Media-icmal 23.03.20

Koronavirus pandemiyası ölkənin İnternet resurlarının aparıcı mövzusu olmaqda  davam edir. Saytlar bu virusa qarşı mübarizə, qadağaların tətbiqi, virusa yoluxma təhlükəsini aradan qaldırmaq üçün məhdudlaşdırıcı istiqamətdə tədbirlərin görülməsindən, bəzi idman tədbirlərinin və s. ləğvindən danışırlar.

Bəhs olunan xüsusda koronavirus pandemiyasına qarşı Nazirlər Kabineti yanında  Operaitv qərargahın iri ticarət mərkəzləri və “Mall”arın fəaliyyətini dayandırmasına dair qərarı yayılıb.   

Qərargah qərarın koronavirus pandemiyasının yayılması təhlükəsinə qarşı kütləvi toplanma məkanları üzrə məhdudlaşdırıcı tədbirlərin icrası ilə bağlı qəbul edildiyini bildirir.

Qərara görə, bir sıra tədbirlərlə yanaşı sosial məhdudlaşdırma tədbirləri həyata keçirilir və bu məqsədlə kütləvi tədbirlər ləğv edilib, restoran və kafelərin iş rejimi qısaldılıb: “Bu baxımdan nəzdindəki ərzaq mağazaları və apteklər istisna olmaqla, ölkə ərazisində iri ticarət mərkəzlərinin və “Mall”arın fəaliyyəti 2020-ci il martın 23-ü saat 00:00-dan etibarən bir ay müddətinə dayandırılır”.

“Azərbaycan” qəzeti isə “Azərbaycanda koronavirusa daha 12 yoluxma faktı qeydə alınıb” sərlövhəli məqalədə koronavirusla bağlı ölkədəki son duruma toxunur.

Müəllif deyir ki, yeni koronavirus (COVID-19) infeksiyasına daha 12 yoluxma faktı qeydə alınıb, xüsusi rejimli xəstəxanalara yerləşdirilən və müşahidə altında olan pasiyentlərin özlərini normal hiss etdikləri deyilir. Müəllifin deməsinə görə, hazırda Azərbaycanda 54 nəfər aktiv koronavirus xəstəsi xüsusi rejimli müəssisələrdə həkim nəzarəti altında saxlanılır.Yazıda vurğulanır ki, Azərbaycanda koronavirusa yoluxma halları xaricdən gələn şəxslər sırasında və ölkə daxilində insanların bir-birini yoluxdurması faktları üzrə aşkarlanır. Müəllifə görə, indiki halda vətəndaşların özünütəcrid tədbirlərinə uyğun davranması, digər şəxslərlə minimum təmasda olması, insanların sıx toplaşdığı yerlərdə olmaması daha faydalıdır.

“Oxu.az” saytı isə “Azərbaycanda koronavirusa görə bu şəxslərə xəbərdarlıq edildi” sərlövhəli məqalədə İqtisadiyyat Nazirliyi, Əmək və Əhalinin Sosial Müdafiəsi Nazirliyinin, Sahibkarlar (İşəgötürənlər) Təşkilatları Milli Konfederasiyası və Azərbaycan Həmkarlar İttifaqları Konfederasiyasının işəgötürənlərə bildiriş yaymasını diqqətə çatdırır.

Sənəddə deyilir ki, bu il martın 19-da dövlət başçısı İlham Əliyev koronavirus pandemiyasına qarşı mübarizə ilə bağlı sərəncam imzalayb. Bu sənədə görə bir sıra sahələrlə yanaşı biznes mühitinə fəsadların azaldılması, zərər çəkməsi ehtimal edilən sahibkarlıq subyektlərinə dövlət dəstəyi göstərilməsi, muzdlu işçilərin sosial müdafiəsinin gücləndirilməsi və s. nəzərdə tutulur.

Bildirişdə isə vurğulanır ki, pandemiyanın biznes mühitinə mənfi təsirini azaltmaq üçün sahibkarlara dəstəyin göstərilməsi təmin edilir. Amma mövcud şəraitdən sui-istifadə edərək işçilərin əsassız yerə ixtisarına yol verən işəgötürənlərlə bağlı qanunvericiliyə uyğun ciddi tədbirlər görüləcək”.

Bu mövzuda daha bir yazı “Azadlıq.info”da yer alır. Belə ki, “Ilk rəsmi koronavirus məhbusu” sərlövhəli məqalədə Azərbaycan Xalq Cəbhəsi Partiyasının (AXCP) üzvü Anar Məlikovun inzibati həbsi barədə danışılır. Müəllif deyir ki, AXCP Ali Məclisinin üzvü A.Məlikov “karantin rejiminin pozulması” ittihamı üzrə Cəlilabad Rayon Məhkəməsinin qərarı ilə 10 sutka azadlıqdan məhrum edilib. Məhkəmə A.Məlikovu İnzibati Xətalar Məcəlləsinin 211-ci maddəsi (epidemiya əleyhinə rejimin, sanitariya-gigiyena və karantin rejimlərinin pozulması) ilə təqsirli bilib.

Partiyadan isə deyilib ki, A.Məlikov koronavirusla bağlı Facebook-da bir neçə paylaşım edərək Cəlilabaddakı karantin yerində çatışmazlıqları ictimailəşdirib və həbsi də bununla bağlı ola bilər.

“Azpolitika.info” da dərc olunan “Azərbaycan “Formula-1”dən imtina edir” sərlövhəli yazıda isə söhbət bu ilin iyununda Bakıda keçirilməli olan “Formula-1” yarışlarının sonrakı taleyindən gedir.

Müəllif deyir ki, bu yarış bu il iyunun 7-də Bakıda keçirilməli idi. Amma bu günlərdə keçirilən telekonfrans zamanı Azərbaycan tərəf təşkilatçılara bundan imtina etdiyini bildirib. 

Müəllifin deməsinə görə, Azərbaycan tərəf imtinaya səbəb kimi koronavirus pandemiyasının yayılmasını göstərib.

“Modern.az” isə “Bakının yolları belə dezinfeksiya edilir” sərlövhəli məqalədə koronavirus infeksiyasına qarşı mübarizə  çərçivəsində Bakı küçələrinin dezinfeksiya olunmasına toxunulur.

Məqalədə deyilir ki, dezinfeksiya tədbirləri axşam saat 21:00-dan saat 23:00-a paytaxtın bir neçə rayonunda həyata keçirilib, yalnız mərkəzi küçələrə deyil, həm də Bakıətrafı qəsəbə və rayonlardan keçən prospektlərə, yollara da aid edilib.

Dezinfeksiya işləri Nizami, Xətai, Nəsimi rayonlarında aparılıb.

Yazıda vurğulanır ki, dezinfeksiya işləri gündəlik olaraq səhər saat 06:00-dan 08:00-dək, axşam saatlarında isə 21:00-dan 23:00-dək aparılır.