Uruqvay Azərbaycanın ərazi bütövlüyünə hörmətlə yanaşır və Dağlıq Qarabağın müstəqilliyini tanımır

Bakı/26.04.19/Turan: Aprelin 26-da Azərbaycanın Uruqvayda akkreditə olunmuş səfiri Rəşad Aslanov aprelin 26-da Uruqvay XİN rəhbərinin vəzifəsini icra edən Ariel Berqamino ilə görüşüb.

Görüşdə əsas məqsəd ikitərəfli gündəlikdə duran bir sıra məsələlərin müzakirəsi, o cümlədən Azərbaycanın işğal olunmuş ərazilərində yaradılmış qondarma rejimin "nümayəndəsi"nin Uruqvaya getməsi və orada ölkə rəsmiləri ilə görüşlər keçirməsi ilə bağlı mətbuatda yayılan məlumatlara aydınlıq gətirilməsi olub.

Həmçinin Bakıda keçiriləcək V Mədəniyyətlərarası Dialoq Forumunda Uruqvay xarici işlər naziri Rodolfo Nin Novoanın iştirakı məsələsi də müzakirə edilib. Məlumatı şənbə günü Azərbaycan XİN mətbuat xidməti yayıb.

Azərbaycanın işğal edilmiş ərazilərində yaradılmış marionet qurumun qondarma "xarici işlər naziri" Uruqvaya səfəri məsələsinə gəldikdə isə Uruqvay hökumətinin mövqeyinin fundamental və dəyişilməz olduğu XİN rəsmisi tərəfindən vurğulanıb. Bəyan edilib ki, Uruqvay beynəlxalq hüququn aliliyinə və dövlətlərin ərazi bütövlüyünə hörmətlə yanaşır və Dağlıq Qarabağın müstəqilliyini tanımır. Münaqişənin sülh yolu ilə həll edilməli olduğu qeyd edilərək, Uruqvayın ATƏT-in Minsk Qrupunun səylərini və BMT Təhlükəsizlik Şurasının müvafiq qətnamələrini dəstəklədiyi vurğulanıb.

Görüşlə bağlı Uruqvay Xarici İşlər Nazirliyi məlumat yayıb.

Azərbaycan səfiri həmçinin Uruqvay Senatının sədri Luisa Topolanski ilə görüşüb. Görüş zamanı L.Topolanski qeyd edib ki, hər hansı qondarma qurumun nümayəndəsi ilə deyil, Uruqvaydakı erməni icması ilə görüşüb.

Uruqvay səfir ilə görüşün yekunları ilə bağlı press-reliz yayıb. Sənəddə qeyd olunur ki, Baş Assambleya və Senat bu ölkə XİN-in beynəlxalq hüququn aliliyinə və dövlətlərin ərazi bütövlüyünə hörmətlə yanaşdığına dair mövqeyini bir daha bəyan edir və Dağlıq Qarabağın müstəqilliyini tanımır.-06D-