Məhkəmə jurnalisti həbsdə saxladı

Cümə günü Sabil rayon Məhkəməsində hakim Aytən Əliyevanın sədrliyi ilə jurnalist və hüquq müdafiəçisi Pərviz Həşimli barəsində həbs qətimkan tədbirinin ev dustaqlığı ilə əvəz edilməsi haqqında vəsatətə baxılıb.

Məhkəmə vəsatəti təmin etməyib, bu barədə jurnalistin vəkili Elçin Sadıqov bildirib.

Onun sözlərinə görə, Həşimlinin həbsdə saxlanılması məqsədəuyğun deyil, belə ki, onun barəsində istintaq hərəkətləri həyata keçirilmir, qətimkan tədbirinin müddəti isə fevralın 17-də başa çatır.

Jurnalistin 2013-cü il sentyabrın 17-də həbsindən sonra keçən müddət ərzində Həşimli barəsində cəmi üç istintaq hərəkəti həyata keçirilib.

İstintaqı MTN həyata keçirir. Qurum “Bizim yol” qəzetinin əməkdaşı və moderator.az saytının direktoru, eyni zamanda Siyasi Və Mülki Hüquqları Müdafiə Mərkəzinin rəhbəri olan Həşimlini 206.3.2-ci (əvvəlcədən əlbir olan bir qrup şəxs tərəfindən qaçaqmalçılıq) və 228.2.1-ci (əvvəlcədən əlbir olan bir qrup şəxs tərəfindən qanunsuz silah saxlama) maddələrlə ittiham edir.

Jurnalist ittihamları təkzib edir və onları siyasi əsaslı hesab edir. -16D-