Mətbuat-Monitorinq 08.08.15

Rəsmi qəzetlər dövlət başçısı İlham Əliyevin “Aqrarkredit QSC-nin Bank olmayan kredit təşkilatı tərəfindən dövlət zəmanətilə emissiya ediləcək istiqrazların buraxılışı, həcmi, müddəti və ödənilməsi şərtləri”nin təsdiq edilməsi” haqqında fərmanının mətnini, Beynəlxalq İdman Atçılıq Federasiyasının  prezidentini və baş katibini qəbul etməsi xəbərini ilk səhifələrdə yerləşrdiriblər.

“Azadlıq” qəzeti neftin ucuzlaşması ilə ölkənin növbəti devalvasiya şoku yaşaya biləcəyi xəbərdarlığını manjetə çıxarıb. Bununla yanaşı qəzet daha çox insan haqları, dövlət idarəçiliyi sahəsindəki qanunsuzluqlara diqqət çəkir.

AXCP sədri Əili Kərimli son vaxtlar iş adamlarının kütləvi saxlanmalarını “repressiya sırasının iş adamlarına çatması” kimi dəyərləndirir. Hüquq müdafiəçiləri Leyla və Arif Yunusun uzun müddətə azadlıqdan məhrum edilə bilməsini ictimai fəallar “hakimiyyətin qisasçılıq əməliyyatı” adlandırırlar. 

Ekspertlər Rabitə Nazirliyinin Facebook, Skype və WhatsApp-ın ölkədə lisenziyalaşdırılmalı olması təklifini “sosial şəbəkələrlə bağlı təhlükəli təklif” sayırlar.

Repressiyanın ölkədə yeni mərhələyə qədəm qoyduğunu bəyan edən Milli Şura üzvü Rövşən Əhmədli iqtidara “repressiya ilə xalqın üstünə gedənlər tarixdə rüsvayçı formada qalıblar” xəbərdarlığını ünvanlayıb.

Milli Şuranın sədri Cəmil Həsənli indiki repressiya şəraitinin seçkiyə getmək istəyənlərə yaxşı bir şey vəd etmədiyini, qanun layihələrinin 70-80%-nin dövlət başçısından gəldikdə parlamentin qanunverilcik funksiyasını itirdiyini bəyan edib. 

2010-cu ildə istifadəyə verilməli olan Bakı-Tbilisi-Qars dəmir yolu çəkilşinin bu qədər yubanmasına səbəb kimi “Layihəni İdarəetmə Qrupu” Gürcüstanin “mürəkkəb relyefi və ağır iqlim şəraiti”ni göstərir.

“Ekspress” ölkədə turizmin kütləviləşməməsinə səbəb kimi ekspertlərin “turizm bazarının heç bir prinsipinin Azərbaycan hotellərində işləməməsi” rəyini önə çəkib.

Ekspertlər ölkə üzrə bütün kreditlərin cəmi 6,6%-nin, manatla verilən kreditlərin isə 8%-nin problemli olduğunu bəyan edirlər.

“Novoe Vremya” Rabitə Nazirliyinin sosial şəbəkələrin ölkədə lisenziyalaşdırılması təklifinə “sosial şəbəkələrdə bizi qadağalar gözləyirmi” sualı ilə cavab verib.

“Bizim yol” “İzolit” ASC-nin başçısı Mehman Mehdiyevin Beynəlxalq Banka borca görə həbs olunmasını ilk səhifədə yerləşdirib.

Qəzet yazır ki, Masallı rayon sakini Siyasət Şükürov 2008-ci ildə “Accessbank”dan 8 min dollar kredit götürüb, 1700 dolları qaytarıb, 6300 dolları hissə-hissə ödəyəcəyini razılaşdırıb, indi isə 30 min dollar faiz borcu yaranıb, kredit götürən və ekspertlər bunu qanunsuz sayırlar, bank isə hər şeyin qanun daxilində olduğunu bildirir.

“Yeni Müsavat ” Kremlin antiazərbaycan kampaniyasının RF XİN başçısı Lavrovun kabinetindən idarə olunması iddiasını önə çəkib.

Kreml layihəsi olan “Avrasiya İttifaqı” Hərəkatının Azərbaycanın ilkin olaraq Qazax və Ağstafa rayonlarında təşəbbüs qruplarının yaradıldığını nəzərə çatdırır.

Bakının “sovetski” məhəlləsinin sökülüşü ilə evləri qəzalı duruma düşən sakinləri hələ ki, rəsmi qurumların onlarla maraqlanmadıqlarını nəzərə çatdırırlar.

Beynəlxalq Bankdan kredit götürdüyünə görə Mingəçevir “İzolit” ASC rəhbəri Mehman Mehdiyev saxlanılıb, bu banka kredit borcuna görə bütünlükdə 7400 nəfərin ölkədən çıxışına qadağa qoyulduğu bildirilir.

Rəsmi qurunlara isnadən qəzet bu ilin ötən dövrü ərzində paytaxt yollarındakı qəzalarda 133 nəfərin həlak olduğunu, 538 nəfərin yaralandığını yazır.

Ekspertlər Mərkəzi Bankın (MB) statistik hesabatların açıqlanmasını yubatmasını ölkə banklarından çıxarılan əmanətlərin məbləğini gizlətməsi cəhdi kimi sayırlar.