Mətbuat-Monitorinq 03.12.14

Rəsmi qəzetlər dövlət başçısı İlham Əliyevin “BakuTel-2014” XX Azərbaycan Beynəlxalq Telekommunikasiya və İnformasiya Texnologiyaları sərgisi ilə tanış olması xəbərini ilk səhifələrdə yerləşdiriblər.

Bundan əlavə, bu qəzetlərdə dövlət başçısının “Rossiya-24” telekanalına müsahibəsi dərc olunub.

“Azadlıq” qəzeti ABŞ Dövlər Departamentinin insan haqlarına hörmət çağırışına rəsmi Bakının sərt və mənfi cavabını “ABŞ ilə rəsmi Bakı arasında qarşıdurma” kimi təsnif edərək manjetə çıxarıb.

Qəzet yerli mənbələrə istinadən Naxçıvanda uzun saç saxlayan oğlanların polisə aparılaraq saçlarının qırxıldığını bildirir, yerli polis isə bunu “uydurna” adlandırır.

AXCP fəalları “Yeni Müsavat” qəzetinin redaktoru Rauf Arifoğlunun qəzeti məhkəməyə vermək hazırlığına “özünü insan kimi bitirməsi” şərhini veriblər.

Batumdakı tədbirdə Azərbaycan tərəfin erməniprəstlikdə ittiham etdiyi “People İn Need” təmsilçiləri ittihamı rədd edərək bunu “Azərbaycanda diqqəti insan hüquqları sahəsindəki ağır durumdan yayındırmaq metodu” adlandırıblar.

Qəzet ölkədə ictimai fəalların “narkotik maddə” ittihamı ilə həbslərinə, onları müdafiəyə qalxan Avropa qurumları rəhbərlərinə rəsmi Bakının böhtanlarını obrazlı “öz vətəndaşına “narkoman”, əcnəbiyə “alkaş” ittihamı” cavabını verib.

“Ekspress”  ABŞ Dövlər Departamentinin insan haqlarına hörmət çağırışına rəsmi Bakının “kənar tövsiyə və himayədara ehtiyacı olmaması” cavabını “Bakıdan ABŞ-a sərt cavab” kimi şərh edərək diqqət mərkəzinə çəkib.

Qəzet yerli sakinlərə istinadən artıq 15 gündür ki, Bakının Hökməli kəndinə su verilmədiyini nəzərə çatdırır.

“Exo”  metronun “Koroğlu” stansiyası yaxınlığındakı körpü üzərində intihara cəhd hallarının son vaxtlar artmasını önə çəkərək  bu fakta “intihar “dəbi” və ya mertonun “Koroğlu” stansiyası yaxınlığındakı körpü nədən cəlbedicidir?” ironik sualını ünvanlayır.

“Bizim yol”  Dövlət Əmlak Komitəsinin “Cənub” hotelinin 13 milyon manatlıq əmlakını 38 min manat manatla hərraca çıxarmasını ilk səhifəyə çəkib.

Dövlət başçısı İlham Əliyev vaxtilə ölkənin ictimai-siyasi fəallarından olan, hazırda ABŞ-da yaşayan Səid Nurinin Azərbaycan vətəndaşlığından çıxarılması haqda noyabrın 13-də sərəncam imzalayıb.

“Yeni Müsavat”  Dini Qurumlarla iş üzrə Dövlət Komitəsinə 2,5 milyon manat ayrılmasını “Qafqaz Müsəlmanları İdarəsinin pulunun kəsilərək Mübariz Qurbanlıya verilməsi” kimi şərh edərək ilk səhifəyə çıxarıb.

Müsavat Partiyası ölkədə insan haqlarının durumu ilə bağlı dekabrın 14-nə nəzərdə tutduğu kütləvi aksiyanın təşkili üçün Mitinq Komitəsi yardıb.

Müsavat Partiyası sədrliyinə keçmiş namizəd Qubad İbadoğlu Demokratiya və Rifah Hərəkatı (ADR) təsis etdiklərini, ən qısa vaxtda elan olunacağını bildirib.