Mətbuat icmalı 22.08.15

Bugünki qəzetlərin əksəriyyəti baş məqalə yerində dollar ajiotajı və manatın növbəti devalvasiyasının qaçılmaz olması barədə yazıb, təhlillər dərc edib. Rəsmi və iqtidaryönümlü qəzetlər isə prezidentin sərəncamları və iqtisadiyyatın yüksək templə inkişafı barədə məqalələri birinci səhifələrinə çıxarıb.

Yeni Müsavat

Almaniyanın Bavariya əyalətinin Noyştad-Valdnabe inzibati mərkəzində azərbaycanlı miqrantların yaşadığı sığınacaqda yanğın baş verib. Zərərçəkən olmayıb.

Qəzet baş nazirin müavini “Abid Şərifovun şirkətində müdhiş fırıldaq: həbslər var” başlıqlı yazısında qeyd edir ki, “EVRASCON” ASC-nin fəhlələrinin Qazaxıstan ərazisində işləməsi üçün icazə vərəqəsinin alınmasına ayrılan pul mənimsənilib. Artıq, Almatı Vilayət Məhkəməsi azərbaycanlıları həbs etməyə başlayıb. Qazaxıstanda tikinti işlərində işləmək üçün şirkət Azərbaycandan 180 fəhlə aparıb. Onların əmək haqları da verilmir.

Beynəlxalq Bankda kredit öhdəliyini ödəyə bilmədiyinə görə barəsində həbs qətimkan tədbiri seçilmiş biznesmenlərin həbs müddəti uzadılıb.

Bakının Zığ qəsəbəsində əhali normal içməli su ilə təmin edilmədiyindən etiraz aksiyası keçirib.

Qəzet “Xədicə İsmayıl istintaqa ifadəsində nə deyib...” başlığı altında istintaq materiallarını dərc edib. Bu sayda Xədicə İsmayılın Tural Mustafayevlə münasibətlərindən bəhs edilir.

Bizim Yol

Qazaxıstanda 600 azərbaycanlının yükünə həbs qoyulub. Çindən gətirilən yüklər Aktau dəniz limaında saxlanılıb. Buna səbəb kimi qaçaqmalçılıqla bağlı qaldırılan cinayət işinin istintaqı göstərilir. Yüklərin daşınmasını həyata keçirən “Kapital 2” şirkətinin rəhbəri Novruz Barxudarov deyib ki, yüklərin saxlanmasının əsl səbəbi  Qazaxıstan məmurlarının yüklərə “krışalıq” edərək haqq almaq məqsədindən irəli gəlir. “Biz 2000-ci ildən Qazaxıstan vasitəsi ilə yük daşıyırıq və hər il orta hesabla 6 milyon dollar məbləğində vergi ödəyirik”, deyə o qeyd edib.

Milli Məclisin hüquq siyasəti və dövlət quruculuğu komitəsinin sədri Əli Hüseynov hesab edir ki, məhkəmə hüquq müdafiəçiləri Leyla və Arif Yunuslar barədə çox humanist qərar qəbul edib. Komitə sədri Azərbaycanın Avropa Şurası qarşısında heç bir öhdəliyinin olmadığını bildirib. Halbuki, ölkə Avropa Şurasına üzv qəbul olunarkən çoxsaylı, o cümlədən ədalətli məhkəmə sistemi ilə bağlı öhdəliklər götürüb.

Milli Məclisin deputatı Vahid Əhmədov manatın devalvasiyasının qaçılmaz olduğunu bildirib. “Neftin kəskin ucuzlaşması Azərbaycanda ciddi problemlər yaradacaq”, deyə o qeyd edib. Deputat hesab edir ki, Mərkəzi Bank yumşaq devalvasiyaya getməlidir ki, yenə şok-tepariya yaranmasın. Xatırladaq ki, bu ilin fevralında bir gündə manat 34 faiz devalvasiyaya uğrayıb. Qəzet digər eksperlərin şərhlərini də dərc edib.

“Azərabaycanda dollar ajiotajı başladı” məqaləsində deyilir ki, Mərkəzi Bank kommersiya banklarına vəziyyəti düzəltmək üçün tapşırıqlar verib. Amma əhali də kütləvi şəkildə valyutadəyişmə məntəqələrinə üz tutur.

Azadlıq 

 “Əsrə bərabər 15 il” məqaləsində Azərbaycanın demokratik seçki yolu ilə seçilmiş ilk prezidenti Əbülfəz Elçibəyin fəaliyyətindən nəhs edilir. Elçibəyin vəfatından 15 il keçir.

Qəzet həbsdə olan jurnalist Seymur Həzinin “Qan gölünün balıqçısı” məqaləsini çap edib. Məqalə 1990-cı iollərdə Azərbayhcanda hakimiyyət uğrunda mübarizə və Dağlıq Qarbağ münaqişəsində siyasi qüvvələrin rolundan bəhs edir.

Milli Şuranın üzvü Gültəkin Hacıbəyli bildirib ki, beynəlxalq təşkilatların Azərbaycanla bağlı son sərt tənqidi bəyanatlarının nəticələri ölkə üçün ağır olacaq. Onun fikrincə, Azərbaycan hakimiyyətinin repressiv siyasəti qərb dövlətləri ilə qarşıdurmanı dərinləşdirir.

 “Alıcılar qənaətcil maşın axtarır” məqaləsində ölkənin avtomobil bazarındakı durum təhlil edilir. Alıcılar ən çox Mersedess, sonra BMW, Opel və VAZ şirkətinin avtomobilini alır.

Gürcüstandan Azərbaycana avtomobil ixracı 5 dəfə  azalıb. Bu ilin yanvar-iyul aylarında Gürcüstandan Azərbaycana 2 519 minik avtomobili ixrac olunub. Ötən ilin eyni dövründə isə ixrac olunan avtomobillərin sayı 10 337 olub.

Ekspress

Fələstin Ermənistanda səfirlik açır.

Britaniyanın Azərbaycandakı səfiri İrfan Siddiq iki ölkə arasında münasibətlərin əla səviyyədə olduğunu bildirib. “Birləşmiş Krallıq Azərbaycanın cənub bölgəsinin inkişafını dəstəkləməkdə maraqlıdır”, deyə o qeyd edib.

 “Dollar ajiotajı yenə başladı” məqaləsində yumşaq devalvasiya təkliflərinin səsləndirildiyini bildirir.

Azərbaycanın keçmiş baş naziri, Milli Məclisin deputatı Əli Məsimli müsahibəsində bildirib ki, rublun manata təzyiqi güclənib. Müsahibədə neftin ucuzlaşması, Çindən idxalın bazara təsiri və vəziyyətdən çıxış yollarından bəhs edilir.

Azərbaycanda sağlamlıq imkanları məhdud olan 65 482 uşaq var. Əlil uşaqlar cəmi 67 manat müavinət alır.