Mətbuat-Monitorinq 11.10.14

Rəsmi qəzetlər dövlət başçısı İlham Əliyevin MDB dövlət başçlarının Belarus sammitində iştirakı haqda xəbərləri ilk səhifədə yerləşdiriblər.

“Azadlıq” qəzeti Milli Şuranın ölkədəki siyasi həbslərə etiraz olaraq oktyabrın 12-nə təyin etdiyi mitinqə cəmiyyət fəallarının çağırışlarını ilk plana çıxarıb. Milli Şuraya daxil olan AXCP funksionerləri də xalqa mitinqə gəlmək çağırışı edib.

Keçmiş hakim Həsən Əliyevin “milyonluq rüşvət” cinayətində Torpaq Komitəsinin sədri Qərib Əhmədovun da adının  hallandığı nəzərə çatdırılır.

Keçmiş rektor Elşad Abdullayev qardaşı oğlu Mübariz Abdullayevin 10 il həbs cəzası almasını PA-nın rəhbəri Ramiz Mehdiyevin və nazir Ramil Usubovun sifarişi adlandırır.

Dünya bazarında neftin qiymətinin 88 dollara enməsi də qəzetin diqqət mərkəzindədəir.

“Ekspress”  Gürcüstanda 7 mindən çox azərbaycanlı qızın təhsildən yayındırılmasını ilk səhifəyə çıxararaq bu fakta “məktəbə yox, ərə gedirlər” ironiyası ifadə edir.

“Novoe Vremya”  MDB ölkələrinin Belarusdakı sammiti fonunda “Avrasiya, yoxsa Avroatlantika?” dilemmasını önə çəkərək  MDB ölkələrinin seçim qarşısında olduğunu bildirir.

“Bizim yol”  rublun məzənnəsinin enməsini, RF hökumətinin ölkədən pul çıxarılmasına yasaq qoymasını ilk səhifədə yerləşdirərək bunu “azərbaycanlıların əsas gəlir yerinin qapanması” kimi dəyərləndirir.

Qəzet ölkədə turizm sahəsinə böyük pullar xərclənərək otellərin tikilməsinə baxmayaraq, prioritet elan edilən sektorun gəlir gətirməməsini nəzərə çatdırır.

“Yeni Müsavat”  Qarabağ məsələsi üzərində “sirr pərdəsi” olmasını önə çəkərək Azərbaycanın “şotland variantı”na hazırlandığını iddia edir.

Qəzet yazır ki, dövlət başçısı İlham Əiyevin qudası Araz Ağalarova məxsus Nardarandakı torpaq sahələri zəbt edildiyinə görə kəndin 15 sakini həbsə alınıb.