Məhkəmə hərbi xidmətə aparılan NİDA-çının şikayətinə baxacaq

Bakı/01.11.17/Turan: NİDA Vətəndaş Hərəkatı İdarə Heyətinin üzvü Ülvi Həsənlinin məhkəmə nəzarəti qaydasında verdiyi şikayət Bakı Hərbi Məhkəməsində icraata götürülüb. Ü.Həsənlinin möhlət hüququ olsa da hərbi xidmətə aparılıb. Bunu vəkil Elçin Sadıqov bildirib.

Vəkillərin məhkəmə nəzarəti qaydasında verdiyi şikayətdə Ü.Həsənlinin qeyri-insani, insan ləyaqətini alçaldan rəftara və işgəncəyə məruz qaldığı iddia edilir, iddiların araşdırılması istənilir.

Şikayətə noyabrın 4-də baxılacaq.

NİDA Hərəkatı Ü.Həsənlinin oktyabrın 26-da hərbi xidmətə aparıldığı barədə məlumat yaymışdı. Orada deyilirdi ki, müayinədən keçdiyi xəstəxanada onu hərbi polis saxlayıb və hərbi hissələrdən birinə aparılıb. Hərəkat bildirirdi ki, Ü.Həsənlinin hərbi xidmətdən 2019-cu ilədək möhlət hüququ olub.

Vəkillərin deməsinə görə, o, hələlik N saylı hərbi hissələrdən birində saxlanılır və andiçməyə qədər həmin hərbi hissədə olacaq.

Əlaqəli rəsmi qurumlar Ü.Həsənlinin hərbi xidmətə aparılması və işgəncəyə məruz qalması ilə bağlı vəkilinin açıqlamasına hələ ki cavab vermirlər.-05B-