Mətbuat-Monitorinq 04.06.15

Rəsmi qəzetlər dövlət başçısı İlham Əliyevin ilk Avropa Oyunları üçün avtobus deposu və təlim mərkəzinin açılışında iştirakı haqda xəbəri ilk səhifələrdə yerləşdiriblər.

“Azadlıq” qəzeti İslam Konfransı Təşkilatının Avropa İttifaqı yanında nümayəndə heyətinin rəhbəri, diplomat Arif Məmmədovun Binəqədi rayonundakı yanğına görə sosial şəbəkə vasitəsilə rəsmi Bakıya tənqidi deyimləri və rəsmi Bakı təmsilçilərinin ona münasibəti mövzusuna geniş yer verib. Yanğına görə rəsmi Bakını qınayan diplomat A.Məmmədov həbslə hədələnib, YAP-çı deputat Siyavuş Novruzov onu “erməni” adlandırıb, digərləri də mənəvi terrora məruz qoyublar. AXCP sədri Əli Kərimli diplomatın tənqidini “hakimiyyətin mərkəzdənqaçma tendensiyasını dayandıra bilməməsi” adlandırır. Rəsmi Bakıya qarşı tənqidi fikirlərinə görə “diplomatik xəyanət” ittihamına məruz qalmasına A.Məmmədov “xarici siyasət idarəsini xəyanətdə ittiham etmək yalnız qeyri-sağlam” psixikaya malik adamın ağlına gələ bilərdi” şərhini verib. Diplomatın rəsmi Bakının əleyhinə fikirlərini qəzet “ölkənin diplomatik korpusunun çat verməsi” adlandırır.

Qəzet məmurların biznes fəaliyyətilə məşğul olması qadağasına baxmayaraq,  Sabunçu rayon icra başçısı Adil Vəliyevin tikinti şirkətləri, xarici markalı maşınların ölkəyə gətirilməsində dilerlik etməsi haqda məqalə dərc edib.

RF prezidenti Putinin dostu, hüquqşünas İlham Rəhimlinin kürəkəni, ölkəyə mobil telefon idxalı ilə məşğul olan Araz Mehdiyevin şirkətlərinə  vergidən yayınma ittihamı irəli sürülüb.

ABŞ-Azərbaycan münasibətlərində ciddi “çat” yarandığını yazan qəzet İlham  Əliyevin bütün addımlarını Ağ Evin boykot etdiyini nəzərə çatdırır.

“Ekspress”  diplomat Arif  Məmmədovun öz statusunda rəsmi Bakını tənqidə məruz qoymasına “diplomatın statusunun başına bəla olması” mövqeyini diqqət mərkəzinə çəkir.

Qəzet Səhiyyə Nazirliyinin vətəndaşlara Şıx və Sahil çimərliklərində cimməmək qadağasını nəzərə çatdırır.  

Dini komitənin sədri Mübariz Qurbanlı islam dinini radikalizmə sürükləmək meyllərinin artması barədə xəbərdarlıq edərək, milli maraqlara  toxunan nə varsa hamısına qaşrı çıxmağa çağırış edib.

“Exo”  ilin sonuna kimi neftin qiymətinin 75 dollara qalxacağını ilk səhifəyə çəkərk, buna qədərsə dəyərin 55 dollara qədər enəcəyi barədə xəbərdarlıq edir.

“Bizim yol” rəsmi Bakını tənqidə görə diplomat Arif Məmmədovun geri çağırılması haqda xəbəri ilk səhifəyə çıxarıb.

Mərkəzi Bankın kommersiya banklarını ləğv etməyə və ya birləşdirməyə gücü çatmadığını yazan qəzetə ekspertlər “bankların çoxunun bir nəfərə və ya məmurlara bağlı olmasının əlavə problem yaratması” şərhini veriblər.

“Yeni Müsavat”  Beynəlxalq Bankla bağlı kredit “qalmaqlaı”nı önə çəkən qəzet Avropa Oyunlarından sonra iqtidarda həbslər olacağını iddia edir.

Qəzet keçmiş deputat B.Xəlilovun və Beynəlxalq Bankın rəhbəri C.Hacıyevin “sağ əli” olan Qorxmaz Paşayevin üst-üstə 2 milyard manata yaxın kredit götürdüklərini və qaytarmadıqlarını, üstəlik xaricə qaçdıqlarını nəzərə çatdırır.

Problemli kreditlərin həcminin dəhşətli səviyyəyə çatacağını deyən ekspertlər bankları istənilən halda əhali ilə kompromisə nail olmağa çağırırlar.