Mətbuat-Monitorinq 12.02.13

Rəsmi qəzetlər AMEA prezidenti Mahmud Kərimovun dəfni, dövlət başçısı İlham Əliyevin görüşləri, yazıçı Əkrəm Əylislinin əleyhinə yazılar dərc ediblər. 

“Azadlıq” qəzeti İsmayıllı hadisələrinə görə həbs edilənlərə görüş verilməməsini “İsmayıllı qanunsuzluqlarının davam etməsi” adlandırır.   

Həbsdə olan siyasətçilər Tofiq Yaqublu və İlqar Məmmədovun sərbəst buraxılmaları haqda Avropa İttifaqının (Aİ) bəyanatına rəsmi Bakının mənfi cavabını politoloqlar “iki tərəf arasında gərginliyin artacağı” kimi dəyərləndiriblər. 

Politoloqlar ölkədəki ictimai-siyasi duruma “seçkilər yaxınlaşdıqca gərginliyin daha da artacağı” mövqeyini ifadə ediblər. 

Türkiyəli yazar xanım Amberin Zaman Azərbaycandakı mövcud durumu “Azərbaycanın barıt çəlləyi üzərində olması” hesab edib.

“Zerkalo” yazıçı Əkrəm Əylislinin qulağının kəsilməsinə Müasir Müsavat Partiyasının 10 manat mükafat təyin etməsi haqda mediada yayılan bəyanata baxmayaraq, cavabdeh qurumların tədbir görməməsinə “DİN deyir ki, onalrda bu haqda rəsmi informasiya yoxdur” ironiyası ilə cavab verib. 

“Ekspress” İranın Azərbaycandakı səfiri Möhsin Pakayinin “Türkiyə pantürkizm yayır, türklər sünni, azərbaycanlılar şiədir” bəyanatını “İran səfirinin ara vurması” adlandırır. 

“Exo” İnternetin əsas zəruri tələbatlar sırasına daxil olduğunu yazaraq Azərbaycanda kommunikasiya xidmətlərinə görə xərclərin minimal istehlakçı səbətinin dəyərinə daxil olunacağını yazır.  

Ölkədə vakant daşınmaz əmlakın həcminin 2. 2 milayrd manata çatdığını yazan qəzet bunu “dondurulmuş pullar” adlandırır. 

“Novoe Vremya” Müasir Müsavat Partiyasının yazıçı Əkrəm Əylislinin qulağının kəsilməsinə 10 min manat mükafat təyin etməsi haqda “orta əsr ruhlu” bəyanatına “indi Əkrəm Əylislinin qulağı neçəyədir?” sarkazmını ifadə edir. 

Ölkə vətəndaşlarının mənzil məsələsini həll edə bilməyən rəsmi Bakının kosmosa rabitə peyki buraxmasına qəzet “kosmosa uçaq, ipoteka problemləri isə həll olunmur” kontrastı ilə mövqe bildirir. 

“Bizim yol” hərbi helikopterin qəzaya uğramasına “Bakıda müəmmalı helikopter qəzası” mövqeyini ifadə edir.

Öyrədilmiş adamlar telefon vasitəsilə Əkrəm Əylislinin özünə və ailəsinə hədə-qorxu gəlirlər. 

“Yeni Müsavat” Dağıstana cəmləşdirilən rus qoşunlarının bu ilin yaz aylarında “antiterror adı ilə Azərbaycanın şimal zonasına girməyə hazılrşadığını yazaraq buna “Rusiyanın Azərbaycana qarşı təhlükəli planı” mövqeyini ifadə edir. 

“Mədh kilsəsi” dini icması 9 sot torpağını aldığı üçün ARDNŞ-i məhkəməyə verib. 

Ekspertlər demokratik qüvvələrin Məşvərət Məclisinin Nümayəndələr Palatasının formalaşdırılmasını İctimai Palataya alternativ yaratmaq hesab edirlər.