Məhkəmə Fikrət Fərəməzoğlunun vəsatətini təmin etməyib

Çərşənbə axşamı Bakı Ağır Cinayətlər Məhkəməsində Eldar Mikayılovun sədrliyilə Jam.az saytının redaktoru Fikrət Fərəməzoğlunun cinayət işinə mahiyyəti üzrə baxılmasına başlanılıb.

Vəkil Cavad Cavadov Turan-a bildirib ki, müdafiə tərəfi saxlanma və maddi sübutların götürülməsi barədə protokolda F.Fərəməzoğlunun imzasının ekspertizadan keçirilməsi barədə vəsatət qaldırıb. Jurnalist həmin imzanın ona məxsusluğunu inkar edir.  Həmin protokollarda guya jurnalist saxlanılan zaman götürülən pul əskinasları barədə danışılır.

Jurnalistin pul alması ilə bağlı sübutun olub-olmaması barədə sualın cavabında vəkil deyib ki, rüşvət almaq video qeydlərlə sənədləşdirilməyib. Pulun üzərində jurnalistin barmaq izlərinin olması, eləcə də digər sübutlar yoxdur.

Adətən rüşvət alınması ilə bağlı işlərdə görünməyən maddələrdən istifadə olunur, barmaq izləri bir müddət getmir və ultrabənovşəyi şüa altında görünür.  F.Fərəməzoğlunun işində bu, olmayıb.

Lakin hakim vəkilin vəsatətini təmin etməyib.

Bununla əlaqədar üç zərərçəkən F.Fərəməzoğluna qarşı mülki iddia qaldırmaq niyyətindədir. Dinləmələr dekabrın 15-dək təxirə salınıb.

Fikrət Fərəməzoğlu 2016-cı il iyunun 30-da həbs olunub, ona qarşı CM-in 182-ci maddəsi (hədələməklə rüşvət tələb etmə) ilə ittiham irəli sürülüb.

DİN-in məlumatına görə,  jurnalist sahibkardan 3000 manat rüşvət alarkən saxlanılıb. Sonradan jurnalistin barəsində ittiham sərtləşdirilib – “bir qrup şəxs tərəfindən əmlakı ələ keçirmək məqsədilə hədələmə yolu ilə rüşvət tələb etmə və ya buna bənzər əməllər törətmə”.

 Birinci ittihamla F.Fərəməzoğlunu 5 il azadlıqdan məhrumetmə cəzası gözləyirdisə, indi onu əmlakı müsadirə edilməklə 10 il həbs cəzası gözləyir.

Bəzi hüquq müdafiəçiləri Fikrət Fərəməzoğlunu siyasi məhbus kimi tanıyıblar. –06B-