Mətbuat-Monitorinq 14.03.14

Rəsmi qəzetlər dövlət başçısı İlham Əliyevin Almaniyanın keçmiş kansleri Gerhard Şrederi, Fransanın keçmiş baş naziri Dominik deV illpeni, RF Sverdlovsk vilayətinin qubernatorunu qəbul etməsi haqda xəbərləri ilk səhifəyə çıxarıblar.
   

“Azadlıq” qəzeti Nəqliyyat Nazirliyinin iritonnajlı maşınlara normadan artıq yük vurulması barədə qadağasının oliqarxların maraqlarına toxunduğu üçün nazir Zya Məmmədovu oliqarxlarla üz-üzə qoyması sayaraq manjetə çıxarıb.

AXCP funksionerləri partiyanın inzibati xətalar bəhanəsilə həbsə alınan gənc fəallarına yemək verilməsinə süni problemlərin yaradıldığına diqqət çəkirlər.      

İnsan Hüquqları Evi rəsmi Bakının fundamental azadlıqları məhdudlaşdırması haqda bəyanat yayıb.

Beynəlxalq korrupsiya faktlarını araşdıran Tədqiqatçı Jurnalistlər Qrupu Avstriya Ədliyyə Nazirliyinə Azərbaycan manatının bu ölkədə çapı ilə bağlı yaranan rüşvət qalmaqalında Azərbaycan tərəfdən rüşvət alan şəxslərin adlarının açıqlanması müraciəti ünvanlayıb.
    

“Zerkalo” Rusiyanın Krımı işğal etmək istəməsini Putinin SSRİ-nin dağılmasını faciə kimi qarşılaması və onu bərpa etmək arzusu adlandırır.

Qəzet metropoliten rəhbərliyinə istinadən metro keçidlərində ticarət köşklərinin ləğv olunmasına görə ticarətçilərin kompensasiya almayacaqlarını yazır, buna görə də ticarətçilər əllərindəki malları dəyər-dəyməzinə satmağa başlayıblar.
   

“Exo”  Krım məsələsinin həllində rəsmi Kremlin Krım tatarlarının əfsanəvi lideri Mustafa Cəmil Krımoğlu ilə apardığı danışıqlara işarə ilə “görünür, “tatar faktoru” Moskva üçün gözlənilməz olub” mövqeyini ifadə edir.
 

“Novoe Vremya”  Türkiyənin din xadimi, hazırda ABŞ-da yaşayan  Fətullah Gülənin “Xidmət Hərəkatı”nın Azərbaycanla bağlı açıqladığı hesabatı “Pensilvaniyadan uzanan əlin Bakıya çatması” kimi dəyərləndirir.  
 

“Bizim yol”  Rusiyanın özündə “Krım böhranı” yarandığını, Kalininqrad vilayətinin Litvaya birləşmək istədiyini ilk səhifəyə çıxarıb.
 

“Yeni Müsavat” rüşvət müqabilində Azərbaycan manatının Avstriyada çap olunması ilə bağlı bu ölkədə keçirilən məhkəmədə Azərbaycan tərəfdən rüşvət alan şəxsin Mərkəzi Bankın rəhbəri Elman Rüstəmovun müşaviri olması faktının üzə çıxdığını ilk səhifəyə çəkib.

Qəzetin yazdığına görə, “Xəzər adaları”nın “qurucusu” iş adamı İbrahim Nehrəmliyə torpaq daşınmasına qadağa qoyulub.

“İsmayıllı hadisələri”lə bağlı məhkəmədə son söz deyən müttəhimlər rayonda baş vermiş hadisələri məmur qudurğanlığına cavab kimi dəyərləndiriblər.