Məhkəmə Mehman Hüseynovun şəxsiyyətini foto üzrə müəyyən edir

Bu gün Suraxanı Rayon Məhkəməsində Nəsimi rayon polisinin rəisi Musa Musayevin bloger Mehman Hüseynova qarşı iddiası üzrə hazırlıq iclası keçirilib.

Polis blogeri Nəsimi polisində ona işgəncələrin verilməsilə bağlı böhtanda ittiham edir və məsuliyyətə cəlb olunmasını tələb edir.

Qeyd edək ki, polis bir neçə ildir ki, M.Hüseynovun sənədlərini alıb və vermir. Odur ki, bu gün məhkəmə blogerin şəxsiyyətini foto üzrə müəyyən edib.

Hakim Ceyhun Qədimov M.Hüseynovdan fotodakı şəxsin onun olub-olmadığını soruşduqda bloger cavab verib ki, “bu, o deyil, hansısa yetimdir”.

Hakim vətəndaşın hansı səbəbdən bir neçə ildir ki, sənədlərini ala bilməməsilə bağlı DİN-dən açıqlama istəməyi lazım bilməyib.

Vəkil Elçın Sadıqov diqqəti Nəsimi polisində “heç zaman işgəncənin olmaması” ilə bağlı iddianın əsassız olmasına yönəldib.

Vəkil Avropa İnsan Hüquqları Məhkəməsinin 7 may 2015-ci il qərarına əsaslanıb. Belə ki, həmin qərarda blogerin qardaşı Emin Hüseynova Nəsimi rayon 22-ci polis bölməsində işgəncə verilməsi (20 iyun 2008-ci il tarixində E.Hüseynov polisdə amansızcasına döyülüb. Bundan sonra  uzun müddət beyin silkələnməsindən müalicə alıb) faktı tanınıb.

Bundan əlavə, vəkil iddiaya Suraxanı məhkəməsində baxılmasının əsassız olduğunu deyib. Çünki bloger işgəncə barədə bəyanatı Nəsimi məhkəməsinin binası  qarşısında, yəni Nəsimi rayonu ərazisində verib. 

E.Sadıqov həm də AHİM-in presedent qərarını qeyd edib ki, buna görə də fikrin ifadə edilməsi azadlığına görə cinayət məsuliyyətinə cəlb olunması yolverilməzdir.

İddiaçının vəkili Əlirza Xəlilov bunu onunla izah etməyə çalışıb ki, M.Hüseynovun videobəyanatını yayan KİV-in ünvanı  xaricdə yerləşdiyindən iddianı yaşayış yeri üzrə qaldırmaq lazımdır. 

Sonda məhkəmə işin icraata götürülməsi və M.Hüseynovun təqsirləndirilən şəxs qismində cəlb olunması barədə qərar qəbul  edib.

Mahiyyəti üzrə dinləmələr fevralın 27-i saat 9.30-a təyin edilib.

Blogerdən ölkədən çıxmamaq haqda iltizam alınıb.

Buna cavab olaraq M.Hüseynov deyib ki, sənədləri olmadığından beş ildən çoxdur ki, xaricə gedə bilmir.

Xatırladaq ki, M.Hüseynov yanvarın 9-da axşam Bakının mərkəzində oğurlanıb. Bir neçə mülki geyimli şəxs onu tutub əllərini buraraq maşına basıb və aparıblar. Növbəti gün blogerin Nəsimi polisində olduğu məlum olub. Oradan onu məhkəməyə aparıblar və məhkəmə blogeri “polisə müqavimət göstərdiyinə” görə 200 manat cərimə edib.

Məhkəmədən çıxdıqdan sonra bloger bildirib ki, onu oğurlayıblar və polislər ona işgəncə veriblər. Ondan hakimiyyət nümayəndələrinin barəsində tənqidi reportajlara son qoymaq tələb olunub.

DİN blogerin bu sözlərini təhqir kimi qiymətləndirib və bu, iddiaya səbəb olub. -03B06-