müəllifin sözlərinə görə, deputat Vahid Əhmədov belə deyib.

Yazıda vurğulanır ki, Banklar Assosiasiyasının nümayəndəsi Sahib Daşdəmirov deputata cavab olaraq isə bildirib: "Yəqin ki, tələbat olmasa, banklar da bu qədər yüksək təklif irəli sürməzlər. Amma hər yerdə faiz dərəcələri eyni deyil. Hər bankın özünün yürütdüyü faiz siyasəti var. Sahibkarlığa Yardım Fondu 6%, İpoteka Fondu 8%-lə kredit verir. Bizdə indi banklarda boş vəsait formalaşır. Bu boş vəsaitdən orta və kiçik sahibkarlığın inkişaf etirilməsi üçün istifadə olunacaq. Lakin faiz siyasətimiz bazara uyğun tənzimlənir. Yaxın günlərdə bununla bağlı açıqlama veriləcək".

Müəllifin sözlərinə görə, deputat Vahid Əhmədov bu fikirlə razılaşmayıb və etirazını bildirib.

"Gəlin, dərinə getməyək. Dərinə getsək, çox məsələlər çıxacaq. Bəyəm siz Azərbaycanda yaşamırsınız? Bilmirsiniz ki, bizdə o dediyiniz faizlə kredit yoxdur? Banklar vəsaiti hardan alırlar? Birincisi bunun 80-85 faizi insanların əmanətləridir. İkincisi, xaricdəki maliyyə qurumlarından dəstək alırlar, üçüncüsü də Mərkəzi Bankın mərkəzləşdirilmiş krediti var, uçot dərəcəsini aşağı salmaqla və s. digər banklara vəsait verir. Mən sual verirəm, sən necə olur ki, məndən 12 faizlə əmanət götürürsən, amma 25 faizlə mənə kredit verirsən? Qoy bankın xərcləri 3-4 faiz təşkil etsin də. 15 faiz necə olur axı? Bank sistemindəki bu suallar öz həllini mütləq tapmalıdır", deyə millət vəkili bildirib.

Avtomobillər bahalaşdı

"Axar.az"da isə "Avtomobil bazarında son durum: qiymətlər qalxdı" sərlövhəli məqalə oxumaq olar.

Sayt Bakı maşın bazarında qiymətlərin bahalanmansı ilə bağlı müəllifin düşüncələrinə yer verib.

Müəllif deyir ki, Bakının avtomobil bazarlarında qiymət artımı müşahidə olunur və qiyməti yüksələn avtomobillər xüsusilə Almaniya istehsalı olan maşınlardır.

Müəllifin sözlərinə görə, qiymət artımı hər markadan olan avtomobillərdə müşahidə edilir.

Yazıda vurğulanır ki, bu səbəbdən də Bakının avtomobil bazarlarında durğunluq yaşanır.

Məqalədə satıcılara istinadən deyilir ki, avtomobillərin qiyməti hər gün artır. "Belə ki, son 3 ayda hər bir avtomobilin qiymətində 1000-2000 manat artım qeydə alınıb", deyə satıcılar bildiriblər..

Müəllif vurğulayır ki, bazarda ən çox tələb isə mühərrik həcmi kiçik olan, yəni benzin az tələb edən avtomobillərədir və bu tələb də məhz bu kateqoriyadan olan avtomobillərin qiymətini bahalaşıdırır.

Müəllifin dediyinə görə, alıcılar indi daha çox ehtiyat hissələri ucuz olan avtomobil almağa üstünlük verirlər və Almaniya istehsalı olan avtomobillərə tələbat çox olduğu üçün bu maşınların da qiyməti qalxıb.

Bununla yanaşı, müəllif əlavə edir ki, Rusiya istehsalı olan kondisionersiz avtomobillərin də qiyməti bahalaşıb.

Müəllif satıcıların sözlərinə istinadən bildirir ki, payıza doğru bazarda canlanma olmasına baxmayaraq, qiymətlərin ucuzlaşacağı gözlənilmir.