Mətbuat-Monitorinq 05.09.12

Bugünkü ölkə qəzetlərinin əsas mövzusu ASALA erməni-terror təşkilatının Azərbaycanın Macarıstandakı səfirliyinə Azərbaycan diplomatlarını, iş adamlarını, xaricdə təhsil alan tələbələri, diaspor fəallarını öldürəcəyi haqda hədə məktubunun daxil olmasıdır.

Rəsmi qəzetlər dövlət başçısı İlham Əliyevin Badamdar qəsəbəsində yeni inşa edilən orta məktəbin və uşaq bağçasının açılışında iştirak etdiyini yazır. Bu qəzetlər eks-prezident Əbülfəz Elçibəyin zəhərlənmə nəticəsində vəfat etməsi kampaniyasını konkret olaraq AXCP sədri Əli Kərimlinin üzərinə yönəltmək kimi məqalələrə geniş yer veriblər. Bundan əlavə, “İdarələrarası elektron sənəd dövriyyəsi sistemi haqqında əsasnamə” haqqında fərmanın, Şəki rayonunun sosial-iqtisadi inkişafı ilə bağlı 2 milyon manat vəsaitin ayrılması haqda sərəncamların mətni bu qəzetlərdə əksini tapıb.

“Azadlıq” qəzeti Azərbaycan zabiti Ramil Səfərovun azadlığa buraxılması ilə bağlı erməni terrorçu ASALA təşkilatının Azərbaycan diplomatlarını, xaricdə thsil alan tələbələrini, diaspor fəallarını terror edəcəyi ilə hədələdiyini nəzərə çatdırır.   

Qəzet “Eks-prezidentlərin, onların ailə üzvlərinin təminatı haqqında” qanunun tələblərinin eks-prezident Əbülfəz Elçibəyin ailəsinə münasibətdə yerinə yetirilmədiyini yazır. 

“Radio Free Europe” dövlət başçısı İlham Əliyevin atası mərhum dövlət başçısı Heydər Əliyevi bütləşdirməkdə davam etdiyini yayaraq bunu “ölkədə şəxsiyyətə pərəstişin güclənməsi” kimi dəyərləndirir. 

Casusluq adı ilə İranda həbs edilən Azərbaycan vətəndaşları Fərid Hüseyn və Şəhriyar Hacızadə azad edildikləri  və bu gün Azərbaycana qayıdacaqlarını bildirilir. 

Azərbaycanın vətəndaş cəmiyyəti institularının təmsilçiləri ABŞ səfiri Morninqstarın Heydər Əliyevin heykəlini ziyarət etməsini “bu addımın diplomata yaraşmaması” kimi şərh ediblər. 

“Zerkalo” zabit Ramil Səfərovun azadlığa buraxılmasını “oyunun məntiqi sonluğa qədər oynanılması” kimi dəyərləndirərək  bu azadlıq ətrafında beynəlxalq tənqidin get-gedə güclənməsinə “amma kimin udacağı hələ məlum deyil” mövqeyini ifadə edir.  

“Ekspress”. İki əsgər bir aydır ki, hərbi hissəni tərk edərək xaricə qaçıblar. 

“Exo” ekspertlərə istinadən Lənkəranda seysmoloji aktivliyin artdığını yazaraq son bir neçə gündə bu ərazilərdə 4 zəlzələnin qeydə alınmasını və onların 4.2 bal gücündə olmasını bu fəallıqla izah edir.

“Novoe Vremya” son vaxtlar rəsmi İrəvanın Dağlıq Qarabağın müstəqilliyini tanımaq mövqeyini önə çıxarmasına diqqət çəkərək bu fonda “danışıqları davam etdirməyin mənası nədir?” sualını gündəmə gətirir.

“Bizim yol”. Avqustun 31-də Lökbatan qəsəbəsində baş vermiş yol-nəqliyyat qəzasında rəsmi olaraq 6 nəfərin  həlak olduğu deyilsə də, şahidlər hadisədən sonra 28 nəfərin dəfn olunması barədə açıqlama veriblər. 

Qəzet Ermənistanın Dağlıq Qarabağın müstəqilliyini tanımasını “müharibənin bir addımlığında dayanmaq” kimi dəyərləndirir. 

“Yeni Müsavat” yazır ki, Bakı metrosunun “28 may” stansiyasında Cümhuriyyət banisi Məhəmmədəmin Rəsulzadənin əkslərinin götürüləcəyi barədə xəbərlərə metropoliten rəisi Tağı Əhmədov “cümhuriyyətə aid atributlar saxlanılacaq” cavabını verib. 

Azərbaycan Müdafiə Nazirliyi Ermənistan prezidenti Serj Sarkisyanın Azərbaycan zabiti Ramil Səfərovun aradan götürülməsi üçün tapşırıq verdiyi barədə rəsmi açıqlama səsləndirib. 

Bakıda peşəkar boksçulardan ibarət dörd nəfərlik cinayətkar dəstə ələ keçib.