Mətbuat-Monitorinq 16.02.15

Rəsmi qəzetlər dövlət başçısı İlham Əliyevin “ASAN ödəniş sistemi haqqında Əsasnamə”nin təsdiq edilməsi barədə fərmanının, Rusiya Olimpiya Komitəsinin fəxri üzvü Vitali Smirnovun “Dostluq”ordeni ilə təltif olunması haqda sərəncamının mətnlərini ilk səhifələrdə yerləşdiriblər.

“Azadlıq” qəzeti məhkum Lamiyə Quliyevanın həbsxanada süni mayalanma yolu ilə uşaq dünyaya gətirməsi haqda rəsmi açıqlamaları ifşa edən “mən nə laborantam, nə də professor, şərait yaratdılar, bu da oldu” cavabını ilk səhifəyə çıxarıb.

Hüquq Maarifçiliyi Cəmiyyətinin rəhbəri İntiqam Əliyevin cinayət işində üzünə duran mühasib Gülşən Orucova bu qurumla yanaşı Meida Hüququ İnstitutunun pullarını da ayrı-ayrı vaxtlarda bacısı Əfşanə Orucovanın hesabına köçürüb.

Dünya ekspertləri 2015-16-cı illərdə dünya bazarında neftin qiymətinin 60 dollardan yuxarı olmayacağı barədə bəyanat səsləndiriblər.

Ölkə ixracatında qeyri-neft məhsullarının payının cəmi 4,3% təşkil etdiyini deyən ekspertlər bu faktı biabırçılıq adlandırıblar.

ABŞ-Azərbaycan əlaqələrinə dair rəsmi Bakının parlamentdə keçirdiyi dinləmələri “dinləmə şou”su adlandıran ölkə siyasiləri bunu “bütün baxımdan qüsurlu və dövlətçilik üçün təhlükəli” sayıblar.

Neftin qiymətinin ucuzlaşması ilə bağlı “Azərkimya” müəssisələrində 2 min nəfərə qədər işçinin işdən çıxarılacağı gözlənilir.

Prezident Administrasiyasının ölkənin mənzil bazarında dələduzluqla məşğul olan 33 şirkətin adını açıqlamasını qəzet rəsmi Bakının vətəndaşların mənzil bazarına inamını reanimasiya etmək cəhdi kimi dəyərləndirir.

Sabunçu rayonundakı 90 saylı məktəbin müəllimi Emil Cəbrayılov məktəb şagirdini vəhşicəsinə döydüyünə görə polisə verilib.

“Yeni Müsavat” düşdüyü iqtisadi təcriddən çıxmasının Ermənistanın öz iradəsindən asılı hala gəlməsini və bu yöndə Azərbaycanın rolu olacağı iddiasını “Böyük Qarabağ açılımına aparan yeganə yol” kimi ilk plana çıxarıb.

Şəmkir rayonunun keçmiş icra başçısı Aslan Aslanovun oğlunun qətlində təqsirli bilnən və ömürlük həbs cəzası alan Vüqar Əliyev ölümü nazir Fazil Məmmədovun sifariş verməsinə dair ifadəsinin alınması üçün istintaqda işgəncələrə məruz qalması haqda yazır.        

Azad Demokratlar Partiyasının sədri Sülhəddin Əkbər Milli Məclisdə ABŞ-la bağlı keçirilən dinləmələri “qeyri-ciddi addım” kimi dəyərləndirib.

Qəzet neftin ucuzlaşması prosesinin “Binə” və “Sədərək” Ticarət mərkəzlərini vurduğunu, xeyli mağazaların artıq bağlandığını bildirir.