Bakıda keçirilən İteca sərgilərində iştirakçı şirkətlərin sayı 40% artıb

Iteca Caspian sərgi şirkəti 2012-ci ilə yekun vurub: sərgilər 1767 iştirakı şirkəti və 60 000-dən çox ziyarətçini qəbul edib. 

Şirkətin yaydığı məlumatda deyilir ki, il ərzində şirkət öz tərəfdaşı - Böyük Britaniyanın “ITE Group plc” şirkəti ilə birlikdə 20 ixtisaslaşdırılmış sərgi, o cümlədən 2 debüt sərgi keçirib.

Bu il sərgi iştirakçılarının və ziyarətçilərinin sayı ötən illərlə müqayisədə 40% çox idi. Bütövlükdə isə 2012-ci ildə keçirilmiş sərgilərdə 1767 iştirakçı-şirkət və 60000-dən çox ziyarətçi iştirak edib. Yerli şirkətlərin stendləri ümumi ekspozisiya sahəsinin demək olar ki, 50 %-ni tutub. Sərgilərin səmərəliliyini sübut edən faktlardan biri də budur ki, sərgilər başa çatandan dərhal sonra iştirakçıların əksər hissəsi, yəni həm yerli, həm də xarici şirkətlər 2013-cü ildə keçiriləcək sərgilərdə iştirak etmək üçün özlərinə əvvəlcədən yer sifariş ediblər.

Azərbaycan sərgilərində xarici eksponentlərin fəallığı durmadan artır.

Bu il dünyanın 65 ölkəsindən olan şirkətlər Azərbaycanda keçirilən sərgilərdə iştirak ediblər. 2012-ci ildə iştirakçıların sayına görə Rusiya, Türkiyə, Almaniya, İtaliya, İran, Belarus və Litva liderlik edirlər.

Eyni müsbət dinamika milli qrupların iştirakında da müşahidə olunub, belə ki, bu il onların sayı 29-a çatıb.

2013-cü ilin aprelində sərgilər yenidən işə başlayacaq.08D