Mətbuat-Monitorinq 09.07.15

Rəsmi qəzetlər dövlət başçısı İlham Əliyevin İtaliyaya işgüzar səfərə getməsi haqda xəbərləri ilk səhifələrdə yerləşdiriblər.   

“Azadlıq” “Ata Holding” ASC-nin törəmə şirkətlərini ləğv etməsini “hakim ailə şirkətlərinin də ixtisarlara start verməsi” sayaraq manjetə çıxarıb.

Milli Şuranın sədri Cəmil Həsənli Avropa Oyunlarına 8 milyard manatın xərclənməsi haqda rəqəmlərin haradan götürülməsilə bağlı iqtidar havadarlarına “bu rəqəm oyunların təşkilinə məsul Əməliyyat Komitəsinin yaydığı rəqəmlərdir” cavabını verib.

Politoloqlara görə, İlham Əliyevin antiqərb bəyanatları ölkənin antiqərb alyansına can atması və bu alyansda yer almaq istəyilə bağlıdır.

Qəzet Avropa Parlamenti, Avropa Şurası, Bundestaqda və ABŞ-da müzakirələrdən sonra Azərbaycanla bağlı Britaniyanın Kral İnstitutunda dinləmələrin gözlənildiyini nəzərə çatdırır.

Son bir ildə problemli kreditlərin həcminin 45% artdığını yazan qəzet bu ilin sonuna kimi isə 8-10% həddinə çatacağını bildirir. Əhalinin banklardan əmanətlərini kütləvi şəkildə geri çəkməsinin ekspertlər “bank sistemində neqativ hallar yaradacağı” kimi dəyərləndirirlər.

“Ekspress”   yazır ki ,erməni Simonyanın rəhbəri olduğu “Rossiya seqodnya” agentliyinin “Sputnik” radiosu “Araz” radiosu ilə əməkdşalıq etməsi haqda xəbərləri bəyanat yayaraq təkzib edib.

“Exo” ölkədə 44 bankın fəaliyyət göstərdiyini yazaraq ekspertlərə isnadən 17 bankın fəaliyyətinin ölkə üçün kifayət edəcəyini diqqət mərkəzinə çəkib.

“Novoe Vremya” Qərbin Qarabağ ətrafında yeni prosesə başlamasını iddia edərək “Bakı bu çağırışlara cavab verməyə hazırdırmı?” sualını gündəmə gətirir.

“Bizim yol”  baş nazirin keçmiş müavini Abbas Abbasovun “Milyarderlər İttifaqı”nı buraxmasını önə çəkərək bunu “Rusiya layihəsi”nə rəsmən son qoyulması” kimi dəyərləndirir.

Qəzet yazır ki, Vergilər Nazirliyi sahibkarlara kütləvi cinayət işi açır, keçən il ilə müqayisədə bu il məsuliyyətə cəlb edilənlərin sayı 3 dəfə artıb.

Qəzetə görə, Bakıda ev alqı-satqısı dayanıb, ekspetlər investorların qiymətlərin daha da ucuzlaşacağını gözlədiklərini nəzərə çatdırır.

Qəzetin müxbiri Ramid İbrahimov Şirvan şəhərində onlara məxsus bağın qəsdlə yandırılması haqda məqalə yazıb.

“Yeni Müsavat”  baş nazirin keçmiş müavini Abbas Abbasovun “Milyarderlər İttifaqı”nı tərk etməsini “yaxınlarını həbsdən qurtarmaq” cəhdi sayaraq ilk səhifəyə çıxarıb.

AXCP sədrinin müavini Əbülfəz Qurbanlı hər hansı konkret səbəb göstərmədən AXCP sıralarını tərk etdiyini bəyan edib.

Var-dövlətini sataraq Dağlıq Qarabağa gələn rus milyarderi German Sterliqov Şuşada mətbuat konfransı keçirəcəyini bəyan edir, Azərbaycan XİN isə bunu təxribat sayır.

Suriyada 1000-ə yaxın azərbaycanlının döyüşdüyün yazan qəzet onların ölkəyə dönüşünü ölkə üçün təhdid və təhlükə sayır.

Mərkəzi Bankın növbəti devalvasiyaya gedə biləcəyini deyən ekspertlər MB-ni bank sistemilə bağlı həqiqətləri gizlətməkdə ittiham edir, bank sektorunun maliyyə göstəricilərinin şəffaf olmadığını bildirirlər.