Media icmalı – 09.09.2023

Ölkədə məcburi köçkünlərin hazırki vəziyyəti, Abşeron sakinlərindən götürülən silahlar, Ceyhun Bayramovun Qarabağda olan hazırki vəziyyətlə bağlı verdiyi açıqlama, Samvel Şahramanyan separatçı “DQR”-in yeni “prezidenti” olması, Azərbaycan İran münasibətləri bu gün (09.09.2023) üçün əsas müzakirə olunan mövzulardan olub.

525-ci qəzet saytında yayımlanan ““Xankəndinin sakinləri azərbaycanlılar olub, ora qayıdacağımıza inanırıq” - Məcburi köçkün” sərlövhəli yazıda məcburi köçkünlərin hazırki vəziyyəti haqqında danışılıb. Müəllifin sözlərinə görə Xankəndi sakinləri öz evlərinə qayıdacaqlarına inanırlar. Bu haqda müəllif Xankəndidən məcburi köçkün düşmüş Xatirə Vəliyeva ilə danışıb. Xatirə Vəliyeva müharibədən öncə çox yaxşı şəraitdə yaşadıqlarını bildirib.

“Münaqişədən öncə oradakı əhalimizin yaşayış səviyyəsi və təhsili yüksək səviyyədə olub. Ermənilər tərəfindən təzyiqlərə baxmayaraq bizim evlərimizi tərk etmək, şəhərdən köçmək istəyimiz olmayıb. Məcburən Xankəndinin ətraf rayonlarına köç edib və geri dönmək ümidi ilə 3-4 dəfə məcburi köçkün həyatı yaşamışıq”.- Xatirə Vəliyeva

Müəllif qeyd edib ki, hazırda 16 mindən çox Xankəndi sakini Azərbaycanın 41 rayonunda məskunlaşıb və hər an doğma yurdlarına qayıtmağa hazırdır.

“Xankəndinin azərbaycanlı əhalisi bu gün öz yurdlarına qayıtmağa hazırdır. Biz hər zaman Xankəndinə qayıdacağımıza inanırıq”.

“Abşeron sakinlərindən tapança və “Kalaşnikov” avtomatı götürülüb” sərlövhəli yazıda proflaktik yoxlanışlar zamanı mövcud olan qanun pozuntuları aşkarlarınıb. Müəllifin sözlərinə görə əvvəllər dəfələrlə məhkum olunmuş - Nizami İsgəndərovdan 1 ədəd “Naqan” tipli tapança 3 ədəd patron, Asif Astanovdan 1 ədəd “Kalaşnikov” markalı avtomat, 1 ədəd daraq, 27 ədəd patron, Azad Qənbərovdan 1 ədəd tapança, 3 ədəd patron, Davud Rəhimov və Pərviz Əliağayevdən isə 3 kiloqrama yaxın heroin, həmçinin metamfetamin aşkar edilib. Müəllif qeyd edib ki, Abşeron rayonunda oğurluqlar və müxtəlif növ cinayət törətdiklərinə görə axtarışda olan 8, “isti izlərlə” cinayətin açılması üzrə 14, narkotiklə əlaqəli cinayətlərə görə 19 nəfər saxlanılıb. Tədbirlər zamanı qanunsuz küçə ticarəti, avaralıq və dilənçiliklə bağlı 31, xırda xuliqanlığa və xırda talamaya görə 58 fakt aşkarlanıb, mülki axtarışda olan 25 nəfər tapılaraq aidiyyəti üzrə təhvil verilib.

Trend.az saytında yayımlanan “Qarabağda qondarma rejimin “prezident seçkiləri” adı altında apardığı qanunsuz fəaliyyət bölgədə normallaşma səylərinə ciddi zərbə vurur - Ceyhun Bayramov” sərlövhəli yazıda Ceyhun Bayramovun verdiyi açıqlama haqqında yazılıb. Müəllifin sözlərinə görə Ceyhun Bayramov ABŞ dövlət katibinin Avropa və Avrasiya məsələləri üzrə köməkçisi vəzifəsini icra edən Yuri Kim ilə telefon danışığı zamanı bildirib. Müəllif qeyd edib ki, Erməni silahlı qüvvələrinin Azərbaycanın Qarabağ bölgəsindən qeyd-şərtsiz və tamamilə çıxarılması, qondarma rejimin buraxılmasının zəruri olduğu nazir tərəfindən vurğulanıb.

Anews.az saytında yayımlanan “Azərbaycan ilə İran arasında hərbi sahədə əməkdaşlıq məsələləri müzakirə olunub” sərlövhəli yazıda Azərbaycan – İran hərbi əməkdaşlığı haqqında yazılıb. Müəllifin sözlərinə görə sentyabrın 9-da Azərbaycan Respublikasının müdafiə nazirinin müavini - Baş direktor cənab Aqil Qurbanov ölkəmizdə səfərdə olan general-mayor Məhəmməd Əhədinin rəhbərlik etdiyi İran İslam Respublikası Silahlı Qüvvələrinin nümayəndə heyəti ilə görüşüb. Müəllif əlavə olaraq qeyd edib ki, İclasda Azərbaycan ilə İran arasında hərbi sahədə əməkdaşlığın genişləndirilməsi, hər iki ölkənin hərbi nümayəndələrinin qarşılıqlı səfərlərinin təşkili və digər məsələlərə dair ətraflı fikir mübadiləsi aparılıb.

Sosial media

MeydanTV

Rusiya XİN-i  Ermənistanın “qeyri-dost addımlarına” etirazını bildirib. – Müəllifin sözlərinə görə Ermənistan səfiri Vaqarşak Arutyunyan Rusiya Xarici İşlər Nazirliyinə çağırılıb. Yerəvanın “qeyri-dost” hərəkətləri fonunda ona sərt münasibət bildirilib və etiraz notası göndərilib.

İvanovkada nə baş verir? – İsmayıllı rayonunun İvanovka kəndində yeni sədrin təyin olunması ilə bağlı video reportaj hazırlanıb. Reportajda kənd sakinləri kolxozun vəzifəsindən azad edilməsi və işlərinin əllərindən alınması ilə bağlı etiraz ediblər. Sakinlərin sözlərinə görə onlar kolxozu yenidən seçmək istəsələr də buna imkan verilməyib. Onların sözlərinə görə hazırda maddi cəhətdən ciddi sıxıntılar çəkirlər.

Azadlıqradiosu

Azərbaycana gələn turistlər ən çox nədən şikayətçidir? – Video materialda turistlərin Bakıda narazı qaldığı xidmətlər haqqında danışılıb. Müəllifin sözlərinə görə bu il ölkəyə 325 min 470 nəfər turist gəlib. Onlardan 40 faizi sərnişin daşıma xidmətlərindən narazı qalıb.  Bundan başqa onların 20.3 faizi isə ictimai iaşə xidmətlərindən narazılığını bildirib. Taksi və bələdçi xidmətlərindən də narazı qalınıb.

Müsavat, REAL, AXCP də qeydiyyata alındı – Müəllifin sözlərinə görə sentyabrın 9-da Azərbaycan Ədliyyə Nazirliyinin daha bir neçə partiyanı dövlət qeydiyyatına aldığı açıqlanıb. Əlavə olaraq qeyd olunub ki, Azərbaycanda qeydiyyatdan keçən partiyaların sayı 20-ə çatıb. Müəllifin sözlərinə görə Azərbaycan Xalq Cəbhəsi Partiyası(sədri Əli Kərimli) Müsavat ( Arif Hacılı), Respublikaçı Alternativ Partiyası ( İlqar Məmmədov), Milli Cəbhə Partiyası (Razi Nurullayev), Klassik Xalq Cəbhəsi Partiyası ( Mirmahmud Mirəloğlu) və Müasir Müsavat Partiyasıdır( Hafiz Hacıyev).