Mehman Qələndərovu anım günü

Bakı/13.05.17/Turan: Şənbə günü Bakının Xətai rayonunda yerləşən "Xəyal" mərasim zalında bloger Mehman Qələndərovu anım günü keçirilib. O, aprelin 28-də Kürdəxanı təcridxanasında müəmmalı şəraitdə dünyasını dəyişib.

Mərasimdə vətəndaş cəmiyyətinin nümayəndələri, ziyalılar, siyasi partiyaların təmsilçiləri iştirak ediblər.

Mərhumun ruhuna dualar oxunub.

Hüquq müdafiəçisi Oqtay Gülalıyev öz çıxışında qeyd edib ki, demokratik ictimaiyyət hakimiyyətin Mehman Qələndərovun ölüm faktını ört-basdır etməsinə imkan vermədi.

Vətəndaş fəallarının etirazları və KİV-də dərc edilən yazıların sayəsində məsələ genişləndi, həm də təkcə Azərbaycanda yox, bütün dünyada.

ABŞ Dövlət Departamenti və digər beynəlxalq təşkilatların nümayəndələri M.Qələndərovun ölüm işinin araşdırılmasına çağıran xüsusi bəyanatla çıxış etdilər.

"Biz Mehman Qələndərovun ölümünün səbəblərinin araşdırılması, onu həbs edənlərin və işgəncə verənlərin məsuliyyətə cəlb olunması üçün səylərimizi davam etdirəcəyik.

Mehman siyasi məhbus idi, çünki onun həbsinə vicdan məhbusları Bayram Məmmədov və Qiyas İbrahimovla həmrəyliyi səbəb olmuşdu", - O.Gülalıyev qeyd edib.

Sonda məhrumun xatirəsinə ehsan verilib.

Mehman Qələndərovun həbsindən sonra qohumları hakimiyyətin təzyiqi altında ondan imtina ediblər. Onlar M.Qələndərovun dəfnində iştirak etməyiblər, məzarını ziyarət etməyiblər və yas mərasimi keçirməyiblər.

Buna görə də vətəndaş cəmiyyətinin nümayəndələri öz vəsaitləri hesabına yas mərasimi keçiriblər və Azərbaycanda repressiyalar fonunda M.Qələndərovun xatirəsinə hörmət və həmrəylik nümayiş etdiriblər.-06D--