Mətbuat-monitorinq 05.09.15

Rəsmi qəzetlər dövlət başçısı İlham Əliyevin Xızı rayonunda yeni suvarılacaq torpaqlara Taxtakörpü-Ceyranbatan kanalından suvarma suyunun verilməsi mərasimində iştirak etməsini ilk səhifələrdə yerləşdiriblər.

“Azadlıq” qəzeti son bir ildə ölkənin valyuta ehtiyatının 52% azalması və müxalif liderlərin ölkənin “uçuruma yaxınlaşması” xəbərdarlığını manjetə çıxarıb.

Qəzet “Bank of Azerbaijan”ın 2 aydır ki, əməkdaşlarına maaş verə bilməməsini nəzərə çatdırır.

Qəzetin iddiasına görə, son vaxtlar banklardan kredit götürmək çətinləşdiyi üçün əhali lombardlara üz tutur.

Jurnalist Xədicə İsmayılova barəsindəki məhkəmə hökmünə “yazdığım korrupsionerlərdən daha zənginəm, çünki, uğrunda canımı belə verəcəyim dəyərlərim var” bəyanatı səsləndirib.

ABŞ-ın ATƏT-dəki nümayəndəsi Daniel Bayer rəsmi Bakını X.İsmayıl barəsində məhkəmə hökmünü ləğv etməyə çağırıb.

ABŞ-ın “Bild” qəzeti Avropa İttifaqına siyasi məhbuslar azad edilməyənə qədər rəsmi Bakı ilə əməkdaşlığı dayandırmaq çağırışı edib.

“Ekspress” qəzeti ölkənin şimal-qərb bölgəsində 7 bal gücündə zəlzələ baş verməsi haqda xəbəri diqqət mərkəzinə çəkib.

“Novoe Vremya” qəzeti ABŞ-ın əsas məqsədinin dünyada hegemonluq və neftə sahiblənmək, demokratiyanın isə məqsədə çatmaq üçün vasitə olması iddiasını önə çəkib.

“Bizim yol” qəzeti Mərkəzi Bankın bir ayda 1.2 milyard dollar itirdiyini yazaraq,

manatın devalvasiyasının qaçılmaz olması qənaətini ilk səhifəyə yerləşdirib.

Ekspertlər neftin ucuzlaşması fonunda Azərbaycanda benzinin 44, dizel yanacağının 37 qəpiyə satılmasının real bazara uyğun olduğunu bəyan ediblər.

Ölkə ərazisində 1 milyon nəfərdən artıq insanın sel təhlükəsi olan rayonlarda yaşadığını yazan qəzet 18 inzibati rayon ərazisində yerləşən 200-dən artıq yaşayış məntəqəsinin mütəmadi sel fəlakətinə məruz qaldığını bildirir.

“Yeni Müsavat ” qəzeti Mərkəzi Bankın aylıq dollar limitini 4 günə məmur oliqarxlara satması iddiasını önə çəkərək, bunu manatın yenidən ucuzlaşacağı haqda xəbərin məmur oliqarxlara bilərəkdən ötürülməsinin nəticəsi sayır.

MSK parlament seçkilərilə bağlı 41 seçki dairəsi üzrə 81 vətəndaşın deputatlığa namizədliyini irəli sürməsi haqda açıqlama verib.

Ekspertlərə görə, parlament seçkiləri ərəfəsindəki devalvasiya valyuta ehtiyatlarının xərclənməsi hesabına önlənəcək, amma yaxın bir neçə aya isə manatın ucuzlaşması qaçılmazdır.