Mətbuat-Monitorinq 05.11.13

Rəsmi və iqtidaryönlü qəzetlər dövlət başçısı İlham Əliyevin Vatikan kardinalı Canfranko Ravazini qəbul etməsi, onun dövlət ordeni ilə təltifi barədə xəbərləri ilk səhifələrə çıxarıblar. 

“Azadlıq” qəzeti 2013-cü ilin yanvarında İsmayıllı hadisələrində həbs edilən şəxslərin məhkəmə prosesini önə çəkərək həmin hadisələrdə iştirakçı olan polis nəfərinin “həbs edilənlərin günahı yoxdur” bəyanatını “gözlənilməz ifşa” adlandırır.

Parlamentin sədr müavini Ziyafət Əsgərovun bir sülalənin uzun illər hakimiyyətdə qalmasını daha doğru siyasət saymasını qəzet “diktatura təəssübkeşliyi”adlandırır. 

Son vaxtlar bir sıra universitetlərin tələbələrinin yazılı imtahan üsulundan imtina olunmasi ilə bağlı keçirdikləri etiraz aksiyalarına təhsil naziri Mikayıl Cabbarov “testin obyektiv, qalanlarının qeyri-obyektiv kimi təqdim olunması ən azı sadəlövhlükdür” şərhini verib. 

Moskvada rus millətçilərinin noyabrın 4-də keçirdiyi “rus marşı” aksiyasının gedişində 20 qafqazlı xəsarət alıb ki, bunun da 16-sı azərbaycanlıdır.

“Ekspress” ekspertlərə istinadən ipoteka krediti ilə alınan mənzillərin 65%-nin 30-60 min manat arasında olduğunu bildirir. 

Qəzet yazır ki, müdafiə naziri Zakir Həsənov Minsk Qrupunun həmsədrləri ilə görüşdə rusiyalı həmsədrdən Rusiyanın Ermənistandakı 102 saylı baza komandirinin Azərbaycanı müharibə ilə hədələməsinə cavab istəyib. Həmsədr məsələnin araşdırılacağını bildirib. 

“Exo” ekspertlərə istinadən ölkənin daşınmaz əmlak bazarında mənzillərin 60-70%-nin qeyri-leqal vəsaitlər hesabına alındığını yazır.

“Novoe Vremya”  Qarabağ münaqişəsinin tənzimlənməsi ilə bağlı başlayan danışıqlara inamsızlığını “yenə də danışıqlar naminə danışıqlar?” sualı ilə ifadə edir.

“Bizim yol” qeyd edir ki, “Azadlıq” qəzetinin redaktoru Rahim Hacıyev əməkdaşların qonorar və maaşlarının verilməsində yaranan problemlərlə bağlı “qəzetin bağlanmağa doğru aparılması” bəyanatını səsləndirib. 

Qəzetə şərh verən ekspertlər Pedaqoji və “Azərbaycan” universitetlərində tələbələri etiraz aklsiyalarına rektorların vadar etdiklərini deyərək səbəb kimi  bu universitetlərdə “Boloniya sistemi”ni rəhbərliyin öz maraqlarına uyğunlaşdırmasını göstərirlər.  

“Yeni Müsavat” ABŞ-ın Bakıda prezident seçkiləri bağlı telefon danışıqlarını dinləməsi, AŞPA deputatlarının “ələ alınması” haqda Amerika kəşfiyyatında sübutların olmasını və bu materialların bir qisminin müxalifətə ötürülməsi haqda iddiaları ilk səhifəyə çıxarıb. 

Qəzet bu ilin yanvarında baş vermiş “İsmayıllı olayları” ilə bağlı Şəkidə başlayan məhkəmə prosesində insidentin yaşandığını, döyülənin olduğunu, məhkəmənin polis tərəfindən mühasirəyə alındığını yazır.   

Keçmiş səfır, politoloq Hikmət Hacızadə rəsmi Vaşinqtonun İlham Əliyevi təbrik etməməsinə “təbrikin gecikməsi və ya edilməməsi diplomatik sanksiyanın bir növüdür” mövqeyini ifadə edib.