Mətbuat-Monitorinq 14.08.13

Rəsmi və iqtidaryönlü, eləcə də müstəqil və müxalifətyönlü qəzetlərin bugünkü aparıcı mövzusu RF prezidenti V.Putinin Azərbaycana səfəridir. Bu səfər, səfər çərçivəsində imzalanan sənədlər, səfərin mahiyyət və müəmmaları haqda geniş hərtərəfli şərhlər verilir.

İqtidar qəzetləri bu mövzu ilə yanaşı müxalifətin aparıcı qüvvəsi olan Milli Şuranı, onun prezidentliyə vahid namizədi Rüstəm İbrahimbəyovu  təhqirə məruz qoymaq ənənəsini davam etdirir.  

“Azadlıq”  RF prezidentinin Bakı səfərinin şərhlərinə geniş yer verib. Belə ki, Rusiya hərbi gəmilərinin Bakıya gəlməsi “Putinin səfərində şok müəmma” kimi təfsir olunur. Qəzet bir çox məsələlərdə rəsmi Bakı ilə Kremlin anlaşa bilməməsini iddia edir. Rusiya politoloqları V.Putinin səfərinə “Kremldə məlumat var ki, Azərbaycan Türkiyə ilə vahid ordu yaratmaq ideyasını müzakirə edir” şərhini veriblər. 

Milli Şuranın fəaliyyəti də qəzetin diqqət mərkəzindədir. Rəsmi Bakının Milli Şuranın “hərbi qanadı” olması açıqlamalarına müxalif düşərgə ironiyalı “bir azdan Milli Şuraya məxsus tanklar da tapılacaq” cavabı verilib. Milli Şura mənsubları xalqı və gəncləri 18 avqust aksiyasında fəal iştiraka çağırıblar. 

Qəzet Karlovı-Varıya fəxri konsul təyin edilən Fəxrəddin Mirzəyevi ekspertlərin rəylərinə istinadən “İlham Əliyevin korrupsiya ortağı” adlandırır.  

“Zerkalo” RF prezidenti V.Putinin Bakı səfəri ilə bağlı rəsmi Bakıya “Rusiyadan bizə dost “sırımayın”, “düşmənimin düşməni mənim dostumdur” prinsipi dövlətlərarası münasibətlərə həmişə tətbiq oluna bilməz” tövsiyəsini verir.

Bu səfər  çərçivəsində imzalanan sənədlərin əhəmiyyətsizliyini “onları Putinsiz də imzalamaq olardı” mümkünlüyünü yazan qəzet səfərin müəmmalı qalmasını “Axı, Putin niyə gəlmişdi?” sualı ilə açıqlayır.       

“Ekspress” Avropa İttifaqının Azərbaycanla assosiativ sazişdə qərarlı olması məsələsini ilk səhifəyə çıxarıb.

RF prezidenti V.Putinin Bakı səfərinə “bütün əsas məsələlərdə Bakı və Moskvanın mövqelərinin üst-üstə düşməsi” mövqeyindən yanaşan qəzet  iki ölkə arasında hərbi-texniki əməkdaşlığın həcminin 4 milyard dollar olduğunu nəzərə çatdırır.  

Milli Şuranın prezidentliyə vahid namizədi Rüstəm İbrahimbəyovun sənədlərinin bu gün Mərkəzi Seçki Komissiyasına təqdim olunacağı prosesinə YAP funksioneri Siyavuş Novruzov “namizədliyi qanunsuzdur, ona imza vərəqələri verilməyəcək” mövqeyini ifadə edib.

“Exo” beynəlxalq araşdırmalara istinadən Azərbaycan iqtisadiyyatının dünyada 67-ci, MDB-də 4-cü olduğunu yazaraq kölgə iqtisadiyyatı leqallaşdığı halda ÜDM-i daha 25% artırmağın mümkünlüyünü qeyd edir.

“Novoe Vremya” rəsmi Bakının müxalifətin prezidentliyə vahid namizədi Rüstəm İbrahiməbəyovun namizədliyini qeydə almaq istəməməsi səylərinə “seçkini məzhəkəyə döndərmək nəyə lazımdır?” mövqeyini ifadə edir.

“Bizim yol” RF prezidenti V.Putinin səfəri çərçivəsində imzalanan sənədlərdən birinin nəticəsi olaraq “Rosneft”in Bakıda işləyəcəyinə “Rusiya-Azərbaycan daşnışıqlarını pərdəarxası” mövqeyini ifadə edir.

Ölkə rayonlarında onlarla orta məktəblərdən bir məzunun belə tələbə ola bilməməsinə qəzet “bölgələrdə təhsilin “ölü” statistikası” şərhini verir.

“Yeni Müsavat” RF prezidenti V. Putinin Bakı səfərinə önəm verib. Qəzetin açıqlamasına görə, bu səfər rəsmi Kremlin ABŞ-ın Azərbaycanda hərbi hava qüvvələri bazası yaratmaq istəməsindən xəbər tutması ilə bağlıdır. Bu səfərdə V.Putinin “hələlik həllini tapmayan çox problem qalır” bəyanatına diqqət çəkən qəzet iki ölkə arasında münasibətlərin istənilən qaydada olmamasına işarə edir. Qəzet bu görüşün nəticəsi olaraq rəsmi Bakının “özünü Kremlin tək dostu göstərə bilmək üçün Kremlə xidmət etmək istəyən bütün simaların həbsinə hazılaşmağa başlamasını” iddia edir.