Mətbuat-Monitorinq 03.11.15

Rəsmi qəzetlər dövlət başçısı İlham Əliyevin MDB İcraiyyə Komitəsi sədrinin başçılıq etdiyi nümayəndə heyətini qəbul etməsi haqda xəbəri, parlament seçkilərinin “yüksək seçici fəallığı, şəffaf və demokratik keçməsi”nə dair məqaləni ilk səhifələrdə yerləşdiriblər.

“Azadlıq” qəzeti “MTN işi”ni, parlament seçkilərindəki saxtakarlıq və bu seçkilərə beynəlxalq münasibəti, ölkənin iqtisadi həyatı ilə bağlı gerçəklərə diqqət yetirib.

Qəzet “MTN- işi” ilə bağlı MTN-in keçmiş şefi Eldar Mahmudovla birgə komitə sədri Kərəm Həsənov və nazir Əli Abbasovun da “vurulmalı” olduğunu, amma sonradan təxirə salındığını önə çəkir.

Qəzet Azərbaycanda parlament seçkilərinin “despotik şərait”də keçdiyini yazan Qərb mediasının nəticələri “rəsmi Bakının vətəndaşların seçki yolu ilə hakimiyyət dəyişikliyinə nail olmasına inamını öldürməsi” kimi dəyərləndirdiyini qeyd edir.

Seçki müşahidəçilərinə isnadən rəsmi Bakının seçkidə seçici fəallığının 55% olması iddiasını yalanlayan qəzet bu fəallığın cəmi 10-15% arasında olduğunu yazaraq bu həddi seçkiləri boykotun baş tutması adlandırır. Bundan əlavə, qəzet seçkidəki saxtakarlıqlarla bağlı əhatəli məqalə dərc edib. Şamaxıda seçki saxtakarlığına etiraz aksiyası keçirilib, polis aksiyaya zor tətbiq edib, 5 nəfər həbs edilib.

Xəzər Hərbi Tədqiqatlar İnstitutu bu ilin 10 ayı ərzində ölkənin təhlükəsilzik və müdafiə sektorunda 64 hərbçinin dünyasını dəyişdiyini bildirir.

İnternetə alternativ “MegaNet” qlobal şəbəkəsi yaradılır, bu sistem yaradıcıları bu şəbəkədə də istifadəçini izləməyin mümkünsüz olacağını bəyan ediblər.

Azərbaycan-İran magirstralının Masallı-Astara hissəsinin tikintisi öncə nazir Ziya Məmmədova, sonra Beynəlxalq Bankın keçmiş rəhbəri Cahangir Hacıyevə məxsus “Azərinşaat”dan alınıb. Odur ki, fəhlələr 5 aydır maaşlarını ala bilmirlər.  

Qəzetin yazdığına görə, Beynəlxalq Bank yenidən strukturlaşma ilə bağlı əməkdaşlarının 3/1-ni ixtisar etməyə hazırlaşır.

“Ekspress”  ölkədə turizm sahəsində qiymətlərin yüksək olmasına “turizm var, pul yox” mövqeyini diqqət mərkəzinə çəkib.

Mərkəzi Bankın valyuta ehtiyatlarının azalması ilə manatın “üzən valyuta rejimi”nə keçidi sürətləndirəcəyini nəzərə çatdırır. Problemli kreditlərin həcminin artdığını yazan qəzet Mərkəzi Banka isnadən Beynəlxalq Bankdakı restrukturizasiyanın kredit qoyuluşlarını azaltdığını qeyd edir.

“Exo” parlament seçkilərində 2 milyondan artıq seçiçinin səsverməsini qeyd edərək AŞPA nümayəndə heyətinin seçkiləri “irəliyə doğru addım” kimi dəyərləndirdiyini bidlirir.     

Qəzet Cinayət Məcəlləsinə dəyişikliklər nəticəsində sənədsiz sürücüləri xəttə buraxan sahibkarları 8 ilə qədər həbs cəzasının gözlədyini qeyd edir.

“Novoe Vremya”  Mərkəzi Bankın aktivlərini satmağa hazırlaşmasına “Elman Rüstəmov buna da getdi...” mövqeyini ön plana çıxarıb.

“Bizim yol”  Avropa Şurasının parlament seçkilərinə “seçkilərin xalqın iradəsini ifadə etməsi” mövqeyini ilk səhifəyə yerləşdirib.

Qəzet yazır ki, nazir Samir Şərifov ipoteka ilə bağlı ilkin ödəniş və faiz dərəcələrinin azaldılacağı barədə bəyanat verib.

Qəzet Mexikoda keçirilən dövlətlərin cəmiyyətə açıqlığına görə Cənubi Qafqazdan ancaq Gürcüstan və Ermənistan vətəndaşlarla iş birliyinə görə mükafatlandırıldığını yazır.

“Yeni Müsavat” “MTN işi”, parlament seçkilərinə beynəlxalq münasibət, ölkənin iqtisadi həyatına dair mövzulara yer verib.   

Qəzet “MTN işi”ndə yeni gizli həbslərin olmasını və bu həbslərin cəmiyyətdən gizlədilməsini önə çəkib. Qəzetin yazdığına görə MTN generalı Akif Çovdarovun idarəsində təftiş aparılır.

Azərbaycanda parlament seçkilərini müşahidə edən AŞPA deputatları seçkiyə “seçkiləri azad, ədalətli və demokratik seçkilərə doğru addım saymağın mümkün olmadığı”, ölkədə siyasi, ifadə və media və sərbəst toplaşmaq azadlığı ilə bağlı vəziyyətin pis olduğu barədə rəy veriblər.

Qəzet ticarətin ən aşağı həddə olduğunu yazaraq “Şərq bazarı”nın iflasa uğradığını, Bakının mərkəzindəki biznes obyektlərinin sıradan çıxmaqda davam etdiyini nəzərə çatdırır.