Mətbuat İcmalı 28.02.13

İqtidar və iqtidaryönümlü qəzetlərin Gürcüstan prezidenti Mixail Saakaşvilinin Azərbaycana səfəri və görüşləri ilə bağlı məlumatları və fotoları birinci səhifələrini bəzəyir. 

Müstəqil və müxalifətyönümlü qəzetlər isə Elşad Abdullayevin Əliyevin mühafizəçisi ilə bağlı yeni videosu, Gəncə icra hakimiyyəti başçısının qardaşı ilə pul mübahisəsi, hakimiyyətdaxili çəkişmələr, Fransa parlamentində azərbaycanlıların döyülməsi, Rusiyada yaranan milyarderlər klubunun yeni fəaliyyət istiqamətləri və başqa mövzularda məqalələri baş məqalə yerində dərc edib. 

Azadlıq

Bakının 20-ci sahə massivində torpaq uçqunu baş verib. AMEA-nın Coğrafiya İnstitunun eksperti ərazinin uçqun riski altına olduğunu bildirib. “Binə Ticarət Mərkəzinə gedən yoldan başlayaraq, Bibiheybət məscidindən 20-ci sahəyədək ərazi uçqun təhlükəsindədir”. 

Eldar Namazov Gürcüstanda Rüstəm İbrahimbəyovla görüşüb. 

Tanınmış hüquqşünas Fuad Ağayev qəzetə müsahibəsində  deyib ki, hakimiyyətin indiki siyasəti ölkəni xaosa aparır. “Beynəlxalq aləmdə belə bir davranış tərzinin seçilməsi iqtidar üçün yaxşı gələcək vəd etmir”. Fuad Ağayev həmçinin sual edir: “Korrupsiya komissiyasına Ramiz Mehdiyev başçılıq edirsə, korrupsiyaya qarşı mübarizədən danışa bilərikmi?” 

Qəzet hesab edir ki, Ramiz Mehdiyevin Prezident Administrasiyasının rəhbəri qalıb-qalmayacağı barədə qərar iyulda veriləcək. İlham Əliyevin seçkidə iştirakı qətiləşsə, Prezident Administrasiyasının rəhbəri postunda Ramiz Mehdiyev qalacaq, əks təqdirdə vəzifədən uzaqlaşdırlacaq. 

Ombudsmanın nümayəndələri Kürdəxanı təcridxanasında sabiq deputata Gülər Əhmədova ilə iki dəfə görüşüb. Əhmədova saxlanma şəraitindən narazı deyil. O iki gün təcridxananın tibb-sanitar hissəsində saxlandıqdan sonra kameraya köçürülüb. Səhhətində bəzi problemlərin olduğunu bildirb. Kamerada onunla daha bir nəfər də saxlanılır. 

Qəzet “Məmur övladları harada işləyir?” yazısında nazirlər Kəmaləddin Heydərov, Ziya Məmmədov, Ramil Usubov, Səfər Əbiyev, Yavər Camalov, baş nazirin müavinləri Yaqub Eyyubov, Əli Həsənov və digərlərinin övladlarının vəzifələri və biznes fəaliyyətindən bəhs edib.   

Səbail rayon icra hakimiyyəti rayon ərazisindəki bütün biznes strukturlarına və mağazalara Novruz bayramı münasibəti ilə 20 ailəyə yardım göstərmələri barədə rəsmi məktubla müraciət edib. Qəzet belə məktubu biznes strukturlarına müdaxilə kimi qiymətləndirir. 

Qəzet “AXCP-yə qarşı hakimiyyətin yeni səlib yürüşü” məqaləsində partiya fəallarının son həbslərindən yazır. Dünən isə AXCP sədrinin mətbuat xidmətinin rəhbəri Natiq Ədilovun qardaşı və dayısı oğlu Sabirabadda saxlanıb. 

“Rail Rzayevin sirrə çevrilən istintaqı” məqaləsi Müdafiə Nazirinin müavini, Hərbi Hava Qüvvələrinin komandanı Raul Rzayevin qətlə yetirilməsinin istintaqının qapalı saxlanmasının səbəblərindən bəhs edir. “Raul Rzayevin qətlindən 4 il keçir. Bu günədək istintaq qətlin sifarişçiləri, icraçıları və istintaqın gedişi ilə bağlı ictimaiyyətə hər-hansı məlumat verməyib”. Baş Prokuror isə bu günlərdə istintaqla bağlı suallara cavab verməyi məqsədəuyğun hesab etməyib. 

“Daş yuxular” romanı çap edildikdən sonra təqiblərə məruz qalan Əkrəm Əylisli Türkiyəyə köçmək istəyir. 

Qafqaz Müsəlmanları İdarəsinin Cənub bölgəsi üzrə nümayəndəsi Hacı Qəni Axunzadə bildirib ki, Cənub bölgəsində xarici ölkəyə xidmət edən müxalif dindarlar var. 

Qəzet “Fəxri adlar doğum günü hədiyyəsinə çevrilib” məqaləsində məmurların ad günlərində dövlət başçısı tərəfindən onlara fəxri adlar və medallar verilməsini yolverilməz adlandırır. 

Yeni Müsavat 

Qəzet eks-prezident Ayaz Mütəllibovla müsahibənin sonuncu hissəsini dərc edib. Müsahibədə 1992-ci il hadisələrinə toxunulur. Ayaz Mütəllibov hesab edir ki, Azərbaycan Kollektiv Təhlükəsizlik Şurasına qoşulmalı idi. O, Rusiyada yaşadığı 20 il ərzində çoxsaylı çətinliklərlə üzləşdiyini, böyük oğlunun davamlı stresdən dünyasını dəyişib, kiçik oğlu işsizdir. Eks-prezidenti Rusiyada hətta oğurlamaq istəyiblər.  

Yeni Müsavat qəzetinin bank hesabına həbs qoyula bilər. Bunu son məhkəmə qəaraından sonra baş redaktor Rauf Arifoğlu bildirib. 

Gürcüstan parlamentinin azərbaycanlı deputatı Mahir Dərzili qəzetə müsahibəsində deyib ki, Gürcüstanda demokratiya indi bərqərar olur. “Saakaşvili iqtidarını örnək gətirən siyasətçilərə deyirəm ki, demokratiya yalnız Gürcüstanın zahirində idi”. 

AXCP və  Müsavat Partiyaları bu günlərdə mediada yayılan kölgə kabinetləri barədə məlumatları təkzib edib. 

İş adamı qəzetə deyib ki, ölkəyə bir konteyner avtomobil təkəri gətirmək üçün 13-15 min dolar tələb edilir. 

Fevralın 27-də 3 min tələbə Facebook kampaniyasına qoşularaq rüşvətə etiraz olaraq dərsə getməyib. 

Gəncənin icra hakimiyyəti başçısı Elmar Vəliyev bu şəhərdən seçilmiş deputatların Gəncəyə getməsinə qadağa qoyub. 

Qəzetin məlumatına görə, fevralın 19-da Gəncə Pedaqoji Universitetinin çoxsaylı müəllimi işdən çıxmaq üçün ərizə verib. Onların arasında 4 prorektor, həmkarlar ittifaqının sədri, dekanlar və şöbə müdirləri də var. 

Bizim Yol 

Rüstəm İbrahimbəyov Lalə Şövkətin prezidentliyə namizədliyini müdafiə edə biləcəyini deyib. O, müsahibəsində iqtidarı kəskim tənqid edib. El Hərəkatının yaxın zamanda elan ediləcəyini bildirib.

Gəncənin icra hakimiyyəti başçısı Elmar Vəliyevlə qardaşı Şahmar Vəliyev arasında borc qalmaqalı yaranıb. Şahmar Vəliyevin “Dəvəli” MMC-si Gəncədə çoxsaylı işlər görməsinə baxmayaraq, pulu ödənməyib. Bu da qardaşlar arasında mübahisə yaradıb. 

Göygöl rayon icra hakimiyyətinin başçısı Arif Seyidovun göstərişi ilə onun qaynı və köməkçisi tərəfindən döyülmüş rayon sakini Toğrul İsmayılovun işinə Gəncə şəhər Prokurorluğu baxacaq. İcra başçısı istintaqa ifadə verəcək. Toğrul İsmayılov torpaq sahəsinin özəlləşdirilməsi ilə bağlı icra başçısını müraciət edərkən icra hakimiyyətinin binasında döyülüb. 

Ekspress   

Avtobus dayanacaqları zəbt edilib. Yol Polisi və Nəqliyyat Nazirliyi birgə reydlər keçirir. 

Yaponiya Azərbaycanın Kosmik Sənayesi ilə əməkdaşlıq edəcək. Yaponiya hökumətinin və çoxsaylı şirkətlərin nümayəndələrindən ibarət heyət hazırda Azərbaycanda səfərdədir və əməkdaşlıq məsələlərini müzakirə edir. 

Yeni Azərbaycan

“Saatlı ictimaiyyəti Əli Kərimlinin sabotajını kəskin şəkildə pisləyir” məqaləsində AXCP əleyhinə insanlar danışdırılır. Məqalədə  guya Saatlıda qəbir daşlarının dağıdılmasında AXCP-nin əli olduğu irəli sürülür.