Mətbuat-Monitorinq 09.11.12

Rəsmi qəzetlər dövlət başçısı İlham Əliyevin Əhmədli qəsəbəsindəki 14 saylı şəhər poliklinikasının, Nəsimi rayonundakı 1saylı orta məktəbin açılışında, Milli Olimpiya Komitəsinin 20 illik yubiley mərasimində iştirakı haqda yazıblar.  

“Azadlıq” qəzeti yüksək rütbəli məmurlar arasında biznes savaşına toxunaraq nəqliyyat naziri Ziya Məmmədovla dövlət başçısının şəxsi mühafizə xidmətinin rəisi Bəylər Əyyubov arasında “taksi biznesi” davasının olmasını ilk səhifəyə çıxarıb.  

Keçmiş rektor Elşad Abdullayevin qardaşı Mahir Abdullayevin 2003-cü ildə oğurlanması faktı ilə bağlı müğənni Mətanət İsgəndərlinin həbsinə hazırlıq gedir, sübutlar toplanır. 

Müxalif partiyalar hakim YAP-ın Azərbaycana ancaq yoxsulluq və səfalət gətirdiyini bəyan edərək bu partiyanın 20 illik yubileyinin qeyd olunmasını absurd sayırlar.  

Böyük Britaniyanın “The Daily Teleqraph” qəzeti Əliyev rejimini “nimdaş diktatura” adlandırıb. İranın sonuncu ülyahəzrəti Fərəh Pəhləvi sosial şəbəkələrdə Məhəmməd Əmin Rəsulzadəni böyük siyasi lider, alim və şəxsiyyət olması haqda yazıb.  

“Ekspress”  yazır ki, Mətbuat Şurası jurnalist etikasını pozduqlarına görə 7 qəzetin adını “qara” və ya “reket siyahısı”na salıb.

Deputat Vahid Əhmədov qəzetə açıqlamasında qeyri-neft sektoruna vəsaitlər ayrılmasa ölkə üçün problemlərin yaranacağı barədə xəbərdalıq edib.    

“Exo”.  Hüquq müdafiəçiləri övladlığa götürülərək xarici ölkələrə aparılan bütün azərbaycanlı uşaqlarıan taleyi məlum olmayınca beynəxalq övladlığa götürmə prosesinin dayandırılmasına israr edirlər. 

“Novoe Vremya” Ali Məhkəmənin sədri Ramiz Rzayevin bəzi hakimləri tənqid etməsinə və qanunlardakı boşluq haqqında danışmasına şübhə ilə yanaşaraq “qanun haqqında narahatlıq, yoxsa, daha bir imitasiya? ” sualı ilə mövqeyini bildirir. 

“Bizim yol” qəzeti dövlət başçısı İlham Əliyevin söz verməsinə baxmayaraq, Avropa Komissiyasının vitse-prezidentinin həbsxanaya buraxılmamasını ilk səhifəyə çıxarıb. 

Qəzetin  əməkdaşı Vüsal Yusubova bu günlərdə hücum edənlərdən birinin karateçi Anar İsgəndərov olduğu aşkar edilib.     

“Yeni Müsavat”  Moskvada yaradılan şərti “milyarderlər ittifaqı”nın əsas hədəfinin Əliyevlərin devrilməsi yox, iqtidarın islahatlara maneçilik törədən hissəsinin sıradan çıxarılması olması iddiasını irəli sürüb.  

Keçmiş rektor Elşad Abdullayev bəzi şəxsləri adam oğurluğunda, bu faktları bilib gizlətməkdə ittiham edərək yeni açacağı saytında bu məzmunlu videoları yerləşdirəcəyini bildirib.  

Deputatlar “REAL” rəhbəri İlqar Məmmədov və politoloq Zərdüşt Əlizadənin ardınca köşə yazarı Zamin Hacını da məhkəməyə verməyə hazırlaşırlar. 

Rəsmi Bakının intriqaların içində boğulmaqda olduğunu yazan qəzet ekspertlərə istinadən islahatlara başlamaqdan ayrı yolun qalmadığını nəzərə çatdırır.