Mətbuat-Monitorinq 11.01.13

Rəsmi qəzetlər ( “Azərbaycan”, “Xalq qəzeti”, “Yeni Azərbaycan” qəzetləri) son zamanlar ictimai düşüncənin daha çox iqtidarı əsaslı tənqid üzrə fəallığından çəkinir. Belə ki, bu qəzetlərdə tanınmış ziyalı və ictimai xadim Rüstəm İbrahimbəyovun növbəti prezident seçkilərində hakimiyyət dəyişikliyinin olacağı haqda açıqlamalarını, İctimai Palatanın prezident seçklərinə qatılmasını təhqir edən yazılar dərc olunub. 

Eyni zamanda əsgər Ceyhun Qubadovun hərbi xidmətdə qətli ilə bağlı gənclərin etiraz aksiyasına hazırlaşması bu qəzetlərdə “məsələnin siyasiləşdirilməsi” kimi məsuliyyətsiz mövqe ilə qarşılanır. 

“Azadlıq” keçmiş rektor Elşad Abdullayevin iqtidarı ifşa edən videolarına və açıqlamalarına geniş yer verir. O, açıqlamasında daxili işlər nazirinin müavini mərhum Zahid Dünyamalıyevin qaydasız oyunların qurbanı olduğunu bildirir. 

Məlum “deputatlıq rüşvəti” videosunun “qəhrəmanı” keçmiş deputat Gülər Əhmədova onunla iş birliyində olmuş məhrum Sevinc Babayevanın oğlu Ayxan Məmmədovu anasının ölümündə onu ittiham etməsinə təhqirlə cavab verib. 

AXCP sədri Əli Kərimli “qatil Əliyevin cinaytkar rejimidir” deyə əsgər Ceyhun Qubadovun ölümünə mövqeyini ifadə edib. Qəzet orduda əsgər ölümlərinə etiraz olaraq yanvarın 12-də Bakıda aksiya keçiriləcəyini nəzərə çatdırır. Orduda xidmətdə qətlə yetirilən əsgər Ceyhun Qubadovun anası bütün anaları əsgər ölümlərinə etiraza səsləyib. 

Hüquq müdafiəçisi Leyla Yunus cinayətkarların Azərbaycan dövlət idarəçiliyində təmsil olunduqlarını bəyan edərək “xalq ciddi etirazını bildirməyənə kimi iqtidarın kriminal mahiyyətinin davam edəcəyi” barədə xəbərdarlıq edib. 

“Zerkalo”  yerli filmlərin bərpasına başlandığını yazaraq Dövlət Film Fondunun bəzi kinolentləri elektron formata keçirdiyini nəzərə çatdırır. 

Avropa Birliyinin bir neçə ölkədə, o cümlədən Azərbaycanda demokratiyanın inkişafına dəstək üçün Fond yaratmasına qəzet “dəstəkləməyə bir şey varmı?” sualı ilə qarşılıq verərək ölkədə demokratiyanın olmadığını bildirir.  

“Ekspress”. Əsgər Ceyhun Qubadovun qətlilə bağlı Şəmkir korpusunun komandiri, general Rövşən Əkbərova şiddətli töhmət verilib. 

Qəzet rəsmi mənbələrə istinadən 2012-ci ildə ölkədəki  yol qəzalarında 1156 nəfərin öldüyünü bildirir. 

Azərbaycan və Türkiyədə Cənubi Azərbaycan mövzusu ciddi müzakirə edildiyi üçün İranın fanatik dini qrupları hər iki ölkənin əleyhinə aksiyalara hazırlaşırlar. 

“Exo” yazır ki, Azərbaycan vətəndaşlığı rəsmi qaydada təsdiqlənən ermənilərə sovet dönəmindən qalan əmanətlərin qaytarıla bilməsi haqda açıqlamaları erməni tərəf “Azərbaycanın Qarabağ ermənilərini satın almaq cəhdi” kimi dəyərləndirir. 

Ölkənin əməklə məşğul əhalisinin ancaq 19,1%-i bədbəxt hadisələrdən sığortalanıb.  

“Novoe Vremya”  “NABUCCO” qaz kəmərinin çəkilişi üzrə xərclərin Bakının üzərinə qoyulmasını iqtidarın hakimiyyətdə qalması cəhdi sayaraq “hakimiyyət naminə nələr etməzsən ki!” mövqeyini bildirir.   

Avropa Birliyinin Azərbaycan da daxil olmaqla bir neçə ölkədə demokratiyanın inkişafı üçün Fond yaratmasına toxunan qəzet “pul hər şeyi həll etmir” deyə rəsmi Bakının demokratiyanın inkişafında maraqlı olmadığını nəzərə çatdırır.  

“Bizim yol” əsgər Ceyhun Qubadovun qətlilə bağlı Şəmkir korpusunun komandiri, general Rövşən Əkbərova töhmət verilməsini “müdafiə nazirinin məşhur generalı cəzalandırması” kimi dəyərləndirir. Qəzet bu ölümlə bağlı ölkə ictimaiyyətinin bütün təbəqələrindən gələn narazılığı “bu dəhşətin ölkəni şoka salması” adlandırır. 

Məlum “deputatlıq rüşvəti” videosunun əsas fiquru keçmiş deputat Gülər Əhmədova qəzetə açıqlamasında “qoy, hamı bilsin ki, Əvəz Zeynallını mən həbs etdirməmişəm” bəyanatını səsləndirib. 

“Yeni Müsavat” yazır ki, “deputatlıq rüşvəti” videosunun əsas fiqurlarından biri, mərhum Sevinc Babayevanın anası qızının ölümündə keçmiş deputat Gülər Əhmədovanın ərini ittiham edib. 

Prezidentliyə namizədliyini irəli sürmüş Müsavat Partiyasının başqanı İsa Qəmbərin yaxın vaxtlarda Seçi Qərargahının yaradılacağı gözlənilir. 

“Bakı Xəbər”. Hərbi ekspertlər ordu rəhbərliyinin əsgər ölümlərinə “insan faciəsi kimi yox, yalnız statistik rəqəm kimi yanaşdığını” bəyan ediblər.