Mətbuat İcmalı-25.08.12

Rəsmi və iqtidaryönlü qəzetlər birinci səhifələrini hökumətin uğurlu fəaliyyətinə həsr ediblər. Bu qəzetlər birinci ledinin və şeyxülislam Allahşükür Paşazadənin doğum günü münasibətilə onların haqqında çoxsaylı yazılara səhifələrində yer ayırıblar. Qəzetlər həmçinin çoxsaylı başsağlıqları dərc ediblər.

Müstəqil və müxalifətyönlü qəzetlər Azərbaycan-İran münasibətləri, İranın Xəzərin ekologiyası ilə bağlı iddiaları, Azərbaycan iqtidarının Macarıstanda daşınmaz mülkiyyət alması, Paşayevlər ailəsinin Naxçıvan rəhbərliyi ilə münasibətləri, Azərbaycanın ən varlı regionları və başqa mövzularda məqalələri baş yazı yerində dərc edib.

Çoxsaylı qəzetlər səhifələrində eks-prezident Əbülfəz Elçibəyin zəhərlənmə faktı ilə bağlı qaldırılan cinayət işi barədə yazılar, təhlillər dərc ediblər. 

“Ayna-Zerkalo” 

Hərbi hissələrdə əsgər ölümləri ilə bağlı məqalədə deyilir ki, Müdafiə Nazirliyinin məlumatları ilə tibbi ensiklopediyanın izahları üst-üstə düşmür. Qəzet nazirliyin mətbuat xidmətinin əsgər Tayfur Bəyovun ölümü ilə bağlı yaydığı məlumatı araşdırıb.   

Politoloq Zərdüşt Əlizadə “Qarabağ uğrunda yeni müharibə” analitik yazısı ilə çıxış edib. Müəllif 18 il davam edən “nə hərb, nə müharibə” vəziyyəti, daxil siyasi oyunçuların daim Qarabağ kartından öz xeyirlərinə istifadə etməsi, mövcud duruma Rusiya, İran, Amerika, Türkiyə Avropanın baxışlarına nəzər salıb. 

“Ayna” qəzeti bir səhifəsini “Güney” rubrikası altında İranda yaşayan azərbaycanlılar və bu ölkədə zəlzələdən sonrakı ağır humanitar duruma həsr edib. “Yeraltı təkanlar və yerüstü sarsıntılar” məqaləsində İranda zəlzələ bölgəsindəki ağır humanitar durum təhlil edilib. 

“Exo” 

Bakı, Gəncə, Sumqayıt, Lənkəran və Bərdə Azərbaycanın ən varlı şəhərləridir. Amma ölkənin ən varlı şəhəri Bakıdır. Respublikadakı biznes obyektlərinin 90 faizi Abşeron iqtisadi regionundadır. Vergilərin də 92 faizini məhz Bakı şəhəri ödəyir.    

“Ekspress” 

Qəzet Qafqaz Müsəlmanları İdarəsinin sədri şeyxülislam Allahşükür Paşazadənin (avqustun 26-da 63 yaşı tamam olur) doğum günü ilə bağlı onunla müsahibəni dərc edib. Müsahibədə şeyxülislam sovet dönəmindəki fəaliyyətinə, Azərbaycanda dini məzhəblər arasındakı mehriban münasibətlərə nəzər salıb. 

  Əbülfəz Elçibəyin həkiminin BBC Azərbaycana müsahibəsi dərc edilib. Həkim mərhum eks-prezidentin xərçəng xəstəliyinə tutulduğunu təsdiq edib. Doktor Nurəddin Akyürek Elçibəy haqqında xoş təəssüratlarını da danışıb və xəstəliyi dövründə Azərbaycan hökumətinin, o zamankı dövlət başçısı Heydər Əliyevin və  Azərbaycanın Türkiyədəki səfirliyinin onunla maraqlanmamasından təəssüfləndiyini bildirib.      

  “Bizimkilər İrana əsasən müalicəyə gedirlər” məqaləsində İranın viza rejimini bərpa etdikdən sonra yaranan çətinliklərdən bəhs edir. Müəllif İrana getmək istəyən adamların fikirlərini də dərc edib.   “Zibillik içində çabalayan Əhmədli” adlı yazıda ərazidəki zibilliklərə nəzarətin  olmadığını, hətta rayon icra hakimiyyətlərində ekoloji duruma nəzarət edən kadrların ixtisara salındığı bildirilir. 

  “Köhnə avtomobil bazarı” məqaləsində işlənmiş avtomobil bazarında durum təhlil edilir. Köhnə avtomobillərin orta qiyməti 16 200 dollara düşüb. Ümumilikdə, iyul ayında 9 avtomobil markasının təklif üzrə payı 86,7 faiz, qalan bütün avtomobil markaları üzrə təklif isə cəmi 13,3 faiz olub. Bu ölkədə 9 avtomobil markasının populyar olmasından xəbər verir. 

  “E-ticarət və sahibkarlıq” məqaləsi elektron ticarət sahəsində ölkədəki vəziyyəti əks etdirir. Məqalədə bu sahədə qanunvericilik, İnternet portalları və problemlər təhlil edilir: “Elektron ticarət ədalətli rəqabət imkanlarını artırır”. 

“Azadlıq” 

  “Bakı meri media rəhbərlərini saymır” yazısında qəzet köşklərinin yığışdırılmasından, yeni köşklərdə isə qəzet satılmamasından danışılır. Qəzet redaktorlarının bununla bağlı Bakı meri ilə müzakirə barədə təklifinə isə hələ də cavab verilməyib. 

  “Bu iyrənc kampaniya bumeranq effekti verəcək” yazısında çoxsaylı ictimai-siyasi xadim Bakı Şəhər Prokurorluğunda eks-prezident Elçibəyin qəhərlənməsi ilə bağlı qaldırılan cinayət işinin AXCP sədri  Əli Kərimliyə qarşı yönəldiyini bildirir və iqtidarın bu hərəkətini qınayır.   

  “Hafiz Hacıyev ciddi adamdır, həm də çox ciddi!” adlı məqalədə Müasir Müsavat Partiyasının sədri Hafiz Hacıyevin vaxtilə ölkədə dövlət çevrilişinin hazırlanması, yüksək vəzifəli şəxslərin rüşvət alması, parlament seçkilərinin saxtalaşdırılması, “oliqarxların saxladığı fahişələrin bir sıra məntəqələrdə qalib gəldiyi”, iqtidardakıların öyrətməsi ilə müxalifət liderlərinə şər atması, Prezident Administrasiyasının rəhbəri Ramiz Mehdiyevin erməni əsilli adamları vəzifələrə çəkməsi barədə bəyanatlarına hüquqi qiymətin verilməsi irəli sürülür.    

  “Naxçıvanda əsgərə işgəncə verib öldürüblər” məqaləsində dörd ay hərbi xidmətdə olan  İsmayıl İbayevin valideynləri övladlarının özünü öldürməsi ilə bağlı məlumatları əsassız sayır. “Özü-özünü öldürübsə, bədənində xəsarət izləri haradandır”, - əsgərin atası Rafiq İbayev bildirib. Qəzetin dərc etdiyi şəkildə cəsəddə çoxsaylı işgəncə izlərinin olması əksini tapıb. 

  “Polisdə ölən şəxsin videogörüntüləri yayıldı” məqaləsində deyilir ki, sosial şəbəkələrdə yaylan kadrlarda polisdə ürəktutmasından ölməsi barədə məlumat yayılan Arzu Hüseynovun bədənində xəsarət izləri var.  

  “Paşayevlər Naxçıvan klanını sarsıdıb” məqaləsində deyilir ki, hakim ailə 2013-cü il prezident seçkiləri ilə bağlı bir neçə dəfə toplantı keçirib. “Fövqəladə hallar naziri Kəmaləddin Heydərov da əks qütbə  keçib. Heydərov artıq Paşayevlərə dəstək ifadə edir”. 

“Yeni Müsavat” 

  “İlham Əliyevlə Emin Ağalarova qarşı terror planı varmış” məqaləsində deyilir ki, aprelin 29-da Milli Parkda “Eurovision” mahnı müsabiqəsi ilə bağlı konsertdə dövlət başçısı və ailə üzvlərinin iştirakı gözlənilirmiş. Belə ki, Milli Təhlükəsizlik Nazirliyi və digər güc strukturları Bayıl dairəsindəki 16 mərtəbəli binanın və teleqüllənin yaxınlığındakı çoxmərtəbəli binanın damından prezidentə atəş açmalı olan snayperlər həbs olunub. İstintaq zamanı aydın olub ki, snayperlər İlham Əliyev və Emin Ağalarovun öldürülməsini nəzərdə tutan terror aktı planına cəlb olunublar. 

  İqtisadi İnkişaf naziri Şahin Mustafayev vergilər naziri Fazil Məmmədovdan prezidentə şikayət hazırlayır: “Vergi orqanlarının aramsız yoxlamalarından bezən 300-ə yaxın sahibkar iqtisadi inkişaf nazirindən kömək istəyir”.   

  “Deputatın obyektindəki qətlə görə 4 nəfər həbs olunub” məqaləsində deyilir ki, deputat Hüseynbala Mirələmov adam öldürən qardaşı oğlunu azadlığa buraxdırmağa çalışır. 

  “Damla-damla toplanan zəhər_”Jalə” məqaləsində deyilir ki, “Gilan-Holdinq” fövqəladə hallar naziri Kəmaləddin Heydərovun biznes strukturuna daxildir. “Gilan-Holdinq” bir sıra sahələrin, ocümlədən də şirə istehsalını  və satışını monopoliyaya alıb”. 

  “Azərbaycan iqtidarı Macarıstanı “alır” məqaləsində deyilir ki, Azərbaycan Macarıstan dövlət istiqrazlarını 2-3 illiyə almaq niyyətindədir və bu məqsədlə 2-3 milyard avro ayrılması nəzərdə tutulur. 

“Yeni Azərbaycan” 

Qəzet iki səhifəsini birinci ledi Mehriban Əliyevanın fəaliyyətinə həsr edib. Nəşr Pakistan qəzetində dərc edilən “Mehriban Əliyeva- humanizm rəmzi” adlı məqaləni dərc edib. Avqustun 26-da M.Əliyevanın doğum günüdür. 

“Əbülfəz Elçibəy heç vaxt Əli Kərimliyə inam və rəğbət bəsləməyib” və “İctimai Palata” indi də ordumuza qara yaxır” məqalələrində müxalifətin fəaliyyəti pislənilir: “Radikal düşərgənin bu yanaşması bir daha antimilli mövqenin ifadəsidir”.