Azərbaycanın demokratiya fidanları- Girov gəncliyimiz...

Qeyri- döyüş şəraitində baş vemiş müəmmalı, günahsız əsgər ölümlərinə etiraz edən gənclərimiz bu ilin əvvəllərində Bakıda bir neçə dəfə son illərin ən möhtəşəm aksiyalarını keçirdilər. Seçki ilində siyasi aktivliyin gənclərin timsalında artmasından vahiməyə düşən hakimiyyət etirazı səngitmək üçün müxtəlif primitiv metodlarla əl atdı. Hətta bəyənmədiyimiz Sovet hökümətinin işlətmədiyi taktika ilə onları “molotov kokteyli” hazırlamaqda, yanğın, iğtişaş törətməkdə, narkotika və silah saxlamaq kimi bir- birinə daban- dabana zidd absurd ittihamlarla suçlayıb, oğurladı, onları girov götürdü. Bəli həmin gənclər həbs olunmayıb, Əliyevlər hakimiyyəti tərəfindən girov götürülüb və 7 aydan çoxdur ki, girov kimi saxlanılırlar. Tam günahsız olduqlarına görə beynəlxalq Amnestyu İnternational təşkilatı onları vicdan məhbusu, Avropa Parlamenti və digər qurumlar isə siyasi məhbus elan ediblər.

Bu gənclərCinayət Məcəlləsinin çox ağır maddələri ilə ittiham olunurlar. Belə ki, hazırda girovluqda olan NİDA Vətəndaş Hərəkatının üzvləri Məmməd Əzizov, Bəxtiyar Quliyev, Şahin Novruzlu, Rəşadət Axundov, Üzeyir Məmmədli, Rəşad Həsənov, Zaur Qurbanlı və Azad Gənclik Təşkilatının üzvü İlkin RüstəmzadəBaş Prokurorluğun Ağır Cinayətlərə Dair İşlər üzrə İstintaq İdarəsi tərəfindən CM- nin 234.1 (qanunsuz olaraq narkotik vasitələri əldə etmə, saxlama və ya satma) və 228.1-ci (qanunsuz olaraq silah, partlayıcı maddələr və qurğular əldə etmə, saxlama, daşıma və gəzdirmə) maddələri ilə ittiham olunurlar.İstintaq dövründə onlara qarşı CM-nin 220. 1 (zorakılıqların, talanların, yanğınların törədilməsi, əmlakın məhv edilməsi ilə müşayiət olunan kütləvi iğtişaşları təşkil etmə və ya belə iğtişaşlarda iştirak etmə) maddəsi ilə əlavə ittiham elan olunub. Təkcə sonuncu- 220.1- ci maddə ilə onlara qarşı 8- ildən 12 ilə qədər iş düşür. Görəsən gənclərin günahı nədir ki, bu rejim onlara adam öldürmək maddəsinə bərabər cəza vermək istəyir. Görəsən onlar kimi öldürüblər?

Heydər Əliyevin yaşıdı məhbus NİDA- çı...

...Gənclərin əksəriyyəti çox cavandılar, hətta 1995- ci il təvəllüdlü Şahin Novruzlu həbs olunarkən 17 yaşında olub. Onunla bağlı NİDA Vətəndaş Hərəkatının saytında deyilir; “Novruzlu Şahin İbrahim oğlu 16 sentyabr 1995-ci ildə Bakıda anadan oub. 2012-ci ildən həbs edilənədək Odlar Yurdu Universitetində təhsil alırdı.2013-cü ilin fevralında “N!da” Vətəndaş Hərəkatına qoşulub. 07 mart 2013-cü il tarixində MTN əməkdaşları tərəfindən küçədə oğurlanmış, yaşadığı evə aparılmış, evdən MTN əməkdaşlarının evə qoyduğu narkotik maddə və “molotov kokteyli” “tapılmış”, bu qondarma ittihamla həbs edilmişdir. 9 mart tarixində Şahinin təqsirsizlik prezumpsiyası kobud şəkildə pozularaq, AzTV və İT daxil olmaqla, “cinayət törətmiş şəxs” kimi əksər yerli televiziya kanallarında nümayiş etdirilmişdir.Barəsində siyasi sifariş əsasında həbs qətimkan tədbiri seçilmişdir.İşgəncə nəticəsində “ifadə verməyə” məcbur edilmişdir” (http://www.nidavh.org/siyasi-m%C9%99hbuslarimiz)

Şahin Novruzlu İlham Əliyevin oğlu Heydər Əliyevdən səhv etmirəmsə 1 yaş böyükdür, demək olar ki, yaşıddılar. Digər gənclər də Kəmaləddin Heydərovun oğlu Talehlə, Ziya Məmmədovun oğlu Anarla yaşıddılar. Görəsən bu gün hakimiyyəti zəbt etmiş adı çəkilən şəxslər öz övladlarının da bu cür dəmir barmaqlılar arasında qalmasına, nahaqdan cəza çəkməsinə razı olarlarmı? Görəsən onlar düşünmürlərmi nahaq qan yerdə qalmadığı kimi hər pisliyin də bir cavabı və sonu olur, qisas qiyamətə qalmır? Yeri gəlmişkən necə ola bilir ki, Əliyev monorxiyasının məmur övladları Taleh Heydərovlar, Anar Məmmədovlar xaricdə sağa-sola xalqın milyonlarını xərcləyirlər, amma Şahin Novruzlu, Zaur Qurbanlı, Rəşadət Axundov və s. kimi sadə xalq övladları həbsxanalarda nahaqdan cəza çəkir? Görəsən Azərbaycanda nə vaxta qədər Vətəni sevməyin bədəli həbsxanadır, didərginlikdir?

Həbsxanada seçki saxtakarları, hakimiyyəti qanunsuz qəsb edənlər, xalqın malını- mülkini əlindən alanlar, oğrular, korrupsionerlər cəza çəkməlidir, demokratiya, azadlıq, ləyaqətli yaşam ugrunda mübarizə aparanlar yox!!!

Azərbaycan- lider məhbus ölkəsi...

Avropa Şurasının cinayət işləri və cəzaçəkmə ilə bağlı SPACE adlı statistik araşdırmasında bildirilir ki, “2011-ci il yanvarın 1-nə olan vəziyyətə görə, Azərbaycandakı penitensiar müəssisələrində 37.989 nəfər, o cümlədən məhkəmə hökmünü  gözləyən minlərlə dustaq saxlanılır. Lakin bu müəssisələrin ümumi tutumu 25.953 nəfərdir. Nəticədə, Azərbaycanda əhalinin hər 100 min nəfərinə 417 dustaq düşür. Fransada 100 min nəfərə 85, İspaniyada 140, Almaniyada 95, Böyük Britaniyada 148, Kanadada 115 nəfər təşkil edir. Belorusiya və Türkmənistanda bu rəqəm Azərbaycandakına yaxındır- anoloji olaraq; 426 və 489.Əvvəlki illərlə müqayisədə Azərbaycanda son illər həbsdə olanların sayı artıb”. 

Göründüyü kimi bu hakimiyyət Azərbaycanı özü boyda həbsxanaya çevirmək yolunu tutub. Hazırda həbsxanalarımızda 40 mindən yuxarı məhbus var ki, onların 100- dən çoxu siyasi məhbusdur. Apardığımız araşdırmalara görə Azərbaycan adam sayına görə MDB məkanında, eləcə də Avropada həbsxanada olan insanların sayına görə lider ölkələrdən biridir. 

Əliyev rejimi NİDA- çıların timsalında mübariz, haqqını tələb edən, savadlı Azərbyacan gənclərini həbsə atır, onları girov saxlayır. Çünki saxta yolla, zor gücünə hakimiyyəti qəsb etmiş  hakimiyyət azad düşüncəli, müstəqil fikirli gənclikdən qorxur. Ona “İlhamla irəli” deyən, yalnız mədəsini, gündəlik dolanışığını və karyerasını düşünən kosmopolit, manqurd gənclər lazımdır. Millətin bu gününü və gələcəyini düşünən, onun tərəqqisi və rifahı üçün çalışan, demokratiya və azadlıq ugrunda mücadilə aparan XALQINA VƏ HAQQINA SAHİB ÇIXAN mübariz gənclər bu hakimiyyətə lazım deyil. Məhz ona görədir ki, xaricə göndərilib, Avropada və dünyanın digər ölkələrində təhsil alan gənclərin əksəriyyəti ölkəyə qayıda bilmir. Çünki onların xaricdə aldııqları təhsil, qazandıqları dünyagörüş “analoqu olmayan Azərbaycandakı inkişafla” tərs mütənasib təşkil edir. Digər tərəfdən həmin gənclərin əksəriyyəti Azərbaycanda normal iş, yaşayış və mənzil problemlərini həll edə bilmədikləri üçün ölkəyə qayıtmaq istəmirlər və ya geri dönərlərsə qeyd olunan problemlərlə, eləcə də siyası diskriinasiya ilə üzləşirlər.

Sadə bir misal;ABŞ- da təhsil alıb ölkəyə qayıdan Bəxtiyar Hacıyev nəinki aldığı təhsilə uyğun işlə təmin olundu, əksinə 2010- cu ildə Milli Məclisə keçirilən seçkilərdə iştirak edib seçicilərə verdiyi mesajlara görə qanunsuz olaraq həbs edildi, işgəncələrə məruz qaldı və 1 ildən çox həbs həyatı yaşadı. B. Hacıyevin timsalında Azərbaycan hakimiyyəti üçün savadlı, düşüncəli, öz mövqeyi və siyasi baxışları olan gənclər bu ölkəyə düşməndir. 

Girov gəncliyimiz- gələcəyimiz...

... Kimdənsə sitat gətirib onun böyük adam olduğunu iddia etmək fikrində deyiləm. Amma Heydər Əliyev deyirdi ki, Azərbaycanın gələcəyi gənclərdir. Görünən odur ki, hakimiyyət qabiliyyətli, mübariz NİDA- çı gənclərin timsalında Azərbaycanın gəncliyini həbs edib, Azərbaycanın özünü həbs edib və onu girov saxlayır. Həbsdə olan NİDA-çı gənclər Cəmil Həsənlinin təbirincə desək Azərbaycanın demokratiya fidanlarıdır ki, bu gün hakimiyyət onları həbsdə- girovluqda saxlayır.

Böyük dahilərimiz Atatürk, M. Ə. Rəsulzadə, Elçibəy gənclərə üz tutdu, onlara xitab etdi.  Cumhuriyyəti hifz etməyi türk gəncliyinə əmanət etdi. Amma YAP hakimiyyəti əmanət sahiblərini həbs edərək onları girov saxlayır. Azadlığı boğmaq, demokratiyanın qarşısın almaq üçün onlar girov saxlayır. Bu hakimiyyət həmin gəncləri yalnız Azərbaycanda demokratiyanı, azadlığı boğmaq, öz sülaləsinin ömürlük şahlığını təmin etməyin müqabilində onları girovluqdan azad edə bilər. Amma 40 illik Əliyevlər sülaləsinin bu utanc bazarlığını qəbul etməyən Azərbaycan Gəncliyi NİDA- çıların timsalında girovluğu qəbul edib dəmir barmaqlılar arasında layiq olmadıqları, haqq etmədikləri cəzanı çəkirlər. Əslində onların timsalında bu cəzanı bütün Azərbaycan xalıq çəkir. Xalq üstü açıq həbsxanada, gənclər isə bağlı, qapalı həbsxanada...

 Bu hakimiyyət Azərbaycanı Azərbaycan boyda həbsxanaya çevirmək istəyir.Azərbaycanın özü boyda həbsxana olmasını istəmiriksə hər birimiz bu hakimiyyətin qarşısında NİDA olmalıyıq...Hər birimiz ruhən, qəlbən, mənən NİDA- çı olmalıyıq.Biz hamılıqla qanunsuz həbslərə, hakimiyyətin öz vətəndaşından intiqam, qısas almaq cəhdinə son deməliyik. Yoxsa növbə hər birimizindir, növbə hamımızındır, növbə Azərbaycanındır!!!

Son...

05 noyabrda NİDA Vətəndaş Hərəkatının həbsdə olan üzvlərinin məhkəməsi başlayır. Əgər buna məhkəmə demək mükündürsə... Bütün halda NİDA- çılara dəstək üçün adı çəkilən təşkilata üzv olmaq üçün müraciət etdim. Bu hakimiyyətin repressiyalarına, şah- üsul idarəsinə, monorxiyasına “yox” demək üçün NİDA- çı olmaq istədim! Mən qərarımı verdim, əziz oxucu. Növbə sənindir!