Mətbuat-Monitorinq 10.12.14

Rəsmi qəzetlər dövlət başçısı İlham Əliyevin Balakən rayonunun Balakən-Sarıbulaq-Qabaqçöl-Xalatala yolunun tikintisilə bağlı 2,9 milyon manat vəsait ayırması hadqa sərəncamının mətnini ilk səhifələrdə yerləşdiriblər.

“Azadlıq” qəzeti Avropa Şurasının baş katibi və insan haqları üzrə komissarının jurnalist Xədicə İsmayılın həbsinə etiraz bəyanatlarını manjetə çıxararaq bunu “rəsmi Bakının güvəndiyi yerdən zərbə alması” adlandırır. Qəzet Avropa İttifaqının da X.İsmayılın həbsilə bağlı etiraz bəyanatı yaymasına diqqət çəkir.

Həbsdə olan hüquq müdafiəçisi Leyla Yunusun vəkili Ramiz Məmmədov onun hərəkət etməkdə çətinlik çəkdiyini bildirib.

Ölkədə normal seçki keçirməyi bacarmayan MSK sədri Məzahir Pənahovun builki bələdiyyə seçkilərini “alman dəqiqliyi” ilə keçirəcəyi bəyanatına qəzet “məzən olsun, Məzahir” ironiyasını ifadə edib.

Rəsmi Tbilisi bu ilin oktyabrından “Borçalı” cəmiyyətinin sədri Zəlimxan Məmmədlinin Gürcüstana girişinə yasaq qoyub, yasağın səbəbləri açıqlanmır.

“Ekspress”  Bakıda sərxoş qadın sürücülər kimi yeni “problem”in yaranmasını ilk səhifədə yerləşdirib.

Qəzet İrandan Azərbaycana narkotik maddələr keçirmək istəyən 11 narkotacirin MTN-in əməliyyatı nəticəsində ələ keçdiyini yazır.

“Exo” Bakı şəhərinin əhali ilə “yüklənməsi” və bundan necə azad olması mövzusunu diqqət mərkəzinə çəkib.

Qəzet paytaxtda nə qədər “oğru”nun olması haqda dəqiq statistikanın olmadığını, amma ekspertlərə istinadən bu oğruların aylıq gəlirlərinin 1000 manata yaxın olduğunu yazır.

Bu il yanvarın 1-dən dekabrın 6-na kimi baş verən 850 yol qəzasında 290 nəfər həlak olub, 861 nəfər yaralanıb.

Ekspertlərə istinadən qəzetin yazdığına görə, Azərbaycanda 350-yə yaxn yaşayış məntəqəsi təhlükəli sürüşmə zonalarında yerləşir.

“Novoe Vremya”  dünya bazarında neftin ucuzlaşması məsələsinə toxunaraq “Azərbaycan yeni iqtisadi böhranın qurbanı ola bilərmi?” sualını gündəmə gətirir.

“Bizim yol”  Polad Bülbüloğlunun Rusiyanın Qarabağ problemini erməni tərəfin “inadkarlığı” üzündən həll edə bilməməsi “mövqeyini” önə çəkib.

Maliyyə naziri Samir Şərifov neftin ucuzlaşması ilə əlaqədar Azərbaycana bağlı bəzi layihələrin təxirə salınmasının mümkünlüyü barədə bəyanat səsləndirib.

“Yeni Müsavat”  jurnalist Xədicə İsmayılın rəfiqəsi Aynur İmranovanın jurnalistin həbsinə formal səbəb olan Tural Mustafayevin X.İsmayıln yanına yerləşdirilmiş adam olması bəyanatını ilk səhifəyə çıxarıb.

Qəzetin əməkdaşı Emil Salamoğlu Bakı Şəhər Prokurorluğunda X.İsmayılın cinayət işilə bağlı istintaq sirlərini yayması barədə xəbərdarlıq alıb, jurnalist qarşı tərəfə “qorumaq sizin işinizdir, mənsə jurnalistəm” cavabını verib.

Qəzet iqtisadçı alim Qubad İbadoğluna istinadən 2008-2013-cü illərdə idxal əməliyyatları zamanı 21,5 milyard dollar vəsaitin mənimsənildiyini, bu sırada ən yüksək olan 4,9 milyard dolların 2013-cü ildə mənimsənildiyini bildirir.

“Sevil Massivi” MTK-nın ev tikintisi adı ilə aldatdığı vətəndaşlar rəsmi qurumlar şikayətlərinə baxmadıqlarına görə, aksiya keçirəcəklərini bəyan edirlər.