Mətbuat icmalı-21.02.13

Qəzetlər baş məqalələrini müxtəlif mövzulara həsr ediblər. Rəsmi və iqtidaryönlü qəzetlərdə hökumətin tərifi, prezidentin müsbət fəaliyyəti, müxalifətyönlü və müstəqil qəzetlər isə cəmiyyətdə və hökumətin fəaliyyətindəki problemləri  baş məqalə yerində dərc ediblər. Qəzetlər diqqəti daha çox Elşad Abdullayevin yaydığı yeni videoya, Gülər Əhmədova, El Hərəkatı, Əkrəm Əylisli mövzularına diqqət çəkiblər. Bütün qəzetlər Xocalı soyqırımı ilə bağlı məlumatlar və məqalələr dərc ediblər. 

“Bizim yol” 

“Məmurların “qudurğan” uşaqları Bakıda atışdı” məqaləsində “Tonqal” restoranında hakimiyyətdə təmsil olunan generalın qardaşı uşaqlarının dava saldığı bildirilir. Dava sonra silahlı qarşıdurmaya çevrilib. Ətrafdakı sakinlər polis çağırıb və polis generala görə hadisəyə nüfuz etməyib. Qəzet silahlı atışma zamanı ölən və yaralananların olub-olmaması barədə yazmır. 

Azərbaycanın İrandakı səfiri Cavanşir Axundov bildirib ki, Azərbaycanın İranın Məşhəd, Gilan və Mazandaran vilayətlərində konsulluq açması gündəlikdədir.     

Penitensiar Xidmətin rəisi Mədət Quliyev bildirib ki, Azərbaycan həbsxanalarında 200-dək iranlı məhbus var. 

İş adamları qəzetə bildiriblər ki, rüşvətlə yüklənən Azərbaycan malları bazarda rəqabətə tab gətirmir. Belə ki, ölkədən çıxarılan hər tıra 7000 dollardan başlayan rüşvət var. Beləliklə, Azərbaycan kənd təsərrüfatı məhsulları Rusiya bazarında rəqabətə dözmür. Moldova məhsulları Ukrayna ərazisi ilə keçsə də Azərbaycan məhsullarından 40 faiz ucuz satılır. Azərbaycan məhsulları həmçinin Türkiyə, İspaniya və İran məhsulları ilə də rəqabətə dözmür. 

“Yeni Müsavat” 

Sabiq deputat, hazırda həbsdə olan Gülər Əhmədovanın evində axtarış aparılıb.

“Yeni Müsavat” qəzetinin baş redaktoru qəzetin əməkdaşı Tofiq Yaqublunun həbsi ilə bağlı görüş üçün baş prokurora müraciət edib. Baş prokuror baş redaktorun müraciətinə cavab vermir. 

Prezident Administrasiyasının rəhbəri Ramiz Mehdiyev işə çıxıb. O, bir həftə məzuniyyətdə olduğu müddətdə Almaniyada müalicə və müayinə olunub, işgüzar görüşlər keçirib. Bu barədə qəzetə adının çəkilməsini istəməyən mənbə bildirib. 

QHT-lər deputatların rəhbərlik etdiyi QHT-lərə qrant ayrılmaması üçün prezident yanında Qeyri-Hökumət Təşkilatlarına Dövlət Dəstəyi Şurasının sədrinə müraciət edəcək. 

Vladimir Putinin yanında keçirilən müşavirədə Azərbaycan və erməni milli muxtariyyətlərinin rəhbərləri Söyün Sadıqov və Ara Abramyan hökumətləri üçün nümunə göstərilib. “Onlar qısa müddətdə hər şeyi ediblər ki, Rusiyada yaşayan ermənilərlə azərbaycanlılar arasında qırğın olmasın”. Söyün Sadıqov Rusiyada yaradılan azərbaycanlı milyarderlər klubunun üzvüdür və Azərbaycan  rəsmiləri tərəfindən sərt tənqid olunur. 

Göygöl rayon İcra Hakimiyyətinin başçısı Arif Seyidov qohumlarının döydüyü rayon sakini Toğrul İsmayılova xəstəxanada baş çəkib.  Qəzet rayon icra başçısının dözülməz fəaliyyətini əks etdirən “Bəylər Əyyubovun adamı Göygöldə terror əsdirir” adlı məqalə dərc edib. 

Sədərək gömrük-keçid məntəqəsinin keçmiş rəisi “Laba” ləqəbli Mübariz Pənahov Naxçıvandakı obyektlərini sökdürdüklərini təsdiq edib. Qəzetlər onun obyektlərinin Naxçıvan Ali Məclisinin sədri Vasif Talıbovun sökdürdüyün yazır. “Qoy sökdürsünlər, bəlkə gözləri doydu”, - o qeyd edib. 

Dövlət Neft Fondu qızıl alışından ziyana düşüb. Ekspert Vüqar Bayramlı hesab edir ki, bu,  dünya bazarında qızılın qiymətinin düşməsi ilə bağlıdır. 

Eldar Namazov El Hərəkatının martda elan ediləcəyini bildirib. Onun sözlərinə görə, Rüstəm İbrahimbəyov yaxın vaxtlarda Bakıya dönəcək. 

Kənd təsərrüfatı naziri İsmət Abbasova qarşı ifşa xarakterli kampaniya başlanacaq. Onun yerinə Sahibkarlığa Kömək Milli Fondunun icraçı direktoru Şirzad Abdullayevi gətirmək istəyirlər. “Bu işdə “əsas oyunçu”  iqtisadi inkişaf naziri Şahin Mustafayevdir”, qəzet yazır. 

İçərişəhərdə siqaret qadağasına məhəl qoyan yoxdur. Bir neçə kafe istisna olmaqla, qoruq ərazisində siqaret çəkmək qadağan olunub. 

“Azadlıq” 

Qəzet yazır ki, hakimiyyət tələbələrin boykotundan təşvişə düşüb. Bir qrup tələbə  Facebook-da “27 fevral-Azərbaycan tələbələrinin boykot günü” kampaniyası təşkil edib. Aksiyaya  20 min tələbə dəvət olunub, hələlik onlarda 2 200 nəfər qoşulub. Həmin gün tələbələr dərsə getməyəcək. 

Qəzet “Avropa kasıba necə baxır, Azərbaycan necə?” adlı məqalədə sürətlə inkişaf edən Azərbaycanda pensiyaçıların məvacibinin çox aşağı olduğu bildirilir. Məqalədə Avropa Birliyi ölkələrində pensiyalarla Azərbaycanda pensiya təminatı müqayisə edilir. “Azərbaycanda pensiyaçıların aldığı məvacib onların ölkə daxilində belə istirahətinə imkan vermir”.    

Dərbənddə Azərbaycanın nəqliyyat naziri Ziya Məmmədova məxsus olduğu deyilən iki otel, bir istirahət mərkəzi və daha bir neçə obyekt söküləcək. Belə ki, yerli sakin qəzetə deyib ki, sökülən obyektlərin arasında Rıbzavod küçəsi, 54-də yerləşən “Qıstinnıy dvor”, Krasnaya Zarya küçəsi, 13-də yerləşən “Freqat” otelləri də var.  Bundan başqa Xəzərin sahilindəki “Çayka” istirahət mərkəzi satınalmasında baş verən qanunsuzluqlara görə fəaliyyəti dayandırılıb. 

“Binə” Ticarət Mərkəzinin sahibkarlarının qaldırdığı tələblər havadan asılı qalıb. Əksinə sahibkarların etirazından sonra icarə haqları qaldırılıb. 

“Ekspress” 

Bakı Dövlət Universitetində tələbələrin təqaüdlərinin verilməsində ləngimə yaranıb. Universitetin mətbuat xidməti gecikmənin təqaüdlərin verilməsində yeni sistemin tətbiqi ilə bağlı olduğunu deyib.

Tələbə Qəbulu üzrə Dövlət Komissiyası 5 dərsliyi yararsız sayıb. 1-ci siniflər üzrə Azərbaycan dili, riyaziyyat, 3-cü sinif üzrə Azərbaycan dili, riyaziyyat və həyat bilgisi dərslikləri yararsız sayılıb. 

“Yeni Azərbaycan”

Qəzet siyasi müxalifətin tənqidinə həsr etdiyi “İsa Qəmbərin yığdığı 5 qəpiklər niyə oğlunun cəriməsini ödəmir?”, “Elçibəyin qardaşı oğlu Əli Kərimlini ifşa etdi...”, “Dağıdıcı müxalifət antimilli mahiyyəti və məqsədi “Daş yuxular”da bir daha aydın görünür” adlı məqalələr dərc edib.

“Zerkalo” 

Hüquq müdafiəçisi Mirvari Qəhrəmanlı bildirib ki, ötən il neft sektorunda 12 əməkçi ölüb. O, neft sektorunda çalışanların ağır əmək şəraitindən danışıb.