Mətbuat-Monitorinq 16.07.14

Rəsmi qəzetlər dövlət başçısı İlham Əliyevin İtaliya səfərinə, səfər çərçivəsində keçirdiyi görüşlərə geniş yer veriblər. Bundan əlavə, bu qəzetlərdə qanunvericiliklə bağlı İ.Əliyein imzaladığı sərəncam və fərmanlar yer alıb.

“Azadlıq” qəzeti “Azercell”in Əliyevlər ailəsinə məxsus olduğunu yazaraq hakim ailənin mobil rabitə bazarının 70%-nə nəzarət etdiyini nəzərə çatdırır.

Qəzet AXC-nin yaradılmasının 25 illilyi ilə bağlı ölkənin ictimai-siyasi həyatında yeri olan şəxslərin qurum barədə düşüncələrini dərc edib.

Qəzet 3 ton heroinin Azərbaycan sərhədlərindən keçərək Gürcüstanda tutulmasını Azərbaycanın gömrük və sərhəd xidmətlərinin səriştəsizliyi kimi dəyərləndirir.

USAİD-in Azərbaycanda müstəqil medianın inkişafına 2,4 milyon dollar vəsait ayırmasının iqtidarda narahatlıq doğurmasına qəzet “medianın inkişafına yönələn layihə iqtidarı niyə narahat etməlidir?” təəccübünü ifadə edir.

“Ekspress” ermənilərin Kəlbəcərdə ələ keçirərək “təxribatçı” kimi qələmə vermək istədikləri azərbaycanlıların “mal-qara oğrusu” olduqlarını bildirir.

Qəzetin yazdığına görə, Bakının “Sovetski məhəlləsi”ndən  köçürülənlər üçün bina tikiləcək və kv.metri 380 manatdan keçmiş Sovetski sakinlərinə satılacaq.

Qəzet ali məktəblərin I və IV qruplarına imtahanlarda 7 nəfərin 700 bal topladığını, amma əksər göstəricilər aşağı olduğu üçün keçid balının 150 bala endirildiyini bildirir.

“Novoe Vremya”  Avropa komissarı Jan-Klod Yunkerin yaxın 5 ildə quruma heç bir dövlətin qəbul olunmayacağı haqda açıqlamasına “Avrokomissiya qırmızı işıq yandırır” reaksiyasını verir.

“Bizim yol”  3 ton heroinin Gürcüstanda ələ keçməsini gürcü rəsmilərinin  “birgə əməliyyatın nəticəsi” kimi dəyərləndirməsini önə verir.

Ölkə banklarında vaxtı keçmiş kreditlərin 905 milyon manata çatdığını yazan qəzet bu səbəbdən bankirlərin hər hansı qərar verməyə çətinlik çəkdiklərini nəzərə çatdırır.

“Yeni Müsavat”  böyük güclərdən Azərbaycana ortaq Qarabağ təhdidi gəlməsini “Azərbaycanın yeni müharibə riski və seçimilə üz-üzə” qalması kimi dəyərləndirir.

Qəzetin iddasına görə, hakimiyyətdəki qruplar yeni baş nazir olaraq Samir Şərifova “hə” deyiblər və bu ilin payızından dövlət başçısının nəzərdə tutduğu “ikinci komanda dövrəyə girir”. 

Qəzet USAİD-in Azərbaycan mətbuatına 2,4 milyon manat qrant ayrılması haqda elanı xəlvəti yaymasını pisləyir, qurumu korrupsiyada ittiham edir.