Media-monitorinq 14.03.2016

Rəsmi qəzetlər rəsmi qəbullar, görüşlər barədə yazırlar.

Artan intiharlar, əfv gözləntiləri isə müstəqil medianın aparıcı mövzusudur.

Vətəndaş öz əcəlilə ölməkdən də məhrum edilib

“Hökumətin yarıtmaz siyasəti düşmən gülləsindən təhlükəli olub”. “Azadlıq” qəzetinin bugünki sayında dərc edilən “Borca görə intihar edənlər cəbhədə həlak olanlardan çoxdur” məqaləsində müəllif Akif bu qənaəti ifadə edir.

“Hər gün yeni intihar xəbəri eşidirik, kimisi özünü yandırır, kimisi özünü asır, kimisi özünü körpüdən atır, kimisi zəhər içir və s. Hərə bir vasitə ilə həyatına son qoyur. Hər dəfə məlum olur ki, intiharların səbəbi ağır sosial vəziyyətdədir. Daha dərinə gedəndə məlum olur ki, intihar edənlərin böyük əksəriyyəti kredit ödəyir, yüksək bank faizlərinin yükü altında əzilir”.

Daha sonra müəllif bu mövzuya dəfələrlə müraciət edildiyini və bu intiharların hökumət üçün həyəcan siqnalı olduğunun anladıldığını vurğulayır. Bu intiharları aradan qaldırmaq üçün dollarla krediti olanlara güzəşt edilməsi, fazilərin azaldılması kimi təkliflərin hökumətə dəfələrlə təklif olunduğu deyilir.

“Məsələ burasındadır ki, bu vətəndaşların ağır şəraiti təbii fəalakətlə bağlı deyil, hökumətin acgözlüyünün nəticəsidir, həm də ölkədəki bankların böyük əksəriyyətinin ən yüksək vəzifədə əyləşənlərə məxsus olmasıdır”. 

Müəllifə görə, araşdırma aparılsa, hər ay intihar edənlərin sayının cəbhə bölgəsində həlak olnaların sayından çox olduğu aşkara çıxacaq. “Bəli, erməni gülləsindən ölənlərin sayı hökumətin “kredit gülləsi”ndən ölənlərin sayından azdır. Fakt budur ki, hökumətin biganəliyi, məsuliyyətsizliyi, səriştəsizliyi, korrupsionerliyi üzündən hər gün 2-3 nəfər həyatına qəsd edir”.

Müəllif neft ölkəsində vətəndaşların zəruri ehtiyaclarını ödəyə bilmədiyinə görə intihar etməsini “ölkədə heç bir sabitliyin olmaması” adlandırır.

“Hökumət vətəndaşı öz əcəlilə ölməkdən də məhrum edib. Bəli, hökumətin siyasəti vətəndaşı yaşatmağa yox, öldürməyə xidmət edir. “Biz “qara məktub”u cəbhə bölgəsindən yox. cəbhədən kənar bölgələrdən alırıq”, deyə müəllif son olaraq bildirir.

Gözlənilən əfv ümidləri doğruldacaq, ya yox?

“Yeni Müsavat” qəzeti Novruz bayramı ərəfəsində gözlənilən növbəti əfv fərmanı öncəsi ictimaiyyətin diqqət mərkəzində olan siyasi məhbusların əfvi məsələsilə bağlı Əfv Komissiyası üzvlərindən və hüquq müdafiəçilərindən münasibət öyrənir.

Müəllif Cavanşir Abbaslı həbsdə qalan NİDA-çılar, Hilal Məmmədov, REAL hərəkatının sədri İlqar Məmmədov, Tofiq Yaqublu əfv ərizəsi yazmasalar da, keçmiş səhiyyə naziri Əli İnsanov və Nemət Pənahlının azad olunmaq şanslarının böyük olduğunu bildirir.

“Kimin azad edilib edilməyəcəyini demək düzgün olmazdı və komissiyanın üzvü kimi etikadan kənar olardı”. Bunu komissiya üzvü Əliməmməd Nuriyev bildirir. Həm də siyasi məhbuslarla konkret olaraq deyir: “Komissiya müraciətləri araşdırarkən hər bir məhbus barəsində tövsiyə xarakterli qərar verib. Amma kimin azadlığa buraxılacağı yenə də prezdientin səlahiyyətindədir”.

Hüquq müdafiəçisi Mirvari Qəhrəmanlıya görə, əfv prosesinin ləngiməsi və irəliləməsində maraqlı olan qurumlar var. “Bu proses təkcə Azərbaycanla tənzimlənmir. Sadəcə Əfv Komissiyası siyahısını hazırlayır. Daxil olduğumuz həftədə nələrin baş verəcəyini görəcəyik. Müsbət əfv gözləyirik. Amma siyasi manevrlər də ola bilər. Burada maddi və mənəvi maraqlar da gözləniləndir. Bu həftə ölkədaxili və xaricdəın təzyiqlər olmasa, düşünürəm ki, hər kəsin istədiyi əfv olacaq. Amma hər saatın bir hökmü var. Ümid edirəm ki, martın 19-na arzuladığımız əfvi görəcəyik.”