Mətbuat-Monitorinq 12.11.14

Rəsmi qəzetlər dövlət başçısı İlham Əliyevin Macarıstana səfəri və oradakı görüşləri haqda xəbərləri ilk səhifələrdə yerləşdiriblər.

“Azadlıq” qəzeti Azərbaycanda 2,5-3 milyard kilovata yaxın elektrik enerjisinin itkiyə getməsini ilk səhifəyə çıxararaq bu itkinin 180 milyon manat təşkil etdiyini yazır.

Avropa, Asiya və ABŞ insan haqları qurumlarını birləşdirən Vətəndaş Həmrəyliyi Platforması rəsmi Bakını ölkədəki siyasi məhbusları azad etməyə çağırıb.

“İslam həmrəyliyi”ndən dəm vuran rəsmi Tehran Ermənistan dəmir yollarını İranın  dəmir yollarına birləşdirmək üçün  İrəvanla 382 km-lik tikinti sazişi imzalayıb.

Saxta xuliqanlıq ittihamı ilə həbsə alınan jurnaist Seymur Həzi həbsini siyasi sifariş adlandırıb, həbsinə görə İlham Əliyevi və onun generellarını ittiham edib.

Dövlət başçısı İlham Əliyevin rayon təhsil şöbələrinin əvəzinə regional təhsil idarələrinin  yaradılması haqda ərəncamının iqtidarda qarşıdurma yaratmasını ekspertlər “PA-nın rəhbəri Ramiz Mehdiyev və Paşayevlərin qarşıdurması” adlandırırlar.       

Azərbaycanda fəaliyyət göstərərn iri xarici şirkətlərdə yoxlamaların  başlamasını ekspertlər “inhisarın gücləndirilməsinə xidmət” kimi dəyərləndirirlər.

“Ekspress” İran prezidenti Həsən Ruhaninin Azərbaycana səfərini ilk səhifəyə çəkib.

“Exo”  ölkəyə gətirilən mobil telefonların qeydiyyatının pullu olmasının  bu telefonların qismən bahalaşacağına səbəb olacağını önə çəkib.

Qəzet 2009-13-cü illərdə əhalinin kommunal məsrəflərinin 2 dəfə artdığını bildirir.

“Bizim yol”  kriminal avtoritet Rövşən Lənkəranskinin Usoyanın qətlini sifariş verib-verməməsini “mühüm” hadisə sayaraq diqqət mərkəzinə gətirib.

Qəzetin yazdığına görə,  Dübəndi-Böyükşor-Novorossiysk neft kəməri Buzovna qəsəbəsinin Tərəvəzçilik-Südçülük sovxozu ərazisindən keçdiyi üçün bu ərazidə evlərin sökülməsinə başlanılıb.

“Yeni Müsavat”  ABŞ araşdırmaçılarına istinadən “Azəriqazbank”, “Bank Standart” və Beynəlxalq Bankın on-layn dərman və antivirus proqramları satışından 10 milyon dollarla “çirkli” pul yumasını manjetə çıxarıb.

Rusiyanın “Rossiya” telekanalı vasitəsilə Azərbaycanın ABŞ-a mənfi münasibəti fonunda süjet yayımlamasını qəzet  telekanalın Bakıdan ABŞ-ı “vurması” adlandırır.     

ABŞ politoloqu Riçard Ran Putinin  tezliklə Azərbaycana hücuma keçərək neft-qaz kəmərləri üzərində nəzarəti təmin edəcəyi barədə xəbərdarlıq edir.

Avropa Komissiyasının  ARDNŞ-nin Yunanıstanın DESFA neft şirkətinin səhmlərini alması ilə bağlı sazişi imzalmayacağı bəyanatından sonra ARDNŞ rəhbərliyinin Afina səfərini qəzet “bəyanatın iqtidarı hərəkətə gətirməsi” sayır.

Ekspertlər rublun ucuzlaşması nəticəsində Neft Fondunun təkcə 3-cü rübdə 80 milyon dollar itirdiyini bildirirlər.

Qəzet Keşlə qəsəbəsindəki “Baku Paintball Center”dəki atıcılıq meydanını Bakıda “İŞİD üçün əsgər hazırlayan təlim yeri” adlandırır və Mərkəzin qapıları bağlı olsa da içəridən atışma səslərinin gəldiyini iddia edir.