Mətbuat-monitorinq 09.10.15

Rəsmi qəzetlər dövlət başçısı İlham Əliyevin Türkdilli Dövlətlərin Xüsusi Xidmət Orqanları Konfransının 18-ci iclasının iştirakçılarını qəbul etməsi haqda xəbərləri ilk səhifələrdə yerləşdiriblər.

“Azadlıq” qəzeti MTRŞ ilə telekanallar arasındakı qalmaqalları “iqtidar daxilində mediaya nəzarət uğrunda savaş” getməsi kimi manjetə daşıyıb.  

Rayonlardan gələn avtomobillərin Bakıya buraxılmamasına etiraz olaraq cənub istiqamətindən gələn sürücülər maşınları yol polislərinin üzərinə sürüblər.

Rəsmi Bakı öz baxımından fəaliyyətindən narazı qaldığı “Amnesty İnternational”ın iki əməkdaşını Bakı aeroportunda saxlayıb və deportasiya edib.

Ölkənin ictmai fəalları Avropa Şurasının İşçi Qrupdan çıxmasını “Azərbaycanın konkret beynəlxalq təcridə düşməsi”, “sivil dünyanın hakimiyyətlə vidalaşması” kimi dəyərəndirirlər.

Rəsmi Bakının bütün beynəlxalq aləmlə qarşıdurmaya getməsini vəkil Qurban Məmmədov “iqtidarın artıq sonunun yaxınlaşmasını hiss etməsi” kimi şərh edir.

ABŞ Konqresinin etika məsələləri üzrə müstəqil təhqiqatçıları bir qrup ABŞ konqresmeninin 2008-ci ildə Azərbaycana səfərini “etikasız səfər” kimi şərh ediblər.

Vəkil Elçin Sadıqov “Meydan TV” ilə əməkdaşlığa görə 30 sutka inzibati cəza alan Şirin Abbasovun bu qərardan verdiyi şikayətin apellyasiya məhkəməsinə göndərilmədiyini bəyan edib.

Deputatlığa namizədliyi qeydə alınmayan müğənni Elza Seyidcahan deputat olacaq şəxslərin 3 ay öncədən müəyyən edildiyini, siyahının ona göstərildiyini bildirib. 

“Ekspress” qəzeti dövlət başçısı İlham Əliyevin Ermənistana münasibətdə “öz gücümüzlə şər qüvvəni əzə bildik” bəyanatını diqqət mərkəzinə çəkib.

Rusiyanın Xəzərdən Suriyaya raket zərbələri endirməsini ekspertlər “Azərbaycana da mesaj” kimi dəyərləndiriblər.

“Exo” qəzeti Azərbaycana Dağıstan vasitəsilə saxta ABŞ dollarları daxil olması haqda xəbərdarlığı ön plana çıxarıb.

Ekspertlər Gürcüstandan Azərbaycana maşın idxalının təqribən 5.5 dəfə azalmasını “avtomobilə olan tələbin enməsi” kimi dəyərləndirirlər.

“Bizim yol” qəzeti bu gündən deputatlığa namizədlərin təbliğata başlamaları, çıxışın hər bir dəqiqəsinə İTV-nin 3540 manat tələb etməsini ilk səhifəyə yerləşdirib.

2016-cı ildə ölkə üzrə ictimai-siyasi və sosial-iqtisadi durumu şərh edən ekspertlər böhranın dərinləşəcəyi, işsizliyin, yoxsulluğun artacağı kimi xəbərdarlıq ediblər.

“Yeni Müsavat ” qəzeti nəqliyyat naziri Ziya Məmmədovun karyerasını vaxtilə biznes ortağı olmuş “Hafka” ayamalı iş adamının kompromatlarının bitirəcəyi iddiasını önə çəkib.

Ekspertlər Rusiyanın Suriyaya Xəzərdən raket zərbələri endirməsilə bağlı NATO və ABŞ-ın  xəbərdarlığını “Azərbaycana qarşı terror-təhdid riskinin artması” kimi şərh edirlər.

MTRŞ-nin telekanallarla qarşıdurmasına media təmsilçiləri “MTRŞ-nin müəyyən dairələrin tapşırığını yerinə yetirməsi” kimi şərhlər veriblər.