Mətbuat-Monitorinq 10.06.15

Rəsmi qəzetlər dövlət başçısı İlham Əliyevin I Avropa Oyunlarında iştirak edəcək Azərbaycan nümayəndə heyətilə Atletlər Kəndində görüşü haqda xəbərləri ilk səhifələrdə yerləşdiriblər.

“Azadlıq” qəzeti Avropa parlamentində Azərbaycandakı siyasi məhbuslarla bağlı aksiya keçirilməsini “Əliyevlə Qərb arasında gərginliyin pik həddə olması” göstəricisi kimi manjetə çıxarıb.

Qəzet Avropa Oyunlarının açılışı günü, yəni iyunun 12-də Almaniya parlamentində Azərbaycandakı repressiyaların müzakirəsinin keçiriləcəyini yazır.

Frans-press agentliyi isə Avropa Oyunları fonunda Azərbaycanda siyasi repressiyalara “parıltı arxasındakı amansız repressiyalar” yanaşmasını ifadə edib.

Qəzet yazır ki,  Milli Şuranı Azərbaycana qarşı separatizmdə ittiham edən “Yeni Müsavat” qəzetini MŞ sədri Cəmil Həsənli “iqtidarın əlindəki başlıca media ruporu” adlandırıb.

Azərbaycanda korrupsiyaya qarşı mübarizəni, qanunun aliliyini, məhkəmə sisteminin müstəqilliyini gücləndirməyə ehtiyac olduğunu bildirən Beynəlxalq Valyuta Fondu rəsmi Bakını islahatrlara çağırıb.

Qanunsuz tikilən villaların  elə Bakı meri tərəfindən “canlı musiqi” ilə qanunsuz şəkildə sökülməsini qəzet Bakı merinin villa sahiblərinə “toy tutması” hesab edir.

Qəzetin iddiasına görə, Avropa Oyunları ilə bağlı Rusiyadan Azərbaycana göndərilən “könüllülər” əslində RF təhlükəsizlik əməkdaşlarıdır.

“Ekspress”  rəsmi Bakının ATƏT-in Bakı ofisini bağlamaq qərarını “Bakının sərt mövqeyinin ATƏT-i çaşqın duruma salması” kimi ön plana çəkib.

“Novoe Vremya” insan haqlarının ağır durumuna görə Azərbaycanın Qərb mətbuatında ciddi tənqidlərə məruz qalmasını “Qərbin Azərbaycan tərəfə açdığı yaylım atəşlərinin daha güclü səslənməsi” kimi dəyələndirərək ilk plana çıxarıb.

“Bizim yol”  Beynəlxalq Bankdan götürülən “kredit qalmaqalı” sırasına bankdan 50 milyon götürən “İnter Textile” müəssisəsinin də əlavə edilməsini silk səhifədə yerləşdirib.

“Yeni Müsavat” nazir Ziya Məmmədova məxsus “Trump Towers” yelkən-oteli aça bilməməsini ilk səhifəyə çıxarıb.

ABŞ rəsmi Bakının ATƏT-in Bakı ofisini bağlanması haqda qərarını qanunsuz sayaraq qərarı geri götürməyə çağırıb.

Transxəzər qaz kəmərinin çəkilişilə bağlı Kremlin Türkmənistan və Azərbaycana “Transxəzər qaz kəmərinin çəkilşi Rusiyanın razılığı olmadan baş tuta bilməz” xəbərdarlığı edib.