Mehriban Əliyeva: �İçərişəhərdə bərpa işləri barədə ictimaiyyətə öncədən məlumat verilməlidir�

Bakı/27.04.19/Turan: Aprelin 26-da Azərbaycan Respublikasının birinci vitse-prezidenti Mehriban Əliyeva "İçərişəhər" Dövlət Tarix-Memarlıq Qoruğunda görülən işlərlə tanış olub.

"İçərişəhər" Dövlət Tarix-Memarlıq Qoruğu İdarəsinin sədri Əsgər Ələkbərov görülən işlərlə bağlı ətraflı məlumat verib. Bildirib ki, aparılan təmir-bərpa işləri Qoşa Qala divarlarına heç bir ziyan vurmamaqla yanaşı, nə İçərişəhərin, nə də Qala divarlarının görünüşünə xələl gətirməyəcək və o, əvvəlki görünüşünü saxlayacaq.

"İçərişəhər bütün Azərbaycan üçün, bizim bütün vətəndaşlarımız üçün çox doğma və əziz yerdir. Bakımızın, doğma Bakımızın ürəyidir. Bu, doğrudan da çox dəyərli tarixi və mədəni abidədir. Mənim yadımdadır, xatırlayıram, bir zamanlar İçərişəhər UNESCO-nun qara siyahısına salınmışdı. Çünki burada bərpa işləri aparılmırdı. Bütün bu qanunlara zidd hərəkətlər olub. O zaman məhz prezidentin göstərişi ilə İçərişəhərdə bir çox işlər, bərpa, yenidənqurma işləri aparıldı. Sakinlərin, sahibkarların məramları nəzərə alınaraq İçərişəhərin hər binasına, hər bir daşına dövlət tərəfindən böyük diqqətlə yanaşıldı. Təbii ki, Qala divarının heç bir daşına da ziyan vurmaq olmaz və heç zaman vurulmayacaq", - M.Əliyeva bildirib.

O, Qala divarlarının dağıdılması barədə sosial şəbəkələrdə yayılan məlumatları yalan adlandırıb.

İ.Əliyeva qeyd edib ki, yeni heç bir inşaat yoxdur. Buradakı tarixi və mədəni abidələrə heç bir təhlükə yoxdur. Əksinə, bütün bu addımlar onların qorunmasına yönəlib.

O qeyd edib ki, burada yeni aşkar olunmuş tarixi abidə - hamam bərpa olunur.

M.Əliyeva deyib ki, bütün bərpa işləri tarixi ənənələri saxlamaqla aparılmalıdır.

Gələcəkdə belə hallarla üzləşməmək üçün biz ictimaiyyətə dolğun, geniş informasiya verilməlidir. "Hətta İçərişəhərdə hansısa bir bərpa, təmir işinin aparılması nəzərdə tutulubsa bu işləri başlamamışdan əvvəl ictimaiyyətə geniş şəkildə məlumat verməliyik", - M.Əliyeva vurğulayıb.-06D-