Mətbuat-Monitorinq 15.07.15

Rəsmi qəzetlər dövlət başçısı İlham Əliyevin 5 saylı Bakı “ASAN Xidmət” mərkəzinin açılışında iştirak etməsini  ilk səhifələrdə yerləşdiriblər. Bundan əlavə, bu qəzetlər “Qiymətli kağızlar bazarı haqqında” qanunun mətnini öz səhifələrində dərc ediblər.

“Azadlıq” qəzeti Avropa məhkəməsinin Azərbaycana aid 50-yə yaxın siyasi işlə bağlı yaxında elan edəcəyi qərarın iqtidarda ciddi narahatlıq yaradacağını, “YAP-ın namizəd siyahısı”nı belə alt-üst edəcəyini önə çəkib.

Qəzetin iddiasına görə, rəsmi Bakı cəmiyyətdə Rusiyaya rəğbət, Qərbə nifrət yaradılması üçün hökumətyanlı qurumlara göstəriş verib.  

İ.Əliyevin Avropa qurum və dövlətləri haqda tənqidi fikirləri sosial şəbəkənin ironiya və tənqid hədəfinə çevrilib, bu mövqe hakimiyyətin xarici siyasətinin ifşası və demokratik islahatlardan imtina etməsi, bu tənqidi fikirlərin daha çox daxili auditoriyaya hesablanması kimi dəyərləndirilib. 

Kredit borcu ilə bağlı Cahangir Ağayevin özünü “Accessbank”ın Beyləqan bölməsi önündə yandırmasının qarşısını polislər alıblar.

Neft 40 dollara düşsə də manatın buna davam gətirəcəyi haqda rəsmi açıqlamaları əsassız sayan qəzet bu durumu “manatın növbəti devalvasiyası üçün ciddi əsas” adlandırır.

Vergilər Nazirliyi tərəfindən  900 nəfərdən çox şəxsin ölkədən çıxışına qadağa qoyulduğunu yazan qəzet bunların arasında xeyli sayda oliqarxın da olduğunu bildirir.

Maliyyə naziri Samir Şərifov neftin qiymətinin aşağı düşməsi kimi qlobal prosesin Azərbaycanda “gəlirlərin azalması, iqtisadi fəallığın səngiməsi, bank sektorunun zəifləməsi”nə səbəb olduğunu bəyan edib.

“Ekspress” dövlət başçısı İlham Əliyevin Vergilər Nazirliyinin, hüquq- mühafizə orqanlarının iş adamlarına “haqq qoyması, pay istəməsi, “krışalıq etmələri”nə “bunu edən dövlətə və xəyanət edir” bəyanatını ön plana çıxarıb.

Azərbaycana da təsiri olan İran-Qərb anlaşmasını “bahalı neft erasının arxada qalması” sayan qəzet neftin dəyərinin 45 dollara düşəcəyini nəzərə çatdırır.

Qəzet bir qrup həkimlərin xəstələrə lazım olmayan dərmanları yazmalarını iddia edərək onları “resept mafiyası” adlandırır.

“Novoe Vremya” İran-Qərb anlaşmasını diqqət mərkəzinə çəkərək  bunu “İranın regional liderliyi hədəfləməsi” kimi dəyərləndirir.

Azərbaycanın qaz nəqli məsələsində ABŞ-la danışıqlar aparmasına toxunan qəzet “köhnə oyunlar yeni interpretasiyada və ya dünyanın enerji xəritəsi necə görünəcək?”mövqeyini ön plana çıxarıb.

“Bizim yol”  İran-Qərb anlaşmasını “tarixi razılaşma” sayaraq ilk səhifəyə yerləşdirib.

Ekspertlər keçən il ilə müqayisədə bu ilin ilk yarısı üçün büdcə gəlirlərinin 1,5 milyard manat azaldığını bildirərək ilin sonuna kimi büdcədə ciddi kəsirin yaranacağını bəyan edirlər.

“Yeni Müsavat”  “arxalı” və ya arxasız bütün sahibkarlardan dövlət vergilərinin ən sərt şəkildə tələb olunduğunu yazaraq bunun vergilər naziri Fazil Məmmədovu hədəfə gətirməsini önə çəkib.

Qəzetin iddiasına görə, dövlət başçısı İlham Əliyevin “bəzi şəxslərin bəzi qurumlara “krışalıq etməsi” barədə açıqlmasından xoşlanmayan bəzi biznes sahibləri və himayəçiləri müəssisələrini bağlayaraq işçiləri müddətsiz məzuniyyətə göndəriblər.    

24 ölkədən olan 95 hüquqşünas dövlət başçısı İlham Əliyevə həbsdə olan həmkarları İntiqam Əliyevin azadlğı üçün  müraciət ünvanlayıb.

Politoloq Ərəstun Oruclu Azərbaycanın Şanxay Əməkdaşlıq Təşkilatna üzv ola bilməsi haqda açıqlamalarla bağlı bu qurumun gələcəyini qaranlıq və şübhəli gördüyünü bəyan edib.

Manatın ucuzlaşmayacağı haqda Mərkəzi Bankın açıqlmasına ekspertlər növbəti devalvasiyada manatın ən azı 20% ucuzlaşacağını bildiriblər.