Mətbuat-monitorinq 09.02.15

Rəsmi qəzetlər dövlət başçısı İlham Əliyevin Münhendəki görüşlərilə bağlı xəbərləri ilk səhifələrdə yerləşdiriblər.

“Azərbaycan” qəzeti Müsavat Partiyası sədrliyinə keçmiş namziəd Qubad İbadoğlunun partiya sıralarından xaric olunmasını keçmiş başqan İsa Qəmbərin “məkrli planının” baş tutması, partiyanın Arif Hacılı və İ.Qəmbərin “şəxsi kooperativinə” çevrilməsi kimi dəyərləndirir.

Bir sıra qanunlara dəyişikliklərlə bağlı fərmanların mətnləri də qəzetin səhifələrində yer alıb.

“Azadlıq” qəzeti ABŞ Konqresinin Azərbaycan hakimiyyətilə bağlı dinləmələrə hazırlaşması haqda xəbəri manjetə çıxarıb.

Yasamal rayonundakı 12 saylı seçki məntəqə komissiyasının üzvləri son bələdiyyə seçkilərində bu məntəqədə saxtakarlıq aşkar edən və faktı ictimailəşdirən qəzeti və “Meydan tv”ni “işgüzar imicə zərbə vurmaq” adı ilə məhkəməyə verib.

Qəzet oğlunun qətlinə görə məhkumluq həyatı yaşayan Vüqar Əliyevə və Lamiyə Quliyevaya həbsdə belə işgəncələr, zorakılıqlar təşkil edən Şəmkir rayonunun keşmiş icra başçısı Aslan Aslanovun həbsinə hazırlıq getdiyini yazır.

Ölkə partiyalarının maliyyə hesabatı verməli olması haqda müntəzəm çıxış edən  YAP rəsmisi Siyavuş Novruzov YAP-ın da hesabat verməli olduğu haqda bəyanatlara “YAP nəyin hesabatını veməlidir ki?” mövqeyi sərgiləyib.

Bu günlərdə Münhendəki çıxışında dövlət başçsı İlham Əliyevin “bizə etimad göstərin” bəyanatını şərh edən ekspertlərə görə, Azərbaycana beynəlxalq etimadın zəifləməsi insan haqları və demokratiya sahəsindəki sərt addımlarla əlaqəlidir.

Qəzet hüquq müdafiəçilərinə isnadən neftin ucuzlaşması ilə bağlı quruda neft çıxaran “Global Energy Azerbaijan Group”da ixtisarlar başladığını nəzərə çatdırır.

“Yeni Müsavat” qəzeti dövlət başçısı İlham Əliyevin Münhendə səsləndirdiyi “erməni əsgərlər öldürülmək istəmirlərsə Qarabağa gəlməsinlər” bəyanatını ilk səhifəyə çıxarıb.

Şəmkir rayonunun keçmiş icra başçısı Aslan Aslanovun oğlunun qətlinə gərə həbs edilən Lamiyə Quliyevanın anası keçmiş icra başçısının bütün nəsillərini əsassız işgəncələrə məruz qoyması haqda açıqlamalar verib.

Ekspertlər manatın devalvasiyasından qorxan ölkə banklarının artıq krediti xarici valyuta ilə verməyə başladıqlarını yazır.

Göyçay rayon sakinləri işıq və su problemlərilə bağlı fevralın 8-də icra hakimiyyətinin binası önündə etiraz aksiyası keçiriblər.

Ekspertlər neftin qiymətinin ucuzlaşması ilə bağlı dövlət idarələrində “paket maaş”ların və 13-cü əmək haqlarının verilməyəcəyini nəzərə çatdırırlar.

Gürcüstan azərbaycanlıları “Qeyrət” cəmiyyətinin sədri Əlibala Əsgərov “Sınıq körpü” keçid məntəqəsində xalqın başına açılan oyunların dünyanın heç bir məntəqəsində baş verməməsi bəyanatı səsləndirib.