Müsavat Avropa liderlərini Avropa Oyunlarını boykot etməyə çağırıb

Müsavat Partiyası Avropa ölkələrinin dövlət və hökumət başçılarını iyunun 12-də Bakıda I Avropa Oyunlarının açılışı mərasimində iştirak etməkdən imtina etməyə çağırıb.

Bu çağırış Azərbaycanda insan hüquqları probleminin həll edilməməsi və siyasi məhbusların mövcudluğu ilə əsaslandırılıb.

Partiya xatırladır ki, hələ ötən il siyasi islahatlar həyata keçirilməsə, siyasi məhbuslar azad edilməsə, Müsavatın Avropa dövlət başçılarını Oyunların açılış mərasimində iştirakdan imtinaya çağıracağı barədə qərar qəbul edib.

“Təəssüf ki, Azərbaycan hakimiyyəti bu çağırışlara məhəl qoymadı, Birinci Avropa Oyunları ərəfəsində ölkədə insan hüquq və azadlıqları ilə bağlı vəziyyət daha da pisləşdi, siyasi məhbuslar azadlığa buraxılmadı, siyasi motivli həbslər davam etdirildi.

İqtidar bu siyasi davranışı ilə - ölkədə insan hüquqlarını kobud şəkildə pozmaqla, vətəndaşların fundamental hüquqlarını təmin etməməklə, siyasi məhbusları azadlığa buraxmamaqla, faktiki olaraq Birinci Avropa Oyunlarının beynəlxalq birlik tərəfindən boykot olunması üçün ciddi əsaslar yaradıb.

Bir çox hökumət və dövlət rəhbərlərinin məhz qeyd edilən motivlərlə Birinci Avropa Oyunlarının açılış mərasimində iştirak etməyəcəyi artıq məlum olsa da, Müsavat Partiyası yarışlarla əlaqədar mövqeyini bir daha təsdiq edərək, Avropa ölkərinin hökumət və dövlət rəhbərlərini Birinci Avropa Oyunlarının açılış mərasimində iştirak etməməyə çağırır”, deyə partiyanın bəyanatında bildirilir. -06D-