Mətbuat-monitorinq 12.03.15

Rəsmi qəzetlər dövlət başçısı İlham Əlyevin Pakistan prezidenti Məmnun Hüseynlə görüşləri haqda xəbərləri ilk səhifələrdə yerləşdiriblər.

Bununla yanaşı, bu qəzetlərdə DİN daxili qoşunlarının bir qrup qulluqçusunun təltif olunmaları haqda sərəncamların mətnləri də yer alıb. 

“Azadlıq” qəzeti Azərbaycann ərzaq bazarında əsas yerlərdən birini tutan “Azərsun”un ərzağın qiymətini 17% artırmaq bəyanatını “ölkədə növbəti bahalaşma” kimi dəyərləndirərək manjetə çıxarıb.

Milli Şuranın ölkədəki bahalaşma ilə bağlı təyin etdiyi 15 mart mitinqinə rəsmi Bakının icazə verməməsi, aksiyaya qarşı qarayaxma və informasiya təxribatın ıişə salmasını “iqtidarın 15 mart mitinqi qorxusu” adlandırır.

Ölkənin ictimai-siyasi fəalları xalqa Milli Şuranın 15 mart mitinqilə bağlı “səsimiz ucalmasa hakimiyyət soyğunçuluğu davam etdirəcək” müraciəti edib.

Müxalif siyasətçilər Azərbaycanın Avropaya inteqrasiya məsələsində iqtidarın “öz maraqlarına sərf edən qədər siyasət” yürütməsinə diqqət çəkir.

Qəzet rəsmi Bakının Avropa Oyunlarına ölkədə müxalif düşüncəyə düşmən mövqeyilə getməsini “təzə libasla köhnə fikirliliyi sığortalamaq” kimi şərh edir.

SOCAR Maltada neft-qaz müqaviləsi imzaladıqdan sonra ölkə mediasında Azərbaycanda korrupsiya, rüşvət, əsassız həbslərlə bağlı tənqidi mövqe önə çıxıb.

Əsgər Çingiz Tarverdiyevin bu ilin yanvarında özünü silahla vurması haqda rəsmi məlumat alt-üst olub, belə ki, bu günlərdə komadan ayılan əsgər onu bölük komandirinin tapançadan başına arxa tərəfdən atəş açaraq vurduğunu söyləyib.

“Ekspress” qəzeti sıravi əsgəri qəsdən güllələyən kiçik çavuşun həbs olunmasını diqqət mərkəzinə çəkib.

“Exo” qəzeti Səhiyyə Nazirlyinin Səhiyyə və İslahatlar İctimai Mərkəzinin pasientlər üçün müxtəlif xəstəliklərin simptomları, diaqnostika, profilaktikası və  dispensarizasiyası haqda xəbər portalını işə salmasını ilk plana çıxarıb.

“Novoe Vremya” qəzeti rəsmi Bakının bütün Avropanı qazla təmin etmək istəməsi, həm də bu bazarda Rusiyaya rəqib olmaması kimi bəyanatlarını “Azərbaycanın Avropaya qaz nəqlində dolaşığa düşməsi” kimi önə çəkib. 

“Bizim yol” qəzeti ölkənin ərzaq bazarında əsas yerlərdən birini tutan “Azərsun holdinq”in manatın devalvasiyası ilə bağlı ərzağın qiymətinin 50% bahalaşa bilməsi bəyanatını “böyük bahalaşmanın anonsu” kimi ilk səhifədə yerləşdirib.

“Yeni Müsavat” qəzeti nəqliyyat naziri Ziya Məmmədovla münaqişədə olan iş adamı Füzuli Qasımovun güllələnməsini ilk əshifəyə çəkərək, yaxınlarının iş adamının intihar etməsi haqda xəbərləri əsassız saydıqlarını bildirir.

Qəzet Qərblə Rusiya arasında qarşıdurma artdıqca Azərbaycanın “Transxəzər” layihəsinə Rusiya və İrandan birgə təhlükənin artmasına da diqqət çəkir.

Ölkədəki bahalığa etiraz olaraq Milli Şuranın martın 15-nə mitinq təyin etməsinə qəzet YAP-a isnad adı ilə “aksiyanın sifarişinin xaricdən gəlməsi” mövqeyi ifadə edir.