Mətbuat-Monitorinq 04.09.15

Rəsmi qəzetlər dövlət başçısı İlham Əliyevin Bakının Səbayel rayonundakı 189-190 saylı orta məktəblərin və Yasamal rayonundakı Fizika, Riyaziyyat və İnformatika təmayüllü liseyin binasında görülən işlərlə tanış olmasını ilk səhifədə yerləşdirib.

Qəzet Azərbaycan Neft Akademiyasının Azərbaycan Dövlət Neft və Sənaye Universiteti adlandırılması, Mustafa Babanlının universitetin rektoru təyin edilməsi haqda sərəncamın mətnlərini də dərc ediblər.  

Jurnalist Xədicə İsmayılın peşə faəliyyətinə görə həbs edilməsinə baxmayaraq, “Azərbaycan” qəzeti bu həbsin konkret “cinayətlə bağlı olmasına” dair cəfəngiyyat olan məqalə dərc edib.

“Xalq qəzeti” isə beynəlxalq birliyin və qurumların X.İsmayılı müdafiə etməsilə bağlı bəyanatları “ölkənin daxili işinə qarışmaq” adlandıraraq bununla bağlı yazını öz səhifəsində yerləşdirib.

“Azadlıq”  “Cülən camaatı”na məxsus holdinq patronunun milyardlarla dolları Azərbaycana göndərməsilə ölkənin adının “çirkli pul” qalmaqalında hallanması” iddiasını manjetə çıxarıb.

Avropa Parlamentinin Liberal Demokrat fraksiyası Avropa İttifaqını Azərbaycandakı repressiyalarla bağlı təcili tədbirlər görməyə çağırıb.

“The Vaşinqton Post” qəzeti isə Azərbaycanda repressiya maşınının  fəaliyyətdə olmasına səbəb kimi Qərbin Əliyevə dözümlü yanaşmasını göstərib.

Parlament seçkilərində ATƏT xəttilə ancaq 125 müşahidəçi qəbul etmək imkanı olması  haqda rəsmi Bakının açıqlamasına qurum “Avropa Oyunlarında 6 min idmançını qəbul edənlər 380 müşahidəçini qəbul edə bilmir?” cavabını veriblər.

Zığ qəsəbəsinin bir qrup sakini sürüşmə nəticəsində evlərinin qəzalı hala düşməsinə baxmayaraq, hökumətin fəaliyyətsizlyinə etiraz olaraq Nazirlər Kabineti önündə yolu bağlamaqla etiraz aksiyası keçirib.

Qəzet Azərbaycan hökumətinin benzinin ucuzlaşmamasını əsaslandırmaq cəhdlərini “əsassız bəhanələr uydurması” kimi dəyərləndirir. 

“Ekspress” rusiyalı politoloqun “Avropa İttifaqının Qarabağı Azərbaycana qaytara bilməyəcəyi” bəyanatına “müharibə hər an başlaya bilər” mövqeyini diqqət mərkəzinə çəkir.

Qəzet bu ilin may ayında kütləvi ölümlə müşahidə edilən Binəqədi rayonundakı binanın yanması ilə bağlı istintaqın daha 4 ay uzandığını bildirir.   

“Novoe Vremya”  Zığ qəsəbəsinin bir qrup sakininin Nazirlər Kabineti önündə etiraz aksiyası keçirməsi fonunda “xalq ədalət axtarışı ilə küçələrə çıxır” mövqeyini önə çəkib.

“Bizim yol”  ölkədəki neft şirkətlərində kütləvi ixtisarların aparılmasını “neftin ucuzlaşmasını kütləvi işsizlik yaratması” şərhilə ilk səhifəyə yerləşdirib.

Neftçilərin Hüquqlarını Müdafiə Komitəsinin sədri Mirvari Qəhrəmanlı bu ixtisarlara “yerli neftçilər işsiz qaldıqları halda neft şirkətləri xaricdən 100-lərlə işçi gətizdirir” bəyanatını səsləndirib.

Vəkil Elçin hüquq müdafiəçisi Leyla Yunus və həyat yoldaşı Arif Yunusun haqqında məhkəmə hökmündən apellyasiya şikayəti verdiyini bildirib.

“Yeni Müsavat”  ölkədə icra başçılarının yerdəyişməsinə toxunaraq növbənin Bakı meri Hacıbala Abutalıbova çatması iddiasını ilk səhifəyə çıxarıb.

Qəzetə görə, cəbhədə ermənilərin gərginliyi artırması Azərbaycanda parlament seçkilərini pozmağa hesablanıb, bunun arxasında Rusiya dayanır.

Döyülməklə qətlə yetirilən jurnalist Rasim Əliyevin anası oğlunun qətlində adı hallanan futbolçu Cavid Hüseynovun barəsində həbs qətimkan tədbirinin dəyişdirilməsinə olan cəhdlərdən narahatlığını nəzərə çatdırıb.

İŞİD terror təşkilatının Azərbaycana təhlükə olması haqda mövqeləri ekspertlər “Türkiyənin İŞİD əleyhinə koalisiyaya qoşulması ilə Azərbaycandan İŞİD-ə gedən yolun bağlanması” kimi şərh edirlər.