Mətbuat-Monitorinq 09.10.12

Rəsmi qəzetlər dövlət başçısı İlham Əliyevin Tərtər, Bərdə, Yevlax, Zərdab rayonlarına səfəri, tikintisi başa çatan obyektlərin açılışında iştirakı haqda yazır. 

Qəzetlər dövlət başçısının ehtiyat fondundan Bərdə rayonunun iqtisadi inkişafı üçün 5 milyon manat ayrıldığını bildirirlər. Bu qəzetlər Heydər Əliyev Mərkəzinin əsasnaməsinin təsdiq olunması haqda dövlət başçısının fərman imzalamasına diqqəti çəkir. 

“Azadlıq” qəzeti ölkənin baş prokuroru Zakir Qaralovun Strasburqda səfərdə olmasını iddia edərək bunun son vaxtlar ölkə gündəmini qarışdıran deputat Gülər Əhmədova ilə keçmiş rektor Elşad Abdullayevin arasındakı “deputatlıq rüşvəti” ilə bağlı olmasına işarə edir. 

Müxalif siyasətçilər ölkədə seçki korrupsiyası haqda danışaraq fakta “seçki korrupsiyasının müəllifi bu iqtidarın özüdür” şərhini veriblər.

Vaxtilə YAP-ın alovlu “tribunlarından biri, qanunverici və icra orqanlarında yer tutan, indisə kənara atılan Musa Musayev YAP-ı “dələduzların, qara niyyətli insanların toplaşması” ittihamına məruz qoyub.

Zaqataladakı zəlzələ bölgəsində sakinlər üçün ikiotaqlı evin 37 min manata, 1 kvadrtmetrin 500 manata rəsmiləşdirilməsini qəzet “müdhiş korrupsiya” adlandırır.   

Əmək haqlarını ala bilməyən 100-ə qədər fəhlə Qaradağ rayon İcra Hakimiyyətinin binası önündə aksiya keçirib.  

“Zerkalo” oktyabrın 5-də Təhsil nazirliyinin önündə bir qrup dindarın hicaba azadlıq tələbilə keçirdiyi aksiyada istintaqın xarici iz axtarmasına “Təhsil Nazirliyinin önündə aksiyanı kim təşkil edib?” ironiyasını ifadə edir.

“Ekspress” yazır ki, təhsil naziri Misir Mərdanov “orta məktəblərdə attestatlar nömrə ilə verildiyi kimi ali məktəblərdə də diplomlar nömrə ilə verilsə problem həll olunar” deyə saxta diplomların qarşısının alınmasına toxunub. 

“Novoe Vremya”  keçmiş rektor Elşad Abdullayev və keçmiş deputat Gülər Əhmədova arasında “deputatlıq rüşvəti”nə dair yeni videonun yayılmasını “iqtidarın imicinə yeni zərbə” adlandırır. 

Zaqatalada baş vermiş zəlzələ bölgəsində sakinlər üçün ev tikintisini qəzet “iqtidarın bərpa işlərini iflasa uğratması” kimi dəyərləndirir. 

“Bizim yol”. Sabunçu rayonunda tikilmiş 311 saylı məktəbin altında yanacaq anbarı odluğu üçün məktəbin bağlanmasına qərar verilib. 

Süründürməçiliyə yol verdiyinə görə Ağdaş rayon prokuroru işdən azad edilib.   

“Yeni Müsavat”. İqtidar mənsubları “deputatlıq rüşvəti”nin mərkəzi fiquru, keçmiş deputat Gülər Əhmədovaya ölkədən çıxmaq qadağası qoyublar. 

Ölkənin bir sıra gənclər qurumları həbsdə olan Nigar Yaqublunun, Zaur Qurbanlının, Rəsul Mürsəlovun müdafiəsi üçün aksiyaya hazırlaşırlar. 

Xarici işlər nazirinin müavini Araz Əzimov “Ermənistanın Azərbaycanla danışıqlarda Iranin dəstəyilə sərt mövqe tutması”nı bəyan edərək İranı Azərbaycana xəyanətdə ittiham edib.