Mətbuat-Monitorinq 16.06.15

Bu gün yalnız “Azadlıq” qəzeti nəşr edilib və icmal bu qəzetin materialları əsasında hazırlanıb.

Rumıniya prezidenti bu ölkənin baş nazirinin Bakıdakı Avropa Oyunlarının açılış mərasiminə qatılmasını “siyasi səhv” adlandırmasına diqqət çəkərək bu faktı “Avropa Oyunlarına görə Rumıniyada qalmaqal” kimi manjetə çıxarıb.

Rəsmi Kreml bir neçə ölkədə, o cümlədən Azərbaycanda rusdilli KİV-lərə yardım ayırıb, media təmsilçiləri Qərb qurumlarının belə “dəstəyini” rəsmi Bakının qanunsuz saymasını yada salaraq bu köməyi də “qanunsuz saymalıdır” mövqeyini bildiriblər.

Ölkənin müxalif siyasiləri rəsmi Bakının xarici siyasətdə uğur əldə etməməsinə səbəb kimi “iqtidarın dövlət maraqlarını qurban verərək hakimiyyəıt maraqlarını təmin etmək olduğunu” göstəriblər.

Beynəlxalq Araşdırmaçı Jurnalistlər “Xədicə” layihəsi çərçivəsində Əliyevlərin Londondakı çoxsaylı imarətlərindən birinin şəkillərini yayaraq “maaşı ildə 230 min dollar olan Əliyev Londonun ən bahalı məhəlləsində belə böyük evi necə ala bilir?” sualını ünvanlayıblar.

Qəzet dünyanın bir sıra media qurumlarının Azərbaycandakı ictimai-siyasi durumu təhlil edərək “Azərbaycanda demokrat olmağın çox təhlükəli olması” qənaətini nəzərə çatdırır.

Müstəqil iqtisadçı ekspertlər Azərbaycanda investisiya qoyuluşunun azalmasını, vaxtı keçmiş kreditlərin həcminin artmasını bankların kredit portfelini idarəetmə riskinin yüksəlməsinin göstəricisi kimi dəyərləndiriblər.   

Qəzet “Azərsu”da kütləvi ixtisarlar başlandığını, su-tikinti müəssisəsindən 1000-dən çox əməkdaşın işdən çıxarıldığını qeyd edir.

Ölkədə ipoteka kreditinin azalmasına diqqət çəkən ekspertlər bu faktın mənzil bazarında aktivliyi iki dəfə aşağı düşürməsi” kimi dəyərləndiriblər.