Məhkəmə ANS-i cərimə ödəməyə məcbur edəcək

Səbayel Rayon Məhkəməsi ANS teleşirkətinin Milli Televiziya və Radio Şurasına (MTRŞ) qarşı iddiasını təmin etməyib.

2015-ci il oktyabrın 5-də MTRŞ qalmaqallı verilişlərdən birinin yayımlanması zamanı reklam qanunvericiliyinin tələblərinin pozulmasına görə ANS-in cərimələnməsi barədə qərar qəbul edib. Lakin ANS bu qərara məhəl qoymayaraq qurumu məhkəməyə verib. Bu gün məhkəmə şirkətin iddiasını əsassız sayaraq MTRŞ-nin qərarını qüvvədə saxlayıb.

Media sahəsində ekspert Ələsgər Məmmədli məhkəmənin qərarını Turan-a şərh edərkən bildirib ki, son vaxtlar teleradio yayımı sahəsində qanunvericiliyə məhdudlaşdırmalar edilib. Eyni zamanda MTRŞ-nin səlahiyyətləri genişləndirilib. Görünür, MTRŞ onun inzibati rolunun nəzərə alınmasının vacibliyini göstərmək qərarına gəlib. Üstəlik MTRŞ il ərzində üç dəfə xəbərdarlıqdan sonra yayım qurumunun ləğvi barədə məsələ qaldırmaq hüququ qazanıb.

ANS rəhbərliyi və MTRŞ arasında münaqişə çoxdan yaranıb. Belə ki, 10 il öncə ANS-in yayımlanması iki həftəliyə dayandırılmışdı və kanalın lisenziyasının uzadılmasından imtina edilmişdi. Lakin beynəlxalq birliyin müdaxiləsindən və ANS rəhbərliyinin  ölkənin siyasi rəhbərliyinin “oyun qaydaları”nı qəbul etməyə razılaşmasından sonra  telekanalın yayımı bərpa edilmişdi.

Əsas tələblərdən biri şirkət rəhbərliyinə verilişlərin xarakterinə nəzarət edəcək, nəyi göstərmək olar, nəyi olmaz barədə qərar verə biləcək redaktorun gətirilməsi olub. Lakin zaman keçdikcə görünür, ANS rəhbərliyi yenidən  müstəqil redaksiya siyasəti yürütmək qərarına gəlib.

Qeyd edək ki, son üç ayda teleşirkət bir neçə dəfə ümumi məbləği 300 min manatdan çox cərimə edilib.—06D-