Media-Monitorinq 22.01.16

Ölkədəki bahalaşma və ondan çıxış yolları, idaerəetmə sistemindəki qanunsuzlqar ölkə mediasının aparıcı mövzularıdır.  

Rəsmi qəzetlər ölkədə yaşanan böhranla bağlı hər hansı yazı dərc etməyiblər, dövlət başçısı İlham Əliyevin Davos səfəri və görüşləri bu qəzetlərin əsas mövzusudur.

“Azadlıq” qəzeti Rusiya banklarından birinə isnadən dolların 2 manata qədər yüksələcəyini yazır. “Vəziyyət çox ağırdır, amma hökumətin böhrandan çıxmaq üçün davranışlarını görmürük”, - iqtisadçı Nemət Əliyev bu proqnoza münasibətini bildirib.

Ölkədə bir-birini təkrarlayan rəsmi qurumların fəaliyyətini qəzet  “lazımsız qurumlar vasitəsilə milyardların mənimsənilməsi” kimi dəyərləndirir.

  Hesablama Palatası bəzi rayonlarda maliyyə mənimsəmələrilə bağlı hesabat hazırlayıb, icra başçıları PA-ya çağırılıblar.

Emin Millinin qaynının məhkəmə prosesində şahidlərin ziddiyyətli ifadələrinə vəkil Adil İsmayılov “ifadələr ziddiyyətlidir, bunların araşdırılması lazımdır” vəsatətini verib, həbsilə bağlı təhlükəsizlik kameralarına baxış məsələsinə isə DİN “texniki səbəblərdən mümkün olmadığı” cavabını verib.

“Ekspress”  “Ümid edirəm ki, gələn il neftin qiyməti 60-70 dollar olacaq” deyə İlham Əliyevin Davosda səsləndirdiyi bəyanatı diqqətə çəkir.

“Ölkənin ehtiyatları vardır, amma onlara toxunulmasa yaxşıdır”, ekspert Oqtay Haqverdiyev indiki situasiyada hökumətin ehtiyatlara necə davranış sərgiləməli olduğunu xatırladıb.

“Yenə də möcüzə gözləyirik?”, - “Novoe Vremya”  neft ölkələri rəhbərlərinin yüksək qiymətli neft olacağı ilə bağlı ümidlərinin əsassızlığını xatırladır.

“Bizim Yol”  İlham Əliyevin Davosda mühüm bəyanatlar verməsini xüsusi vurğulayır.

“Ölkənin bütün iqtisadi subyektlərinin borcu 20 milyard dollara yaxındır, aylıq valyuta tələbi isə 2 milyarddan az deyil”, - ekspert Rövşən Ağayev mövcud iqtisadi durumu anladır.

“Gəncə Dövlət Universiteti bir ildə 7 dəfə təmir edilib” araşdırma yazısında dövlət maliyyə vəsaitlərinin mənimsənilməsi haqda  ətraflı məlumat verilir.

“İslahatların nəticələri ilə bağlı ümidli deyiləm, böhranı yaradan kadrların həm də böhrandan çıxış yolu tapacaqları tezisi inandırıcı görünmür”, - deputat Fazil Mustafa rəsmi Bakının xalqı böhrandan çxara biləcəyinə inanmadığını söyləyib.

“Keçmiş MTN şefi Eldar Mahmudovun Avropadakı əmlakları satışa çıxarılır”. Bunu “Yeni Müsavat”  yazır.

Bundan əlavə, Birləşmiş Ərəb Əmirliklərində Beynəlxalq Bankın keçmiş rəhbəri Cahangir Hacıyevə məxsus iki zavod da satışa qoyulub.

“Manatın məzənnəsinin aşağı enməsi Elman Rüstəmovun nə deyib-deməməsindən asılı deyil”, - ekspert Qadir İbrahimli  Mərkəzi Bankın rəhbəri Elman Rüstəmovun dolların 2 manata yüksəlməyəcəyi barədə bəyanatına münasibətini bildirib.

Eyni zamanda qəzetin gömrük liberallaşdığı halda qiymətlərin ucuzlaşmaması sorğusuna ekspertlər “manatın dəyərdən düşməsi hər zaman qiymətlərin müəyyənləşməsində mühüm rol oynayacaq” mövqeyini ifadə ediblər.