Bakı Yerevanın sərhəddə irəliləmə haqqında iddialarını təkzib edir

Bakı/20.08.19/Turan: Ermənistan silahlı qüvvələri strateji əhəmiyyətə malik obyektləri nəzarət altına götürüblər, bu barədə Ermənistanın Müdafiə Nazirliyinin mətbuat xidmətinin rəhbəri Artsrun Ovannisyan Ermənistan mətbuatına bildirib. Xüsusən, erməni qüvvələrinin "140 ha-dan çox ərazini azad etdiyi, Azərbaycan-Gürcüstan avtomagistralını, Azərbaycanın İkinci Şıxlı kəndini və onun təsərrüfat yerlərini nişan altına almağa müvəffəq olduqları" iddia olunur.

Digər Yerevan mənbələri erməni qüvvələrinin Tavuşun şimalında yeni mövqelər ələ keçirərək, Gürcüstandan Ermənistana gedən qaz kəmərini və Gürcüstan-Ermənistan avtomagistralını nəzarət altına götürdüklərini bildiriblər.

Bir müddət əvvəl Ermənistanın müdafiə naziri Qabriel Balayan bildirib ki, sərhədin şimal-şərq hissəsində erməni hərbiçiləri mövqelərini möhkəmləndirməyə və Azərbaycan SQ-nin irəliləmək cəhdinin qarşısını almağa müvəffəq olublar. Onun sözlərinə görə, Azərbaycan tərəfin Ermənistan-Gürcüstan yolunu nəzarət altına götürmək cəhdinin qarşısını almağa və Azərbaycan-Gürcüstan yolunu atəş hədəfinə götürməyə müvəffəq olublar.

Öz növbəsində, Ermənistan parlamentinin spikeri Ararat Mirzoyan Facebook-da belə bir qeyd yazıb: "Çinariyə artıq atəş açılmayacaq, qaz kəmərinin təhlükəsizliyi də təmin edilib". Çinari Ermənistanın Tavuş bölgəsində Azərbaycanın Tovuz rayonu ilə həmsərhəd kənddir.

Erməni qoşunlarının irəliləməsi haqqında məlumat ötən həftə Azərbaycan Dövlət Sərhəd Xidmətinin yeni postlarının qurulması haqqında analoji xəbərlərindən sonra yayılıb.

Azərbaycan Sərhəd Xidmətinin nümayəndələri və hərbi ekspertləri bir neçə kilometr uzunluğunda sərhəd zolağının nəzarət altına götürüldüyü, nəticədə Azərbaycan postlarının yerinin Ermənistana tərəf dəyişdirilməsi haqqında danışırdılar.

Azərbaycan rəsmiləri həmin vaxt Ermənistan KİV-lərinin Azərbaycanın bu məlumatlarını götürərək çap etmələri ilə bağlı narazılıqlarını bildirib. Ermənistan Müdafiə Nazirliyi isə bildirib ki, Azərbaycan tərəfi əvvəlki şəkildə hərəkət etməyə davam edərsə, onu "erməni SQ-nin peşəkarlığı sayəsində əldə etdiyi operativ-strateji üstünlüklərin nümayişi şəklində sürprizlər" gözləyir.

Azərbaycan tərəfi bu bəyanatlara cavab olaraq Ermənistan tərəfin məlumatının heç bir əsasının olmadığını bildirib. Azərbaycan ordusu bütün istiqamətlərdə düşmənin istənilən addımını hədəfdə saxlayır, istənilən an düşmənin addımlarının qarşısını almağa hazırdır. -0-