Media-icmal 24.03.20

Koronavirus pandemiyasına (COVİD-19) qarşı mübarizə, ölkədə xüsusi karantin rejiminin elan olunması, istehlak bazarında durum, əmək müqavilələrinə xitam verilməsinin dondurulması, sahibkarlara mümkün  güzəşt təklifləri və s. məsələlər medianın aparıcı mövzularıdır... 

“Azərbaycan” qəzeti  “Nazir Mikayıl Cabbarov pandemiyanın milli iqtisadiyyata təsirinin azaldılması üçün hökumətin gördüyü tədbirlərdən danışıb” sərlövhəli məqalədə nazir Azərbaycanda koronavirus pandemiyasına qarşı aparılan mübarizəni dəyərləndirir.

M.Cabbarov vurğulayır ki, ilkin mərhələdə ən çox mənfi təsirə məruz qalmış təxminən 12 fəaliyyət (turizm, hotel, iaşə, əyləncə, nəqliyyat, ticarət mərkəzləri və s.) sahəsi müəyyən edilib: “İşçi qrupu biznesin qorunması və dəyən zərərlərin minimallaşdırılması üçün müvafiq təkliflər hazırlayaraq dövlətimizin başçısına təqdim edəcək”.

Nazir hesab edir ki, sahibkarlar da icarədarlarla münasibətlərə yenidən baxmalı, imkan daxilində icarə haqlarının dondurulması və s. kimi məsələləri müzakirə etməlidirlər.

M.Cabbarovun deməsinə görə, ölkənin gündəlik tələbat malları ilə təminatı sahəsində çətinlik yoxdur, ölkənin tələbatları üçün zəruri həcmdə ehtiyatlar formalaşdırılıb və daxili bazar lazımi məhsullarla tam təmin olunub.

“Müsavat.com”  “ Kiçik və ort sahibkarlar üçün hansı dəstək mexanizmləri yaradıla bilər” sərlövhəli məqalədə  müəllif koronavirus pandemiyasının iqtisadiyyatda yaratdığı zərərlərin qarşılanması iqtiqamətində iqtisadçı-ekspert Rövşən Ağayevlə söhbətləşir.

Ekspertə görə,  ən çox zərər çəkən qruplardan birincisi kiçik və orta sahibkarlardır, hələ ki, icarədarlar icarə haqlarında onlara güzəşt etmək istəmirlər.

R.Ağayevə görə, bu təbəqə üçün ilk növbədə icarə haqlarının ən azından 3 aylıq kompensasiyası nəzərdə tutulmalı, torpaq və əmlak vergisi ödəyiciləri 2020-ci il üçün bu vergidən azad edilə bilərlər.

Onun fikrincə, bu ilin ikinci rübündə mənfəət (gəlir) vergisindən azadetmə mümkündür, fərdi sahibkarlıq subyektlərinə sosial müdafiə və işsizlik fondlarına ödəmələrdən 6 aylıq vergi tətili hüququ vermək olar.

R.Ağayev hesab edir ki, orta və iri sahibkarlığa münasibətdə kommunal xərclərdə güzəştlər, kredit ödənişlərinin dondurulması, vergi tətilləri və işdənçıxarmaların qarşını almaq üçün məşğulluğa görə kompensasiyalar nəzərdən keçirilə bilər: “Amma dəstəklə bağlı qərar çox sürətlə qəbul edilib icraya yönəldilməlidir.

“Oxu.az”da dərc olunan koronavirusla bağlı yalan məlumatlar yayanlar həbs edildi” sərlövhəli məqalədə Azərbaycanda koronavirusla bağlı vəziyyət müzakirəyə çıxarılır.

Müəllif deyir ki, koronavirus infeksiyası ilə bağlı Operativ  qərargah ölkə ərazisində zəruri sosial izolyasiya tədbirləri tətbiq edir, kütləvi tədbirlərin keçirilməsi təxirə salınıb, restoran və kafelərdə iş rejimi saat 15:00-dək müəyyən edilib. Amma müəllifin deməsinə görə ölkənin bəzi şəhər və rayonlarında ayrı-ayrı iaşə müəssisələri göstərilən vaxt çərçivəsindən kənara çıxıblar: “Konkret vaxtdan sonra fəaliyyətini dayandırmayan ölkə üzrə 411, o cümlədən Bakı şəhərində 154 obyekt müəyyən edilib. Göstərilən səbəblə bağlı 347 obyekt sahibinə xəbərdarlıq olunub, 71 obyekt sahibi barədə inzibati cərimə tətbiq edilib”.

Məqalədə vurğulanır ki, koronavirus infeksiyası ilə bağlı əhali arasında dezinformasiya yayan üç nəfər inzibati qaydada həbs olunub, Bakı, Sumqayıt şəhərlərinə və Abeşron rayonuna tətbiq edilən məhdud giriş qaydasını pozan  4 000 avtomobil geri qaytarılıb.

“Moderator.az” da dərc olunan “Azərbaycanda əmək müqavilələrinin ləğv edilməsinə moratorium qoyulur” sərlövhəli məqalədə Azərbaycanda yeni tip koronavirus (Covid-19) epidemiyası ilə əlaqədar əmək müqavilələrinin ləğv edilməsinə moratorium qoyulmasını ön plana çıxarır.

İqtisadiyyat naziri Mikayıl Cabbarov bununla bağlı dövlət sektoruna artıq göstəriş verildiyini vurğulayıb: “İnanırıq ki, özəl sektor biznes fəaliyyətini sosial məsuliyyətini qəbul edərək həyata keçirəcək və hər hansı işçinin əmək müqaviləsinə xitam verilməsi məsələsinə baxılmayacaq”.

Sahibkarlara mesaj verən nazir deyib ki, dövlət onların yanındadır, bizneslərinin qorunması, qısa müddətdə itirdikləri dövriyyələrini bərpa etməsinə əməli dəstək verilməsi üçün addımlar atacaq.

“Azpolitika.info”da isə “Ölkə ərazisində xüsusi karantin rejimi elan edildi: sabahdan yeni və daha sərt qadağanlar tətbiq olunacaq” sərlövhəli məqalədə koronavirus pandemiyası ilə bağlı Operativ qərargahın Azərbaycanda xüsusi karantin reiminin tətbiqindən bəhs olunur.

Məqalədə deyilir ki, martın 23-də keçirilən iclasda infeksiyanın yayılmaması üçün martın 24-dən aprelin 20-nə kimi ölkədə xüsusi karantin rejimi elan edilib.

Xüsusi karantin rejiminin xüsisiyyətləri barədə məqalədə vurğulanır ki, bu müddət ərzində yaşı 65 yaşdan yuxarı olan şəxslərin evdən çıxmaları qadağan edilir.

Təcili tibbi yardım, qəza-bərpa, xilasedici, yükdaşəyan avtomobillər istisna olmaqla Bakı, Sumqayıt şəhərlərinə və Abeşron rayonuna giriş-çıxış məhdudlaşdırılır, ölkə üzrə rayon və şəhərlərarası sərnişindaşıma dayandırılır.

Eyni zamanda metrodan istifadənin minimuma endirilməsi, yerüstü nəqliyyatdan istifadyə üstünlük verilməsi tövsiyə edilir.

10 nəfərdən çox şəxsin bir yerə cəmləşməsi və s. qadağan edilir.

Məqalədə deyilir ki, xüsusi karantin rejimi tələblərinin icrasına nəzarət Daxili İşlər Nazriliyinə həvalə edilir.